الاثنين، 9 مارس 2009

يا ولاد ... كلكم معزومين في حفلة توقيع الديوان

.






بصوا بقى حفلة توقيع الديوان يوم السبت 14/3
الساعة 6.30
في متحف محمود مختار - أمام الباب الخلفي لدار الأوبرا - بجوار نادي القاهرة
على بعد 10 خطوات من محطة مترو الأوبرا

ومفيش حجج كل الناس ضروري تنورني هناك



وانتوا عارفين حفلات التوقيع
ياإما الواحد يروح يجامل أو يروح يتفرج
وانا بصراحة من النوع اللي بيروح يتفرج آه يعني اكدب

أفضل حفلات التوقيع اللي رحتها هي الحفلات اللي دمها خفيف
والأديب أو الأديبة ميبقوش متنشيين وبدل بقى
وفساتين وحاجات من دي
أحلى حفلة رحتها
كانت حلوة لأنه كان فيها حالة حب وتضامن واضحة جداً

أنا عايزة كل الناس اللي بحبهم واللي بيحبوني حواليا
عايزة أتونس بيكم ... فاهمين

فرصة بقى لكل المعجبين ... هه حفلة توقيع ومحدش هيكتشفكم
وكل البنات القمرات والولاد الجدعان .... فرصة تتعرفوا على بعض بردوا
وبعدين المكان شاعري والهوا اليومين دول يوجع القلب

يعني لو مش ناويين تقروا الكتاب
ومش مهتمين تشوفوني وانا لايصة وتايهة ع المنصة
تعالوا قا بلوا بعض وقضوا وقت لطيف
وممكن يبقى فيه شيكولاتة وفيه إشاعات بتقول بيبسي

يعني فسحة جميلة خالص
محدش يتأخر.... المكان بيقفل الساعة 10
وانا عايزة ألحق أقعد معاكم أكبر وقت ممكن


مستنياكم يا حلوين

.. .......


آه بالمناسبة ... اللي هتشوفوها هناك أمنا الغولة علشان محدش يتفزع
ست الحسن مبتتكشفش على حد



...............

14 التعليقات:

عالمى ازرق يقول...

الف مبروك ياغادة
ويارب تكونى دايما بخير وسعادة

nudy يقول...

والله يا بت يا دودو انت عليك حاحات قال ايه بيبسي وشيكولاته واحنا برشه بتوع الكلام ده بس يا ريت تقولي الشيكولاته ح تكون مع مين علشان اعمل حسابي

الف الف مبروك يا شت الحسن يا جميلة

علي فكرة اوعي حد يصدق ان امنا الغولة ح تكون موحوده انا حاحبسها في اليوم ده و ح اطلق سراح ست الحسن اصل انا معايا المفتاح السحري

اشوفكم هناك

محمد سلامة يقول...

شيكولاتة إيه و بيبسي إيه بس يا ماما
هو انتي عازمه أطفال
إحنا ناس ما يمشيش معاهم الكلام ده
أقل من فتا و لحمه ضاني مش جي
و ده أقل واجب تعمليه معانا في يوم زي كده
مش كده برضه ؟
ألف ألف ألف ألف ألف ألف ( هما كده يبقوا كام . مش مهم ) ألف ألف ألف مليون مبروك يا ست الكل

بسمة يقول...

مبروك مبروك مبروك

كمان مبروك

انا بقى عايزة حقي ناشف :)
لا شيكولاتة ولا بيبسي..انا عايزة الكتاب ويكون موقع كمان

هه

مياسي يقول...

ألف ميروك يا غاده يا ست الحسن

لا امنا الغوله مالهاش مكان هون؛ بس ست الحسن موجوده

كتير كنت حابه أحضر التوقيع؛ كان حيكون أول توقيع أحضره في حياتي بس ما باليد حيله

رح أستنى نسختي موقعه منك؛ بلكي وصلتني ريحة التوقيع من مصر لحد هنا

مبروك إلك كمان مره؛ ومنها للأحسن منها ان شالله:)

hasona يقول...

السلام عليكم ورحمة الله وبركاته

ألف مليون مبروك
مبروك أ/ غادة
وفي راوية أخري ( ست الحسن ) وفي رواية ضعيفة ( أمنا الغولة)ههههههه
مبروك وان شاء الله نري لك الكثير والكثير من الاعمال والمشاركات
،،،،
بودي حضور هذا الحفل
لكنها ظروف العمل تمنعني
ولكني فرحان جدا
لأني متأكد انك ستضعي الحفل في بوست مستقل
لنشاركك كلنا الفرحة

ونري ونسمع ما كنا نتمني أن نراه بأعيننا
تمنياتي لك بدوام النجاح والتوفيق

تحياتي

soly88 يقول...

