الخميس، 22 يناير، 2009

الرجالة وسنينها واللي بيجرا منها ...... يا عسكري!






يعني أعمل ايه في الليلة البني دي
واحد عمَّال يكلمني عن الستات الوحشين
اللي محتاجين واحد يلف ويدور عليهم
ويعني هو غلط في ايه ؟
هو بس قالها عايز أتجوزك ومش فاهم هي رافضة ليه يعني
مع انه كويس ومستقيم ومعاه فلوس يتجوز وعمره ما كسر إشارة مرور

يعني والنبي أقوله ايه
أقوله مفيش واحدة ممكن تتجوز واحد حسَّاة لسة طفل ومحتاج يكبر....
واحد جوَّة البيضة ورافض يطلع منها
شخص خيالي مفهوش غلطة بس كمان من غير طعم
معرفتش أقوله ايه
يمكن بعد عشر سنين ينفع يفكر في الجواز


والتاني اللي موقف حياته كلها لحد ما يتجوز ...
لازم يتجوز الأول وبعدين كل حاجة تتعمل بعد كدة
والله أنا مستغربة من كمية الرجالة اللي عايزة تتجوز دي
أمال البنات عاملين أفلام عربي ليه
الواد ده بقى مشكلته كبيرة ... تقريباً تايه ...
تايه كتير يعني وبيلف ويدور حوالين كل حاجة
وصعب أوي تلاقيه بيتكلم براحته أو من قلبه

مشكلته منيلة بنيلة
محتاج واحدة بقى تبقى مقطوعاله وتاخده بالراحة كدة ع الهادي
تتكلم معاه مرة واتنين وتلاتة
لحد ما يبتدي يحس بالأمان ويهدا ويبقى على طبيعته
ساعتها هينفع يحب ويتحب ويتجوز وينبسط زي ما هو عايز
أي محاولات تانية هتبقى تكرار سخيف
للفيلم بتاع أصلي كنت فاكر اني بحبها وبعدين لقيت نفسي مبحبهاش


البيه ده بقى مشكلته مشكلة....
غاوي يقضي وقت لطيف مع البنات وبس....
دايماً متعلقة ف دراعه واحدة حلوة
وكل واحدة وبختها اللي تقعد شهر واللي تكمل تلات اشهر
والمصيبة يا جدع ان كلهم بيبقوا عارفين انه بيسرح بيهم
والعلاقة مفيهاش جد من أي نوع وقابلين وبيقضوها يعني
وتلاقيه يا ضنايا بيشتكي م الوحدة والضياع وانه مش لاقي واحدة تحبه
والموضوع حاجة من اتنين يا بيشتغلني يا بيشتغل نفسه

واحدة ايه دي اللي هتحبه وهو بيعمل علاقات بالطريقة دي
مفيهاش معنى ولا بجد ولا بتلمس معاه خااالص
ونس ونس وبس علشان ميبقاش لوحده أبداً


واحد كمان حياته سودا ومنيلة بنيلة ...
عايز ينقى واحدة جاهزة ويحولها لتفصيل
يعني يعرفها ويحبها ويتكلم معاها ويقضيها خروجات وتليفونات
وبعدين يخطبها ويغير شكلها خااالص
ويمنعها بأة تكلم أي حد لا ولاد ولا بنات
أصل صاحبتها ممكن يرجعوها للانحراف اللي هو أنقذها منه

يا نهار اسود
ولما هي كانت منحرفة خطبتها ليه يااد
انما تقول ايه ف الدماغ الصيني اللي مبتكملش اسبوع وتشيط دي


بصراحة حاجة تغيظ
طب والنبي انا قربت اتعقد م المناظر دي
وبس عشان محدش يقول فيمنست(والنبي ما اعرف معناها ايه )
ومتحيزة وابصر ايه
البنات كمان ليلتها ليلة


واحدة تقولي اتخطبت
وقبل ما الحق اقولها مبروك تقولي
عريس يعني مبحبوش ولا حاجة وعنيها تتملي دموع
طب بتعملي ف نفسك كدة ليه وانتي لسة صغيرة ع الحاجات دي


وواحدة تقولك بحبه ... بحبه أوي
وبعد اسبوع تقولي انا اتسرعت أنا مش بحبه أنا بحب التاني أبو عيون ملونة
أقولها ماشي سيبي أحمد وخدي ازداحمد تقولي ما اعرفش ... مش عارفة
أصلي بحبهم الاتنين

بقولك ايه سيبك منهم الاتنين ... شايفة هيثم اللي في الصف الأخراني ده
زي الفل خديه لفة يمكن ينفعك


