الخميس، 2 يوليو، 2009

من أبو رِجل مسلوخة إلى أمنا الغولة






انتي مبسوطة دلوقتي أكتر.....
حياتك أحسن
قوليلي بقى إنتي كدة مطمنة أكتر

ها
مستني ردك
من غير ما تردي
أنا عارف انك تايهة وتعبانة وحالتك صعبة
مش محتاج أشوفك علشان أعرف يعني

قوليلي بقى .... انتي مصدقة صحيح اني حد وحش
بجد
انتي مصدقة من جواكي إني ممكن أأذيكي تحت أي ظرف
طب إزاي يعني
دا انتي عارفة أكتر مني اني مستحملش أأذي نملة حتى

هوا فيه إيه إيه اللي حصل ؟
طب والله أنا لحد دلوقتي ما فاهم إيه اللي بيحصل عندك
ومن ساعة اليوم إياه وانا بضرب أخماس في أسداس
أحاول افتكر قولتلك إيه دايقك ملقيش أي حاجة
بالعكس بقى دانا كنت قلقان لتقعي مني في الشارع
لأن وشك كان أصفر وبتنهجي وانتي ماشية
وانا بصراحة مكنتش فاهم أوي إيه اللي حصل لكل ده

مش عارف انتي بتعملي كدة ليه
بس انا سايبك براحتك ع الآخر....

انتي مقلتيش أنا زعلانة منك علشان كذا وكذا وكذا
مقلتيش حاجة خالص ....
بس سيبتني في وسط الشارع ومشيتي
واتقطعت أخبارك فجأة هوا فيه إيه ؟

ساعات بحس اني جوة فيلم عربي مش عارف أوله من آخره
أنا مبقتش عارفلك الصراحة

طب انتي ببساطة كدة ومن سكات عايزة إيه ؟
يعني عايزة تقربي ولا تبعدي أنا معدتش فاهم
طب لو عايزة تبعدي ... ما تبعدي حد حايشك
بس دا مش شكل واحدة بتخلَّص علاقة مع حد
أنا مش فاهم

بس ممكن أكون حاسس
الخناقة دي متخصنيش
أنا برَّة الموضوع أصلاً
إنتي بتتخانقي مع نفسك
وبصراحة أكتر إنتي بتتخانقي مع مشاعرك
ولما مبتعرفيش تتصرفي بتهربي
زي كل مرة

إيه تحبي أفكرك
ما انا برده عارف كل الحواديت
وأقدر أقولك على 3 مرات مثلاً ًحصل فيهم الموقف دا
مش هوا بالظبط بس شبهه يعني
انتي فيه نقطة لما الحدوتة توصل عندها بتقلبي التربيزة

شوفى م الآخر الحكاية مش مستحملة وجع قلب
وانا بصراحة معنديش طقطان للمناهدة
يعني براحتك خالص اعملي اللي يريحك

سلام

..........



من تعليقات ست الحسن

كنت ُأتصوَّر أنني أكتبُ عنكَ/لكّ
لأمرر خيط اتصالٍ بيننا
ثمَّ اكتشفتُ أنني فقط أربتُ على نفسي
أحاول أن أفهم
كيف اخترعتُ تفاصيلاً لم تحدث
وعالماً من الأمل يخصني وحدى

شكراً لكل شىء


...........


.

9 التعليقات:

رضوى يقول...

أنا عايزة اتعرف على الأستاذ أبو رجل مسلوخه ,علشان انا كمان تعبت
و عايزة افهم بقى
هو الرجال أصحاب الرجل المسلوخة دول بيفكروا ازاي بالضبط؟؟؟؟


أه فيما يخص التعليق
فا انا كنت عاوزة اقول
أن ....

لما نتقابل بقى

واحد يعرفك يقول...

جميلة جدا
( تنفع مونودراما بس تطول شوية ويبقى فيها تطور احداث )
لكن مين ابو رجل مسلوخة ؟ وايه اللى جابه هنا ؟؟
وبعدين تنشرى رسالته على الملأ كدة قدام الناس
انا كنت محتاج من امنا الغولة الى ابو رجل مسلوخة اكتر
( الفكرة هايلة ولو استمريتى فى رسايل من دى ولكن بتداخل اصوات _شخصيات التراث الشعبى _ هتبقى حاجة جديدة على غادة اولا وعلى الوسط ثانيا
فى نقطة اخيرة
الموضوع هنا حسيت ان فيه جمل مكررة بتدى نفس المعنى يمكن الاستغناء عنها _ من وجهة نظرى _
لكن ممكن تتاخد على ان شخصية ابو رجل مسلوخة لحوح جدا وبيحب امنا الغولة قوى قوى لكن كنت محتاج اقرا ده ولو فى جملة


بصراحة انا مستنى رد امنا الغولة لانه هيبقى اكثر روعة كالمعتاد من بوسطات امنا الغولة

لاسع افندى يقول...

جميله

بس يعنى ايه..طقطان


تحياتى

الدبّ الدب الدبّ ... الدبّ يقول...

صباح الورد على أمنا الغولة: ببساطة قولي لست الحسن : إنتِ فنانة!

أما أنا فأحتج رسميا على الحجب المقصود لصوت أمنا الغولة في هذه المدوّنة.