والمصحف لاجى

ست الحسن يقول...

صاحبة العالم الأزرق الدافىء

الله يبارك فيكي ومستنياكي يا قمراية
ولو معرفتيش تيجي ع الأقل اقري الديوان

............

نوديييييي

محدش يقدر يحبس أمنا الغولة لمؤاخذة دي تجيبها عاليها واطيها وتحبسنا كلنا
بس أنا عارفة انك معاكي المفاتيح السحرية كلها
ربنا يستر ويعدي اليوم ده على خير

..........

سلامة

فتة ولحمة ضاني
ابقوا فرقوها على روحي بقى

الله يبارك فيك يا محمد
ومنتظرينك يا افندم

.............

بسمة هانم الشهيرة ببيسو بسابيسو

بس انتي تنوري المكان وتيجي واللي تأمري بيه مجاب يا افندم

...........

مياسي الجميلة

علشان خاطر عيونك هكتب لك كل اللي حصل قبل التوقيع وأثناءه وبعده
وبس مستنية أخلص من دوشة التوقيع وأبعت لك نسختك فوراً يا جميلة

تصدقي
كان نفسي تكوني موجودة
أوي

.........

حسونة

متشكرة أوي على تهنئتك الجميلة
وان شاء الله هحكيلكم ع اللي حصل كله
ويارب تقرا الديوان ويعجبك

.........

سولييي

وانا مستنياك يا افندم
تشرف وتنور

.......

Blank-Socrate يقول...

غادة انا هاكون فى المنيا و هأوصل القاهرة بعد 7
هاوصل عندك بعد 7:30
يا ريت هند ما تمشيش لان حضرتك هتكون مشغوله و مش فاضيلنا
اول مرة واحد مشهور هيكتبلى اهداء
:)

تأبط قهراً يقول...

متأككككد اني كتبت كومنت هنا من كم يوم !!!!
راح فين ؟؟؟

الف مبروك ياغادة والله نفسي احضر بس صعب
ياريت يكون في بث مباشر من موقع الحدث هههه

Soooo يقول...

الف الف مبروك ياغاده
ان شاء الله هيكون يوم حلو والديوان بتاعك ان شاء الله هيفرقع ويعمل زيطه وزمبليطه وحاجه ايييييييه .. ضرب نار للصباح الباكر يعني

وربنا يسهل واجي واشجعك واقعد اقول غاده غااااده .. أووو اووو




سلامووووووووووووز

ست الحسن يقول...

مينا باشا

أولاً مين دي اللي هتبقى مش فاضيالك
تعالى انت بس ونفضالك يا افندم
وبعدين مين المشهور ده اللي هيعملك إهداء
دا انا كل اللي يعرفوني عشرة بالظبط وعلشان الحلفان يبقوا 14

توصل بالسلامة يا افندم

.........

تأبط قهراً

حصل خير يا افندم
والله يبارك فيك
وان شاء الله يبقى فيه بث غير مباشر بعد انتهاء الأحداث بسلام

ربنا يستر

..........

سو يا سوووو

تنور يا افندم
بس بلاش ضرب نار كفاية بس حضرتك تنورنا

ومش عايزة الديوان يفرقع ... طالبة من ربنا بس ان الناس تقراه
بس كده

يارب يعجبك يا احمد

Blank-Socrate يقول...

كانت تجربه جديدة
انا من خلال المدونه كونت فكرة شخصيه عنك
لكن من خلالى انا
يعنى كونت من مكعبات تدويناتك شخصيتك برؤيتى انا
لكن بالامس اذهلتينى و عرفت ان لسه فى لوحات انسانيه رائعه باتعرف عليها
انا كنت منهمك جدا ان ارصد و اراقب تعبيراتك الشخصيه المملوءة بالوداعه و البساطه
الف مبرووووووووك
فخور بيكى
و ربنا يوفقك

ست الحسن يقول...

مينا الجميل

وجودك فرحني جداً
وكنت محتاجة أقعد واتكلم معاك أكتر

بس بجد أنا متشكرة أوي على مساعدتك ودعمك لي
والكلام الجميل اللي بتقوله طالع منك لأنه جواك أصلاً

ربنا يخليك يا مينا
ويسعدك

وان شاء الله هشوفك تاني يا افندم

...........