السبت، 21 أغسطس، 2010

النتيجة .... حسب الحظ



.



.

عايزة أكتب حاجات كتيرة أوى

ومش عارفة ابتدي بإية

المدونة وحشتني أوي
والناس اللي بيدخلوا هنا كل فترة ومش بيلاقوا تدوينات

حقهم عليَّ ... معلش
الفترة اللي فاتت كانت زحمة وغريبة شوية

ياااه بقالي كتير مفتقدة الإحساس ده
اني أكتب وانا مش عارفة انا هكتب إيه أصلاً
مفتقدة البراح الموجود هنا

نَفَس طويييييييييييل
ونقول بأة

لو افترضنا فرضاً جدلياً ما
مثلاً انه متقدم لي عريس
الكلام ده محصلش
بقول مثلاً
وافترضنا مثلاً

انه كويس وطيب وابن حلال وإنسان كدة وانا مستريحاله

هتبقى شجاعة مني ولا جبن لو وافقت أتجوزه ؟
يعني انا كدة أبقى عِقلت وبطَّلت أضيع الفرص

ولحقت نفسي وفقت من وهم الحب الخيالي اللي انا عايشة فيه

ولا ابقى خنت أحلامي وتخليت عنها

وفقدت إيماني ببكرة واستسلمت للواقع

أبقى أنهي واحدة فيهم بالظبط ؟

طيب سؤال كمان
هوة الحب ده مش ليه أبواب كتير

أنا عارفة منهم شوية بس مش عارفاهم كلهم
ايه اللي يمنع يعني اني أحب الراجل ده بعد شوية بطريقة تانية خالص ؟
ولا ده الكلام الخايب اللي بنصبر بيه نفسنا

لما نكون عارفين اننا بنختار اختيار صعب وبنتنازل عن أحلامنا

مش عارفة
ساعات بتبقى كل الحاجات بتساوي بعض
بس انا مش هاكدب
لو اتحطيت في الموقف ده مش هاكدب
هيبقى فاهم كويس اني بستريح له وبستلطفه وباحترمه وبس
هيبقى عارف اني مش بحبه
أنا مش بتاعة أفلام وحوارت

ومش هعرف أكدب حتى لو حاولت

بيبان علىَّ أوي
الناس بتكتشف مشاعري مجرد ما تبص ف وشي
صحيح كدة تبقى فضيحة
بس فضيحة جميلة
عموماً لسة ما سببتش مشاكل
لإن الناس غالباً مبتصدقش اللي بتشوفه وبتحسه


ماعلينا
رمضان بيخليني أفكر في حاجات بعيدة وبيقلب مشاعري بقوة
بيفكرني بالدروس اللي أخدتها في حياتي

ولسة بحاول أفهمها لحد دلوقتي

مثلاً لما كنت في الكلية كانوا كل زمايلي بالنسبالي عيال
حتى الدفعات اللي أكبر كنت بعتبرهم عيال
مش عارفة ليه
جايز علشان عقدة إلكترا بتاعة التعلق بصورة الأب
وجايز كنت شايفة نفسي بفهم وهم تافهين شوية
المهم اني كنت باديهم سكة على طول للسبب ده

وبعدين بأة كان لازم أعرف غلطي
علشان أكبر واتربَّي وكدة يعني
وعلى رأي ماما
اللي مربهوش أمه وابوه
تربيه الأيام والليالي

جزء بأة من إعادة التأهيل والتربية

اني أقع في حب أولاد أصغر مني في السن
والعجيب بأة اني ابقى شايفاهم بيفهموا جداً

وعندهم تجربة ووجهة نظر في الدنيا

الأغرب بأة انهم يبقوا حابني برده
ومش شايفني طنط بأي شكل من الأشكال

الكوميدي بأة
ان كل الولاد اللي بقابلهم دلوقتي فوق التلاتين

بيبقوا عايزين يتجوزوا بنت متزيدش عن 26 سنة
وانا بالنسبالهم كبيرة خالص وفاتني القطر

الأولاد بقى اللي تحت التلاتين عايزين يحبوا ويتجوزوا
وانا بالنسبالهم مناسبة جداً وست الحسن ورمانة الميزان وكل حاجة حلوة
ومسألة السن دي تفاصيل محدش بياخد باله منها أصلاً

المهم
فيه وقت بيمر لما الواحد يبقى جوة الحب
بيبقى شايف الحياة جميلة
مسألة فرق السن دي بتبقى حاجة مش مهمة
لإن الزمن نسبي وهو نسبي فعلاً
وبتبقى التجربة هي الأهم
والحب الذي لا يمكن تكراره أكثر أهمية من كل حاجة تانية
بعد وقت بيبان بقى تأثير الحدوتة دي