وأطالب بإفادة شاملة وفتح لجنة تحقيق للبت في إقامة مدونة موازية، تحمل إسم أمنا الغولة. ثم التفكير بإنشاء سفارات في الدولتين.

بحب الحكومة يقول...

ده اول تعليق لى على اى مدونة
ومش عارف هيوصل ولا لأ لكن حبيت اقولك ان دى من افضل المدونات اللى بدخلها
وهكون ضيف دائم عليكى ان شاء الله
البوست ده جميل جدا ويارب للأفضل وانتظرى تعليقاتى على شغلك ومنتظرك تنورى المدونة بتاعتى

محمد سلامة يقول...

إحنا ليه بنخاف كده منه رغم إننا هنموت و نعيشه ؟ يمكن لأننا عارفين إن الواقع حاجة و الحلم حاجة تانيه و خايفين ليكون الحلم مجرد وهم , ممكن .
عشان كده احنا راضين بالوحده رغم ألمها لأن اللي نعرفه أحسن من اللي ما نعرفهوش .
فاكره يا غادة أغنية عبد الحليم
و اندم لو حبيت و قاسيت
و اندم لو عمري ما حبيت
عارفه ؟
أنا خايف أندم على التانية

دينا الحصِّي يقول...

محمد سلامة اعذر اقتباسي تقريبا لكل تعليقك ..
بس ده كل اللي عاوزة أقوله بالحرف تقريبا ..

"خايفين ليكون الحلم مجرد وهم , ممكن .
عشان كده احنا راضين بالوحده رغم ألمها لأن اللي نعرفه أحسن من اللي ما نعرفهوش .
فاكره يا غادة أغنية عبد الحليم
و اندم لو حبيت و قاسيت
و اندم لو عمري ما حبيت
عارفه ؟
أنا خايف أندم على التانية"
..
.
بس

ست الحسن يقول...

رضوى الجميلة

ما بلاش يا رضوى ...بلاش تتعرفي عليه
وهيكونوا بيفكروا إزاي يعني
عادي زينا كلنا
بيقولوا أو بيكتبوا الحاجات ناقصة

نورتي يا افندم

.......


واحد يعرفك

بما إن كل الناس بتتطالب بأمنا الغولة
فأحب أقولكم انها مش عايزة تيجي
مستخبية ف حتة محدش عارفها ورافضة تظهر
أنا بلغتها وهي ابتسمت بوجع وسكتت

بالنسبة بقى لأبو رجل مسلوخة يا افندم
أنا ضحكت فعلاً لما قريت التعليق بتاع انه بيحبها ده
وفكرني بحاجة حصلت فعلاً وهحكيهالك

لما كتبت الجواب ده
قريته ... لما قريته حسيت بوجع شديد ..إزاي يكتب لي الكلام ده وازاي يقولي عايزة تمشي إمشي
ليه بيعاملني بالقسوة دي

وبعدين اكتشفت ان القسوة الظاهرة بتداري حب مستخبي ...ففرحت وبعدين زعلت لأنه أنا اللي كاتباه ومحدش بعتهولي فعلاً

ممكن تكون فيه جمل متكررة ...هو طلع مرة واحدة ومراجعتهوش
أنا كنت بكتب جواب من الشاطر حسن لست الحسن وبعدين لقيت نفسي كتبت الجواب ده
ومنشرتش الجواب التاني

المهم
هفكر ف حكاية شخصيات التراث دي

نورت يا افندم

.............

لاسع بك

طقطان ...
ملهوش طقطان يعني معندوش طاقة يتحمل بيها....وهمَّ قالوهالنا كدة

انت منين يا لاسع

......

الدب ...الدب

مساء الورد يا افندم
ست الحسن بتقولك متشكرة خالص

أمنا الغولة منعزلة شوية وهترجع بعد حبة.... وأصلاً المدونة دي بتاعتها
ست الحسن هي اللي ضيفة هنا

نورت يا افندم

......

هاني مهران

ألف مبروك ع المدونة ومبسوطة ان أول تعليق ليك يكون هنا
ومستنية تدوينات جامدة

متشكرة خالص يا هاني

......

محمد سلامة ودينا الحصي

بما ان التعليقين تقريباً هما هما
مش عارفة أقولكم إيه
أنا آخر واحدة تتكلم عن الشجاعة

بس احنا مش بنختار نحب مين وإمتى
وعلشان كدة بنخاف لما بننجرف بعيييد لجنينة مسحورة محدش دخلها قبل كدة
بنتوه في المرايات الغريبة التي بتعكس مشاعرنا من غير تهذيب
بكل الفوضى والتلقائية

تعرفوا
احنا مش بنخاف من الآخر
احنا بنخاف من المرايات اللي بتعكس مشاعرنا.... يعني بنخاف من نفسنا
فهمتوا حاجة

ما علينا

ملحوظة صغيرة
أنا مبحبش عبد الحليم
وبقالي 3 أيام كل ما افتح إذاعة الأغاني ألاقيه
شوفوا لي حل في الحكاية دي


.........

rania masoud يقول...

ممكن ست الحسن تتعطف و تتنازل و تشوف مدونتي النونوhttp://bannotamisria.blogspot.com/