الخميس، 6 يناير، 2011

ضلمة ..... نور بعيييد





.

النهاردة واحدة صاحبتي اتصلت بيَّ
وقالتلي انها بتدخل ع البلوج كل يوم وتقعد تقرا
دا معناه انها بتدخل كل يوم ومش بتلاقي حاجة جديدة

بس أنا مش قادرة أكتب حاجة جديدة

لإن كل اللي هكتبه هيبقى غامق وكئيب
السنة ابتدت بداية كحلي وانا مليانة خوف ووجع زي كل الناس
أكتب ليه بقى عن حاجات عايشينها ومستحملينها غصب

أكتب ليه عن كل ده ؟

علشان أأكد وجوده ولا علشان أحاول أستحمله
ما احنا شاربين المر وساكتين

علشان كدة مش عايزة أكتب
علشان كل الأسى ده ميبقاش عريان كدة ومكشوف
الإحساس بالعجز مؤذي جداً
لما الدنيا بتنهار حواليك وانت تقريباً ملكش أي لازمة
ومش عارف تعمل حاجة خالص

تبقى الحياة عبء
بتحاول تبلعها كل يوم الصبح
زي برشامة مُرَّة وإجبارية


من يومين كتبت حوار جي من المستقبل بيني وبين حفيدتي
ولما حسيت انه غامق قفلته
وبعدين بدأت أضحك لإن حفيدتي دي أصلاً خيال علمي

مش عارفة أعمل إيه
كل البنات والستات اللي جوايا يأسانين ومنهكين ع الآخر
كل اللي عايزينه انهم يناموا من غير أحلام مرعبة
بس كدة
وطلبهم السري انهم ميصحوش تاني

هوة ينفع ست الحسن تبقى ضعيفة وتعبانة كدة
طول عمرها بطلة للحواديت
مش سهل عليها انكشاف الوجع بالشكل ده
هتعرف تبقى بطلة ازاي تاني
وهي مش قادرة تساعد نفسها


ما علينا
حتى لو مكتبتش الكلام ده
وحتى لو منشرتوش واتبريت منه

هيفضل جوايا زي ماهو
لحد ما ربنا يحلها ويبعتلنا نور من عنده



..................




من المستقبل بعد 40 سنة مثلاً

هوة انتم شفتم حاجة من اللي احنا شفناه
دا احنا جت علينا أيام كنا بنخاف ننزل الشارع منرجعش تاني
تنفجر فينا قنبلة
أو سواق أتوبيس يفرغ فينا الرشاش
أوماس كهربائي يولع المكان باللي فيه

أبسط حاجة اننا كنا بنتأذي كل يوم في اشارع

وكنتم ساكتين ليه يا تيته على كل ده

في الزمن ده كنا كلنا تايهين
وكارهيين حياتنا ومش لاقيين مخرج من أي حاجة

مفيش شغل ومفيش جواز يادوبك بنلاقي ناكل
تصوري

ومسبتوش البلد ليه وسافرتوا

مكنش ينفع
السفر ده كان لازمله إجراءات كتييير
والقرار ده مكنش سهل زي دلوقتي

ده كان معناه انك تتوحد في بلاد غريبة
غالباً هتتهان فيها برده وتتبهدل


واستحملتوا كل ده ازاي

مش عارفة والله ما انا عارفة استحملنا ده كله إزاي
بس الكلام ده استمر وقت طويييل
لحد ما الثورة قامت




..........

9 التعليقات:

nudy يقول...

غادة جايز تكون الدنيا اغمق من اللازم الايام دي لكن ربنا لسه موجود معانا في قلوبنا وسيجعل لنا مخرجا
يمكن نكون دلوقت في مرحلة انهيار لكل شيء بس ثقي ان ده معناه ان بعد كده ح يكون فيه بناء جديد اقوي بكنير من اللي فات ويستحمل اكتر
انا حلمت حلم من قريب كان في انهيار بس انا بعد ما وقعت قمت وعديت الطريق رغم ان العربيات كانت ح تدوسني لما وقعت لكن حاولت وقمت وانتي كمان صدقيني يا غاده ح نعدي كل ده ان شاء الله وانا باكتب لك الادان ادن شفتي بقي الفال
فرجه قريييييييييييييييييب ان شاء الله

Unique يقول...

ولحد ما الثورة تقوم؟

تايه وحيرانة يقول...

ثورة سعيدة :)

rania يقول...

عسل خالص التفكير في الحفيدة دا يا غادة .. بجد أضحكتيني فعلاً... ربنا يرزقك أجمل زوج و أولاد و أحفاد و تعيشي لما تحكي لهم حواديت الأرانب و الدببة و البالونات

rania يقول...

عسل خالص التفكير في الحفيدة دا يا غادة .. بجد أضحكتيني فعلاً... ربنا يرزقك أجمل زوج و أولاد و أحفاد و تعيشي لما تحكي لهم حواديت الأرانب و الدببة و البالونات

rania يقول...

عسل خالص التفكير في الحفيدة دا يا غادة .. بجد أضحكتيني فعلاً... ربنا يرزقك أجمل زوج و أولاد و أحفاد و تعيشي لما تحكي لهم حواديت الأرانب و الدببة و البالونات

ذكريات البحر يقول...

بصي ياغادة انا علطول متعودة ادخل اخد باور من كلامك ,تفائل من ست الحسن اللي متعودين عليها بطلة روايتنا, حودايت كل بنت فينا,حلمنا ببكرة يبقى احسن,ودايما بعد كل ضيق فرج,ممكن يكون ابتلاء من ربنا وان شاء الله هيعدي
وأحب اهدي لك كلمات العبقري صلاح جاهين
ساعات أقوم الصبح قلبي حزين
أطل بره الباب ياخدنى الحنين
اللى لقيته ضاع..
واللى اشتريته انباع
واللى قابلته راح وفات الأنين
وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع ان مش كل البشر فرحانين
حبيبى سكر مر.. طعم الهوى
فرق ما بيننا البين ماعدناش سوا حرام عليك يا عذاب
نبقى كدة اغراب
ده البعد والله جرح من غير دوا
آدى اللى كان.. وادى القدر والمصير
نودع الماضى و حلمه الكبير
نودع الأفراح
نودع الأشباح
راح اللى راح ماعدش فاضل كتير
ايه العمل فى الوقت ده يا صديق
غير اننا عند افتراق الطريق
نبص قدامنا
على شمس أحلامنا
نلقاها بتشق السحاب الغميق
وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع إن مش كل البشر فرحانين

ست الحسن يقول...

هند

ان شاء الله الدنيا هتبقى أحسن
ولو انها بتغمق أكتر
بس ما علينا
ان شاء الله خير


........

يونيك

لو كنت أعرف كنت أقول على طول


...

تايه وحيرانة

وانت من أهله

...

رانيا

كويس انه حد لقى هنا حاجة تضحك
دي حاجة حلوة

تسلمي يا رانيا


..

ذكريات البحر

شكراً لوجودك هنا
أوي
بجد فرقتي معايا جداً
والأغنية كمان بحبها خااالص

تسلمي يا جميلة

...

مؤنس فرحان يقول...

لحد ما الثورة قامت

;)

إن شالله خير دايما والوضع حايبقا أحسن ان شاءالله