واحدة تبقى متشحتفة ومتشحورة وكل ما اسألها مالك تقولي عايزة أتنيل أتجوز
وبعدين أقعد أحكي معاها شوية أكتشف انها رفضت علاء وسمير ونبيل وحسين
وكل دول في الشهر اللي فات بس وعلشان ايه مالهم
تقولي مش عارفة دمهم تقيل محبتهمش وبعدين أنا بفكر ف حاجة تانية خالص

أقولها سيبك من جواز الصالونات ده شكله مينفعكيش
واستني شوية يمكن حد من زمايلك ف الشغل أو من جيرانك يعرفك كويس
ويبقى فيه فرصة بينكم وربنا يكرم
تبص لي بقرف ... ايه ده... لأ الكلام ده كله غلط
طنط عليَّة قالتلي هاجيبلك واحد كاروهات المرة الجاية


أنا خلاص ياناس استويت
كفاية كده .... قطعوا الرجالة على الستات
وجاتها نيلة اللي عايزة خلف

يا عسكري !




كان معكم من مستشفى المجانين
أمنا الغولة
........

19 التعليقات:

Che يقول...

انا من زمان كنت مقتنع ان الراجل مش ممكن عمره يتجوز غير لما يلاقى الست اللى تجبره على كده ... احنا كرجاله بنتبع نظريه الشجره .. ماينفعش عصفورة واحدة تقف علينا و ساعات ماينفعش عصفورة تقف علينا اصلا .. بس ساعات فى غربان ممكن تقف علينا .. ماعلينا
المهم البوست يتاعك ده عرفنى انه برضه الستات اصبحوا عيال و مستنين اللى يتجوزهم ... طب كده هنعمل ايه

آية مش هنا يقول...

ههههههههه

لما قريت العنوان قلت الحمد لله مش هتجيب سيرة البنات ..
لقيتك خلصتي الرجالة و اتدورتي علينا .. ينفع يا غادة كده طب ؟؟؟

:)))

عارفة مشكلة البنات .. و الرجالة كمان .. ايه ؟؟

انهم مش عارفين هم عايزين ايه م الطرف التاني بالضبط
و لما بيعرفوا بتبقى وية احلام مثالية مش مرتبطة بالواقع

بنعيش شوية في الاحلام .. و نتعامل بتوهان مع الواقع ..

و مبناخدش قرار ..

بس اقولك

قطعوا الرجالة على الستات
وجاتها نيلة اللي عايزة خلف

:)))

وحشتيني

pink paradise يقول...

بصى بقى يا امنا الغولة الموضوع مينفعش عليه تعليق ده عاوزة تدوينة خصوصى
انابقى حسرق موضوعك و احط لينك عندى علشان انا حاسس ان الموضوع ده فيه ريحة استفزاز لمدونتى شخصيا
ادخلى وبصى كده و خلى الناس تبص
واللى ما يشترى يا تنيل
http://3wezatgawez.blogspot.com/
و اشوفك فى المعرض بكره بعد الصلاة

مياسي يقول...

والله انتي سكرّه!!

والله الجواز هاد قصه مالهاش اخر

nudy يقول...

والله يا بنتي عندك حق يجرالك اللي بيجري ده بس فعلا انا مش عارقة الرجاله والبنات اللي بيفهموا راحوا فين وليه الواحد ما بيخبطش غير في الاشكال دي
بس دول مش محتاجين عسكري دول عايزين جيش بحاله

nudy يقول...

والله يا بنتي عندك حق يجرالك اللي بيجري ده بس فعلا انا مش عارقة الرجاله والبنات اللي بيفهموا راحوا فين وليه الواحد ما بيخبطش غير في الاشكال دي
بس دول مش محتاجين عسكري دول عايزين جيش بحاله

سارة نجاتى يقول...

طب كويس أنك مولعتيش فى حد منهم , بس فيه و لاد عاوزين يتجوزوا لأن جزء من تربيتهم و نشأتهم و هم ضغيرين أن رجولتهم لن تكتمل الا لو كانوا متزوج , لأن الرجل بطبعه لا يميل للارتباط و الالتزام أوى زى البنت , و ده برده لأن البنت من وهى صغيرة حشروا فى دماغها أنها ستكون متخلفة عن ركب الحضارة و تقل مكانتها الاجتماعية للنص لو لم تكن متزوجة , عشان كده تلاقى بنات مسروعين ع الجواز عشان مش تحس بالنقص تجاه ذاتها , ولد خايف البنت تقوله ماما و لا قابل بابا , و ولد ح يتجوز على نفسه هههههه
دمك خفيف و انبسط من البوست أوى

تحياتى يا جميلة

اسماء عوني يقول...

