الجمعة، 25 سبتمبر، 2009

خلاص 2

.
.
.
.
مبحبهاش وبحبها في الوقت نفسه وهي دي المشكلة

م الأول وانا عارف ان البنت دي بتتعلق بالناس بسرعة ...
دي حاجة واضحة أوي
طول الوقت بقولها مش انا ...
خدي بالك مش هينفع ... اختياراتنا مختلفة
بس ده كله مكنش بيفرق معاها خالص

البنت دي تلقائية بطريقة مرعبة ...
وشها مراية بتعكس كل انفعالاتها
لدرجة اني كنت بقرا الأفكار اللي بتعدي عليها
.
مرة قولتلها انتي بريئة أوي والحكاية دي تخوف
ولما سألتني تخوف ليه معرفتش أجاوب وسبتها ومشيت

أول ما شفتها استريحتلها أوي
وحسيت ان فيه بينا حاجات كتير مشتركة
لما كنا بنتكلم سوا ...
كنا بندخل من موضوع لموضوع لموضوع
والكلام مبيخلصش

مقدرش أنكر انها بنت لطيفة وذكية وجميلة
بس محدش بيختار يحب مين وميحبش مين
.
أنا بحبها بطريقتي
حابب اننا نبقى اخوات واصحاب
وحاسس اننا هنبقى أصدقاء كويسين أوي وقريبين
بس مش ده اللي هي عايزاه
هي بتحبني ... بتحيني
انا عمري ما قصدت أأذيها
ولا افتكر اني قلت لها أي حاجة ممكن تكون خلتها تتعلق بيَّا كدة
بالعكس دا انا طول الوقت خايف عليها
وبقولها ان مسألة الارتباط دي مش واردة عندي أصلاً

ف مرة مشيت فجأة وقطعت مية ونور ...
لا بتتصل ولا بتبعت رسايل ولا بشوفها
فجأة كدة من غير ما اعرف ايه اللي حصل
في الأول استغربت وبعدين اتضايقت من الطريقة دي ....
وبعدين فهمت

هي خدت قرار انها تهرب من مشاعرها ومن نفسها ...
معرفتش أعمل ايه
وبعدين قررت اني أساعدها
ومحاولش أتصل بيها أو أقرب منها بأي شكل من الأشكال
علشان تقدر تنساني

صحيح هتتوجع حبة
بس هتشيل الحكاية دي من دماغها
وساعتها هينفع يبقى فيه حد تاني يحبها وتحبه
ويبقوا مبسوطين سوا

برغم اني اتصرفت بالطريقة دي علشانها
إلا اني ساعات بحس انه كان فيه حاجات تانية
أفضل من المسافة السخيفة دي
كان هيحصل ايه يعني لو كنا قعدنا واتكلمنا
وقلتلها اني بعزها جداً وبقدرها
وانها شخص مميز وخاص بالنسبالي
معرفتش أعمل كدة وهي مدتنيش الفرصة

ساعات بحس انها زعلانة مني
وساعات بحس انها فاهمة
وساعات بابقى محتاج اتكلم معاها ومش عارف اعمل ايه

أنا كمان مكنتش عاوز الحدوتة تخلص بالشكل ده
بس غصب عني وعنها الدنيا وقفت فجأة ف نقطة مينفعش تتحرك بعدها

للأسف

خلاص
.....
.
.
ورقة من مذكرات أبو رجل مسلوخة
.............
.
.

3 التعليقات:

حلم بيعافر يقول...

سلاسة وجمال الاسلوب حسسنى بالشخصيتين وبكل مشاعرهم
كل سنة وانت طيبة

Blank-Socrate يقول...

بصراحة متعاطف معاه
حاسس انه انسان كويس
و منطقى
بس للاسف دايما فى طرف تانى للحب منقدرش نتنبأ ابدا ايه اولوياته و رؤيته للامور
بس فى وقت ما و مكان ما هنلاقى الطرف التانى
تؤام روحنا

ست الحسن يقول...

حلم بيعافر

كل سنة وانت بصحة وبخير وسعادة
مبسوطة ان الشخصيتين واضحين بالنسبة لك وحاسسهم فعلاً

نورت يا افندم

............

ميناااا

مبسوطة أوي بتعليقك
وانا كمان يا مينا متعاطفة معاه وعارفة انه إنسان كويس

إن شاء الله يا مينا
الدنيا هتتظبط في يوم من الأيام

مرورك جميل دايماً

........