السبت، 10 يناير، 2009

reflection






مش عارفة أكتب عن إية ....
بس عندي رغبة اني أكتب حاجة جديدة

يمكن عن الست التعيسة جداً اللي هربت من الوحدة للرسم
ولما اتورطت في الرسم أوي اتردت للوحدة تاني

ولا أحكي عن الراجل اللي طول عمره بيعدي الحاجات
عمره ما وقف وقال مش قااااادر ... تعبت أنا محتاج أتكلم
والنهاية انه وقع من طوله ... ممرور ومريض

أكتب عن أختي التعيسة جوة شغل مبينتهيش ...
مش سايب لها وقت تنام حتى
ولا أكتب عن الأحلام الغريبة اللي بصحى منها بنهج وموجوعة أوي

هاكتب عن الاكتشافات الجديدة ف حياتي
لأننا في الشتا وف يناير تحديداً
فتقدروا تقولوا ان المطر بيغسل قلبي بشويش .... فبشوف

طول الوقت كان عندي تصور عن نفسي اني مليانة تفاصيل
وراسي هتنفجر من الأفكار الكتير عن كل حاجة وعن أي حاجة
وكنت شايفة ان الزحمة دي بتلخبط الناس
فمتخليش حد يقدر يشوفني مظبوط
تحديداً كنت بحس اني مش مفهومة خالص
فكنت بعمل ايه

ببساطة كنت بحاول أشرح نفسي
( أنا خايفة ... الموضوع يقلق لأنه بيفكرني بكذا وكذا .... أنا مش مطمنة
أنا .... أنا .............أنا )
اللي كان بيحصل اني كنت بقول أو بوصف مشاعري فعلاً
وساعات بشرح أسبابها
بس عمر ما الحكاية دي فرقت مع حد

يعني حد أقوله مش مطمنة ... يبتسم بتحفظ ويقولي متقلقيش
وواحد أحكيله من قلبي ... يقولي انت بتستخدمي عقلك
كويس بس فين مشاعرك
مكنتش بفهم ليه الناس بتتصرف معايا كده
يعني ليه
.
.
بعدين
اكتشفت اني في الحقيقة مش بدور على الفهم
أنا بدور على الإحساس ...
وكلنا محتاجين حد يحس بينا أكتر من إنه يفهمنا
ولما منلقطش مشاعر اللي قدامنا ...
عمر أي كلام يقولوه مابيفرق معانا

يعني
أنا كنت بحاول أشرح نفسي
مش علشان حد يفهم - زي ما كنت متصورة-
ولكن علشان أستخبى ورا الكلام

أنا بخاف من مشاعري .... أوي
بخاف لأنه بيبان علىَّ جامد ....
ساعات بابقى مكسوفة منها وساعات بابقى مرعوبة منها
وساعات الاتنين مع بعض
ولأني دايماً بدور عن منطق ورا الحاجات
فكان سهل علىَّ اني أستخبى ورا تنظيرات سخيفة

كمان مختش بالي
ان المرة الوحيدة اللي كنت محسوسة أوي من حد
ومتشافة زي ما انا ...
كان الحد اللي عمري ماشرحت له نفسي
ولا اهتميت أصلاً أنا هابقى مين بعنيه
ولا سعيت لعلاقة معاه خاااااالص

بس أنا متلخبطة
وحاسة اني بجيب مرايا واعكس الشمس في وش اللي حواليا
واقولهم شفتوا الشمس حلوة ازاي
ولأن الشمس بتبقى قوية ومركزة
فاللي بيحصل ان الناس بتتضايق وتغطي عنيها

بينما لو سبتهم من غير أي حاجة
بعد شوية هيتدفوا ويحسوا بالشمس بجد
بينما اللي ميقدرش يحس بيها لوحده
عمره ما هيقدر يحس بيها باتباع إرشادات أو كتالوجات شرح

الدنيا أبسط من تصوراتي عنها
الناس بتحس بينا .... لأنهم بيحسوا بينا
بس
لا احنا ولا همَّا لينا دخل في الموضوع ده



...........
،

11 التعليقات:

هدى يقول...

هي فعلا الدنيا ابسط من تصوراتنا عنها

بقالي كام يوم بفكر في حاجة شبه كدا

ان الدنيا محتاجة مننا نفس عميق قوي ونطلعه بشويش قوي

ونبدأ ناخد كا حاجة تقابلنا بابتسامة ونتعامل وياها براحة ..