ايون اهو كده
والله البوست تحفه
فيه امثله في بلدنا تفقع المراره
ولاد وبنات
انا قبل كده اتكلمت في بوست عن البنات
جميل البوست

msafa يقول...

هههههههههههههههههههههههههه
ضحكت بجد
حلو اوى البوست ودمه خفيف
الشباب عايز اقرب مدافن

محمد سلامة يقول...

و انتي فين من كل ده يا غادة هنقعد نقضيها سمع و طبطبة بس

ست الحسن يقول...

تشي

مبسوطة أوي انك متابعني
وعندك حق في تعليقك الرجالة والستات بقى جبنا وبيخافوا وهنجيب لهم منين بقى حد يجري وراهم ان كانوا دول ولا دوكهم...

.........

آية

انتي كمان واحشاني يا بنوته
الحكاية وسعت أوي يا آية
والخلاصة اننا فعلاً بقينا مش عارفين نعيش
سميه خوف سميه قلة إيمان
بس النتيجة واحدة ...احنا لايصين

.........

حسام

الموضوع ده في صميم موضوع مدونتك
ومستنية بوست جامد للرد عندك
والميدان واسع
والناس كلها حالتها صعبة

.......

مياسي

متشكرة يا قمراية
وفعلاً احنا بنرصد الموضوع بس ومش لقيين حلول حتى لنفسنا

.......
نودي

عجبتني حكاية جيش بحاله دي
بس والله الناس دي بتفهم بس هم متلخبطين شوية في الموضوع ده تحديداً

........

سارة نجاتي

نورتي في أول مرة ليكي هنا
والموضوع فعلاً كبير وليه زوايا كتيرة
ومقدرش أولع فيهم لأني زيهم عندي مشاكل ومش عارفة أتعامل معاها بردو

والناس اللي بحكي عنهم دول ناس قريبين مني بجد واصحابي ومش عارفة أساعدهم

........

أسماء عوني

شفتي يا ستي علشان خاطرك
كويس انك انبسطتي والنماذج فعلاً كتيرة وتوجع بجد

.......

مسافة

مبسوطة ان البوست عجبك
ووالله الناس دي تعبانة وبتعاني فعلاً
دول محتاجين بس حد يحس بيهم ويساعدهم

.........

محمد سلامة

شوف يا أخي أنا بعز الصراحة أوي
بس باين كده ان اللي بعمله في الناس هيطلع علية يا محمد

بص يا سيدي
أنا والله فكرت في تعليقك بجد
طب وبعدين وأنا فين
فاكتشفت ان جزء من رصدي للأحداث دي ومن معرفتي لأصحابي دول اني شبهم
عندي مشاكل زيهم بالظبط
يعني شوية عدم أمان على حبة إزدواجية
على شوية تجاهل للواقع
عاملينلي خلطة عجيبة بردو
تخلي أي حد يكتب عني معاهم ويقعد يضحك جامد

انبسطت أديني قعدت على كرسي الاعتراف
وحكيت
وبرغم التوريطة العجيبة دي
بس فرحت ان لسة فيه حد بيهتم يسأل
وانتي فين

نورت يا محمد

soly88 يقول...

لا تقولى بنات ولا صبيان
ولا حد فاهم حاجه

Blank-Socrate يقول...

يا سلام يا سلام
حضراتكوا عاوزين ناس سوبر
و الناس المكلكعه نوديها فين
حضرتك ناسيه اننا كمان عندنا نفس الازمه
مفيش واحدة كامله لازم كل واحدة الواحد يقابلها يكون فيها ان
بلاش اصيح للناس و اقول :)
انا اؤمن ان الحب هو اللى بيكمل
طبعا لازم يكون فى حد ادنى يوفر حياة متزنه و كريمه للطرفيين
كن لازم كل طرف يقبل سلبيات موجودة فى الطرف الاخر و صعب انها تتغير
--------------------------------
انا الشخصيه دى
مشكلته منيلة بنيلة
محتاج واحدة بقى تبقى مقطوعاله وتاخده بالراحة كدة ع الهادي
تتكلم معاه مرة واتنين وتلاتة
لحد ما يبتدي يحس بالأمان ويهدا ويبقى على طبيعته
ساعتها هينفع يحب ويتحب ويتجوز وينبسط زي ما هو عايز
أي محاولات تانية هتبقى تكرار سخيف
للفيلم بتاع أصلي كنت فاكر اني بحبها وبعدين لقيت نفسي مبحبهاش

لو سمحت متقوليش قطعوا الستات
لانى فيهم حببتى اللى لسه ماعرفهاش
و طبعا فيهم ست الحسن
:)

Ahmed يقول...