زي مثلاً انه انتي دايماً اللي بتقولي هنتقابل الساعة كام وهنروح فين
وانتي اللي بتتصلي وتسألي وتقولي كل الكلام الحلو
انتي مسئولة بالكامل عن اتجاه سير العلاقة
حاجة تقرف يعني
شوية بأة وتبتدي تحسي انك ماما بقى
وانك هتقعدي تطبطبي وتدلعي على رأي الست نانسي
وان الموضوع ده من طرف واحد
عادي يعني
مش انتي الكبيرة وفاهمة يعني انه بيحبك
أومال يعني بيضيع وقته - الغالي- معاكي ليه
وعايز يتجوزك ليه
مش كان قالك مرة كدة انه بيحبك
انتي طماعة أوي على فكرة

تصوري بأة كل الأفكار اللي بتعدي جواكي
زي انه بعد كام سنة هتعجزي وهو هيبقى لسة صغير
سلو بلدنا كدة الستات بتعجز بدري في البلد دي
نصيبهم بأة

الأفكار بتاعة انك عايزة تتجوزي حد أصغر منك
علشان تسيطري عليه وتمشيه بمزاجك
ودا أصلاً لو ينفع يحصل هيبقى ممل وسخيف جداً
لإنك كدة هتبقى انتي اللي شايلة الليلة
وبما انك طول عمرك شايلة الليلة
ف هيبقى من نفسك مرة تحسي انه فيه حد مسئول عنك
حد متخافيش من حاجة وانتي معاه

وطبعاً دا خيال علمي انا عارفة انه ده صعب يحصل
لإني أصلاً شخص مستقل والرعاية مربوطة في حبل واحد مع التحكم
صعب ألاقي حد يعرف الفرق

المشكلة بقى انه كل الناس هتسأل
ليه بأة اتجوزتي واحد أصغر منك
صحيح الأسئلة هتبقى ليه هو أكتر
بس الناس هتضحك علينا جامد لو كانت الإجابة
أصلنا بنحب بعض أوي

المهم انه الناس بتفتكر انه المشكلة الأكبر عند الراجل
لو اتعامل عادي مع فكرة انه يتجوز واحدة أكبر منه يبقى خلاص
مفيش مشاكل

محدش بيفكر في الست
محدش بيتصور انها عندها مخاوف هي كمان
وانها مش عايزة تكتشف في يوم من الأيام انها اتجوزت عيل
وانها جابته لنفسها لإنه مش قادر يحس ويفهم حاجات كتير
حاجات محتاجة زمن وعُمر وتجربة علشان تتفهم

كل صاحباتي اللي متجوزين رجالة أصغر منهم شوية
مبسوطبن ومطمنين
وربنا يسعدهم
بس يعني فرق السن مش بيبقى عالي
سنة ولا اتنين بس مش أكتر

مرة أخويا جه قالي انه رايح فرح واحد صاحبه
وان العروسة أكبر من العريس بخمس سنين
أول سؤال سألته

ليه متجوز واحدة أكبر منه ؟
بيحبها ؟

الإجابة كانت لأ
وانه كان معشمها بالجواز وجارته ومضطر يبقى قد كلمته وكدة
المهم انه حياتهم كانت صعبة أوي
هي على طول بتتخانق وبتتهمه انه مبيحبهاش
وهو على طول شايفها عصبية زيادة ومجنونة وبتزعل من حاجات صغيرة
الحمد لله اتطلقوا بدري بدري
وكل واحد لقي نصيبه مع حد تاني

ما علينا
الزمن نسبي فعلا
ومفيش قاعدة الواحد لو مشي عليها ممكن يوصل
وانا لحد دلوقتي بقابل ناس أكبر مني بسبع وتمن سنين

وعيال بردو عاااادي جداً
الرجولة عمرها ماكانت ليها علاقة بالسن

الزمن نسبي
وكل علاقة وليها ظروفها وحكايتها
ومش كل الناس تقدر تبقى شجاعة وتصدق مشاعرها

وبعدين ساعات بنبقى راسمين صورة لنفسنا بعيدة عن الحقيقة
التجربة بس هي اللي بتقول احنا مين فعلاً

ربنا يستر وما اطلعش بعيدة أوي عن تصوري لنفسى
مين عارف

ربنا كريم





......

8 التعليقات:

مروة يقول...

غادة
اكتبي كتير وإنت مش عارفة هتكتبي إيه
...
عاجباني قوي وحاساها قوي
أكيد الكريستالة الغالية هتلاقي اللي يقدر قيمتها ويحسها زي ما هي،ويخليها تتأكد إنها نفس الصورة اللي هي راسماها ويمكن أجمل بكتير
:)

بحب الحكومة يقول...

ربنا كريم

قهوة بالفانيليا - شيماء علي يقول...

وحشتيني :)
إزيك يا غادة ..؟؟
بشكل عام ..
الحب مالوش قواعد ..
بس اهم حاجة انه مايبقاش مدفوع بالمغامرة بشكل كلي :)
الحب مهم ..
بس ممكن جدا نقضي عمرنا كله مستنيينه بصورة مختلفة عن الصورة الحقيقية له .. و نبقى ضيعنا الفرص الحقيقية في الحياة عشان حلم .. احتمال الوهم فيه أكبر من احتمال الحقيقة .
ربنا يكرمك يا غادة ..
و يطمن قلبك .. و ييسرلك أمرك كله.