هدوء غريب عليا كتير .. بس حساني محتجاله

يمكن انا زيك كنت مليانة تفاصيل وبحاول طول الوقت أزودها عشان أخبي جوايا كويس عن الناس

دلوقتي حاسة ان كل التفاصيل دي لازم تتلضم في يعضيها تبقى واضحة بالقدر اللي محتاجة أشوف فيه الدنيا بوضوح

مش عارفة اذا كان كلامي مفهوم

بس انا معاكي خليكي زي ما انتي ... اتصرفي بالطريقة المناسبة مش لازم تكون هي طريقة واحدة كتير بحس اننا بنحاول نلزم نفسنا بتصرف واحد عشان نبقى متسقين مع ذواتنا .. بفكر انه ممكن نسيب راحتنا لفسنا عشان نفسنا تبقى متسقة مع روح العالم

..

اديني بتفلسف ع الصبح

صباحك ..... عسل بالقشطة

مياسي يقول...

صح جدا ع فكرة

احنا فعلا بندور عالاحساس مش عالفهم؛ وعشان هيك في شغلات بنقبلها من ناس لأنهم بيحسو فينا ونفس الأشياء ما بنقبلها من غيرهم

الإحساس بالنسبة الي بيفرق كتير و بيهمني أكتر

ممكن فعلا انا نترك الاشياء تيجي لحالها أحسن ما نضل نفتعل انها لازم تيجي

هو اللي بيشرح حاله بيطلع معه كل هالابداع هاد؟

pink paradise يقول...

بصى غادة
الانسان زى الفن بالضبط
يتحس مش يتفهم

nudy يقول...

حمد الله علي السلامة اولا وبعد
انا شايفة ان الاكتشافات اللي بتهبط عليك اليومين دول هايله جدا ومؤثرة و ح تفرق كثير قوي في الايام الجاية لانها ح تطمن قلبك ولان كل اكتشاف بيقربنا من غادة اكثر والناس حتشوفها دائما احسن واحسن
اما عن الاخت التعيسة فدي حل مشكلتها بس في ايدين ربيا يهديلها ر وتقدر تظبط مواعيد اجازات اكثر
واخيرا اوعي تغيبي مستنياك دايما بجديد

msafa يقول...

انا شخصيا مش بحب الحاجات اللى فيها تفاصيل كتير يعنى اللى تكون معقده مع انها ممكن تتشرح ببساسطه وه بيعملى مشاكل لانى بهرب من التفاصيل
البلوج حلو اوى انتى بطلتى تزورينى ليه انا زعلتك فى حاجه ؟

LAMIA MAHMOUD يقول...

الاول انا مقصرة معاكي جدا سواء قراية ليكي او حتى اتصالات بس ربنا يعلم الفترة اللي فاتت دي الدنيا كانت عاملة ازاي ده الى جانب الامتحانات

بعد كده .. انتي جبتي الخلاصة
الدنيا بسيطة اوييييي واحنا ليه نعقدها

الناس ببساطة بتحسنا عشان في لينك وصلنا ببعض .. واحنا بنحسهم بنفس الطريقة
وممكن منحسش
عادي

نبراس العتمة يقول...

أعلن الموت مع غزة

ليتحمل كل واحد منا مسؤوليته التاريخية والانسانية
جراء ما يقع للإنسان في غزة
أعلن الإضراب عن الطعام إلى حين موتي أو وقف شلال الدم
لنعترف أن دمنا الماء ما عاد يساوي تلك النطفة التي بدأ منها
لنعترف أننا مهزومون حكاما وشعوباوأن أشرفنا أشرف منه كلب جبان


ما عاد يشرفني أن أنتمي الى هذا الكوكب الأحمر


مع دخول القوات الإسرائيلية إلى بيروت سنة 1982 لم يتحمل الشاعر خليل حاوي ما رآه فأطلق النار على راسه في منزله في شارع الحمراء


الآن نشرب الأنخاب ونشاهد المسلسلات التركية والمكسيكية واللقمة نرى دم الانسان فيها فنبتلعها هنيئا مريئا


أمام موقفي السلبي وموقف الانسانية التي ماعاد يشرفني الانتماء اليها أعلن أنا شكيب أريج أني أدخل في إضراب عن الطعام إلى حين موتي..