الجميل بالموضوع إن كل واحد من الأمثلة اللي إنت قلتي عليها ممكن اوي يلاقي البنت اللي يناسبها وتناسبه ..

الجميل بالموضوع إن كل بنت وليها عقدها وكل واد وليه عقده .. بالآخر اللي يخلي الناس حلوة مع بعض هو إن الحاجات السلبية اللي هنا وهناك تركب على بعض وتبقى متوافقة .. زي البازل كده ..

أنا بحب الناس اللي عندها غلط .. الناس اللي مش كاملة .. بحس إن الإنسان الكامل هو الإنسان المؤلف من إنسانين .
أنا واللي بحبه ..
:)

آدم...أول الخلق يقول...

من غير تريقه الزمان اللى احنا فيه مش محتاج غير كده ان كل واحد يستنى اللى يجي لعنده
الموضوع بجد تحفه وعنوانه جامد بصراحه
ودمتم سالمين

ست الحسن يقول...

soly88

أهلاً بيك في أول زيارة للمدونة
وفعلاً الموضوع بقى صعب ويخوف وانا معاك ان كلنا مش فاهمين .. بس أدينا بنحاول

نورت يا افندم

....

مينا

طيب أنا معترفة إننا كلنا عندنا مشاكل ومقصدتش أقلل من أصحابي بس هي الحكاية جابت معايا على كوميديا

وكويس انك لقيت نفسك وسط الناس اللي انا كاتبة عنهم وبحبهم
وانا قولتلك الحل ...
بص البنات اللي بيفهموا مش قليلين زي ماانت فاكر
أكيد واحدة بتفهم وبتحس كويس هتعرف تقرب منك وتحبك
بس ساعتها متنسانيش وابقى فرّحني

ومعلش آسفة يا سيدي ربنا يخلي الستات
وكفاية كده دلع في ست الحسن لحسن أمنا الغولة ابتدت تغير

....

أحمد

طبعاً كل واحد وواحدة ليهم اللي بيكملهم .. ومفيش حد فينا مفيهوش عيوب أو معندهوش مشاكل
بس هي الصعوبة بتبقى في ان الواحد فعلاً يقابل الشخص اللي يكمله

نورت يا أحمد

.....

آدم

أهلاً بيك في أول زيارة
ومبسوطة ان العنوان عجبك
بس لو كلنا استنينا ان الناس تجيلنا لحد عندنا يبقى محدش هيتحرك في أي اتجاه

عموماً المكتوب ممنوش مهروب

نورت يا افندم

مي كامل يقول...

هيييييييييييييييه دنيا
محدش بياخد اكتر من نصيبه
لا بس بوست في الجون
D:

sara rabie يقول...

ههههههههههههههههه

يا شيخه..محدش عجبه حاله

بس العجيب ان كل واحد دماغه مريحه ومنسجم

فا طلعيهم من دماغك..

او اجرى على القسم بقى ..اسحبيهم من أفهم..يمكن يعقلوا


حونينه انا صح..




بصى بجد..الفكره ان محدش عارف نصيبه هيجى فين ومع مين..ومحدش صابر ان كله باوانه
بااااااااااااااااوانه

يعنى وقت ما يريد ربنا..

الدنيا سهله اهى..شفتى
:)))

غير معرف يقول...

وتقولى ايه على اللى كان مرتبط ببنوتة بجد لو اتكلم عن ادق تفاصيلها واصغرها محتاج للسبع مجلدات حاجة كدة أجمل من ان الواحد يتكلم عنها وكنا مرتبطين ببعض اوى بس للاسف هى فين دلوقتى ؟؟؟ ادعيلها ربنا يباركلها فى زوجها ويحببهم ببعض ويعيشوا حياة كريمة يارب بس واهى الحياة ماشية ومافيش حد بيموت ورا حد بسممكن يكون فى حد بيفتقد حد وانا اسف انى طولت عليكى بس بجد كتاباتك جميلة جدا (وانتى بتفكرينى بأحلام مستغانمى) الكاتبة الجزائرية عايزك تاخدى بالاسباب وان شاء الله تكونى احسن بنت فى الدنيا اوعى تنسينى من الدعاء