Marwa Mohamed يقول...

حلوة قوى و انا حاساكى جدا و متفقة مع مروة جدا جدا :)

ست الحسن يقول...

مروة

بجد تسلمي
لمستي قلبي
ربنا يخليكي يا قمرة

وشكراً ع الحضن الجااامد ده


..........

هاني

ربنا كريم فعلاً

يسلم لي مرورك الجميل

.......

شيماء

عندك حق
محدش عارف بالظبط أنهي الحلم وأنهي الوهم
وانتي كمان واحشاني

وكل سنة وانتي طيبة
رمضان كريم

تسلمي يا شيماء

......

مروة

تسلمي يا قمرة
ربنا يسعدك ويفرحك ويطمنك

...

مؤنس فرحان يقول...

عارف أنا الشعور دا .. لما الواحد يغيب عن المدونة وحاسس ان جواه حاجات كتير يطلعها وكلام كتير يكتبه ويبقى موش عارف يبدأ بإيه ولا ايه .. هو عايز يفضفض عشان يستريح
--------------------

هو مبدئيا موضوع الجواز حاجة صعبة خالص مالص .. من وجهة نظرى عالأقل أو يمكن أكون أنا معقد

نماذج كتير شوفتها أثرت فيا بالسلب .. لإما اتطلقو لإما عايشين مع بعض وموش طايقين بعض لإما نظام أهى عيشة وخلاص عشان الأولاد والناس تقول ايه

و موضوع الطلاق هو أهون حل طبعا وفعلا ساعات كتير بيلاقو نصيبهم مع حد تانى ويعيشو مبسوطين

لكن اللى بيكملو مع بعض بداعى الأولاد وكلام الناس .. دوول حكمو على نفسهم يعيشو فى عذاب .. طالما اكتشفو انهم موش مناسبين لبعض لأى سبب
--------------------------

بالنسبة لموضوع فرق العمر .. فطبيعى ان انا بأدور على راحتى
على سعادتى .. ففى أولويات قبل موضوع العمر هى أكبر منى ولا أصغر منى ... الأهم انا وهى حانعيش مع بعض مبسوطين مستريحين
حانتفاهم مع بعض .. حانستوعب بعض

لو دا حسينا انه موجود يبقى اكبر واطول واصغر دى موش فارقة

بالنسبة للسؤال بتاع .. هو فلان ليه اتجوز واحدة اكبر منه ..؟؟
أظن ان هو ماكانش بيدور على واحدة أكبر منه .. ولا هى كانت بتدور على واحد أصغر منها .. هما كانو بيدورو على شخص يستريحو معاه يحبوه ويبقى جزء منهم

جا النصيب انه أكبر أو أصغر .. أكيد هو مالقاش اللى عايزه فى واحدة أصغر منها
وهى شرحه
يمكن لو انتظرو شوية كانو لقو ويمكن ماكانوش قابلو حد
فى الآخر هو قدر و نصيب

ارتباطات كتير بتتفشكل بسبب .. انها أكبر منه
انه تخين
انها تخينة
انها أطول منه
انه أصلع
الخ

وكلها أسباب تعل و تشل .. ودا بالنسبة للى بيسمعها .. لكن بالنسبة لأطراف الموضوع فهى شئ عادى و طبيعى .. هما موش بيدورو على جواز وسكن وحب و رحمة .. هما بيدورو على منظرة

.. بنات خالتى حايقولو ايه لما يشوفو عريسى تخين ولا اصلع .. واصحابى حيقولو ايه لو لقو عروستى اطول منى ولا اكبر منى

غير معرف يقول...

انا اول مره اجي النواحيدي بس اتبسطت قوي لقتني ولقيت ناس كتير اعرفهم وقفتيني قدام مرايا بخاف منها قوي لانها بتوصلني لفكره واحده طب و بعدين ما كلهم عيال و التانيين ما ينفعوش طيبيعني انا هفضل لوحدي و لو فضلت هل يا تري هكون سعيده ولا هندم علي اللي ضيعته من عمري و الحجات و الشعور السخيف ده ..ميرسي يا غاد انك واجهتيني بنفسي و خلتيني افكر فيها بعمق كمان و كمان

ست الحسن يقول...

مؤنس
إيه الونس الجامد ده
والتعليق الدافي أوي اللي ف مكانه
عامل إيه
ازيك

انبسطت أوي من تعليقك
ونورلي جامد
وفرق معايا أوي

تسلم وتعيش
ربنا يخليك فرحان دايماً


....

غير معرفة

تسلمي
وتعالي بعد كدة على طووول

أهلاً بيكي دايماً