قد يبدو موقفي سلبيا لكنه أحسن من موقف الفنانة السورية التي تعرت في ساحة بأمريكا احتجاجا على ما يقع في العراق وفلسطين..


وقد يبدو أن لا جدوى منه لكن اللاجدوى الحقيقية هي أن لا يحرك أحد ساكنا وأن نكتفي الشجب والندب..



أعلن إضرابي حتى الموت أو حتى ايقاف النزيف وليتحمل كل واحد منا مسؤوليته التاريخية


شكيب أريج
المغرب/طاطا

assafo anaroze يقول...

سيدتي
زي ما قولتي الناس بتحس بنا من غير شروحات ولا مفاهيم
انت مش غلط انك تحاولي تفهمي الاخر انت ايه و حاسة بايه
لاننا كلنا بنعمل كده
في مواقف لازم نعمل فيها زي ما عملت في ساعات الواحد مننا محتاج يفضفض مع الاخر وذي طبيعة انسانية مترسخة فينا
و اكيد يا ستي الواحد اللي انت مش منتبها لوه و ما بتحكيض لوه عن نفسك يمكن يكون اكثر واحد بيحس بك اتمنى انك تلتفتي ليه ممكن تلاقي راحتك معاه
مودتي
دعوة للتواصل من خلال مدونتي
صديق من المغرب

ست الحسن يقول...

والله يا هدي الكلام بتاع إننا مش لازم نلزم نفسنا بتصرف واحد
ده كلام ملهم جداً وبصراحة اندهشت منه
لأنه ببساطة معناه انه أحياناً الموقف بيحتاج إننا نشرح مشاعرنا أكتر
وأحياناً السكوت بيبقى أبلغ وأحسن

بس هقول إيه
اللي اتلسع م الشوربة
وعندك حق
أنا فعلاً محتاجة أبطل تفكير خالص وأبقى على راحتي وبس

تسلمي يا افندم
وربنا ينور أيامك زي ما نورتيني

........

مياسي

إنتي بتخجليني بجد
ووجودك بيفرحني أوي

ربنا يسعدك

.......

حسام باشا

تصدق الموضوع ده خد زمن عقبال ما فهمته
بس انت عندك حق

والحمد لله إنك أخيراً حاجة عجبتك وقررت تعلق عليها

نورت يا افندم
ومتغبش بأه

.........

نودي الأمورة

تصدقي انبسطت لما عرفت انك بتستني التدوينات
مع انك عارفة كل حاجة اللي بكتبه واللي مبكتبوش

نورتي يا بطوطة

..........

مسافة

أولاً حمد الله ع السلامة
بقالك كتير منورتش المكان

والحكاية مش بتبقى تفاصيل كتيرة أد ما بتبقى لخبطة وسلوك داخلة ف بعض

أنا فعلاً بقالي كتير مش بعلق عند حد تقريباً ومش عارفة ليه
بس المرة دي عندي ... هتلاقيني عندك أكتر في الفترة الجاية

نورت يا افندم

........

لميااا

أنا عارفة حكاية الامتحانات دي بتربك وتاخد الوقت كله
وبصراحة أنا كمان مقصرة معاكي خالص
يعني حبة لخبطة صغيرين

ذاكري كويس
علشان هنتقابل على طول بعد الامتحانات

..........

assafo anaroze

نورت المدونة ف أول زيارة
وفعلاً فيه ناس بنقابلهم مبنبقاش محتاجين نشرحلهم أي حاجة
بس هم قليلين أوي

طبعاً ان شاء الله هتلاقيني في المدونة عندك في أقرب فرصة

نورت يا افندم

bosy يقول...

يااااه رائعه
اكتشفت اني في الحقيقة مش بدور على الفهم
أنا بدور على الإحساس ...
وكلنا محتاجين حد يحس بينا أكتر من إنه يفهمنا
ولما منلقطش مشاعر اللي قدامنا ...
عمر أي كلام يقولوه مابيفرق معانا عجبتني اوي وعجبني اسم البوست اوي

bosy يقول...

يااااه رائعه
اكتشفت اني في الحقيقة مش بدور على الفهم
أنا بدور على الإحساس ...
وكلنا محتاجين حد يحس بينا أكتر من إنه يفهمنا
ولما منلقطش مشاعر اللي قدامنا ...
عمر أي كلام يقولوه مابيفرق معانا عجبتني اوي وعجبني اسم البوست اوي