السبت، 22 نوفمبر 2008

قعدة بنات وبس








روَّحت البيت لقيت شاي التموين رجع تاني
أخيراً هاعرف أعمل شاي خفيف م اللي بحبه
بس سكر التموين اختفى وجابوا سكر أبيض ملوش طعم
المهم احتفالاً بعودة شاي التموين هكتب حصل ايه النهاردة

رحت أقابل عشر بنات معرفش منهم غير رانيا
وغامرت ورحت المشوار ده وانا ف مود بايخ ورخم
قعدة البنات حلوة بجد
خصوصاً لما تلاحظي انهم كلهم عايشين نفس المعاناة
أحياناً بتفاصيل قريبة منك أوي
هحكيلكوا بقى ع اللي حصل بينا

في البداية رحت متأخرة ،
بعد ما سلمت ع اللي أعرفهم واتعرفت ع اللي معرفهمش
فجأة حسيت اني وسط ناس عارفاني وانا عارفاهم فأخدت راحتي واندمجت
والغريبة اني كنت بضحك وبنكت مش عارفة ازاي

مبسوطة اني عرفت سارة لأن دمها خفيف موت وتحس انها قريبة

وكمان لميا بنت جميلة خالص من أول نظرة عرفت اننا هنبقى أصحاب
لميا شخصية قوية جداً مش محتاج تتكلم معاها علشان تكتشف الحكاية دي
بس تقدر تلمح ذكاء وقوة ودول من أكتر الصفات اللي بحبهم وبندمج معاهم أوي

غادة بقى أنا حبيتها من كتابتها بس لما شفتها اكتشفت انها صغنتوتة خالص
وعندها امتحانات وتايهة شوية ومتشتتة لأنها عايزة تقعد معانا في نفس الوقت لازم تمشي

مروة بالظبط قعدت عشر دقايق كانوا كفاية علشان أحبها
هي بنت جميلة خالص وأحلى من الصور بكتييير

المفاجأة كانت هدى
هدى بتدخل عندي على طول وبحب تعليقاتها خالص
بس النهاردة اكتشفت انها حد حاضر الذهن ودمه خفيف وصريح
أنا بحب الصراحة وباندهش أوي لما أشوف حد بيتكلم من قلبه
هدى كانت بتتكلم من قلبها
وحسيت ان جواها مساحة تنفع اننا نتقابل فيها ونبقى قريبين أوي
هدى مشيت بدري للأسف
كنت عايزة أقعد معاها أكتر
متهيأ لي اننا ممكن نبقى اصحاب حلوين

آه فيه بنوته اسمها مها جت في الآخر واتكلمت معاها تلات كلمات
ومعرفش عنها أي حاجة بس والله حبيتها خالص
فكرتني بنفسي وانا جاية من الشغل
نفس التوهان ونفس المحاولات انها تشوف ناس
برغم ان كل اللي بتفكر فيه انها لازم تنام بدري
علشان تصحى بكرة تروح الشغل

بقية الناس لطاف خالص بس ياإما كنت اعرفهم قبل كده
ياإما المرة دي مشفتهمش كويس

يتهيأ لي انهم شايفيني بنت دمها خفيف
بس الحقيقة لو حد كان اتمشى معايا وانا مروحة
كان اندهش جداً م التعبير اللي على وشي
يعني مزيج من التوهان والأسى
معرفش ليه
كإن القعدة دي خرَّجت بنت بتضحك من جوايا
وبعد ما الناس مشيت البنت دي مشيت معاهم


...................

11 التعليقات:

غادة الكاميليا يقول...

تعرفي بقالي كتيييييييييييير مكنتش مبسوطة وبعد ماسيبتكم خفت الاحساس ده يروح
فحاولت بكل طريقة أحافظ عليه بجد
ولحد دلوقتى انتم أحلى حاجة حصلت من مدة طويلة قوى
بجد بجد يعنى
بعدين أنا مش صغيرة ولا حاجة ده أنا أطول واحدة فيكم
هههههههههههههههههه

مروة ابوضيف يقول...

يا بنتي دايما الناس اللي بتضحك كتير و تهزر كتير جواها اسي اما التوهان ده طبيعي هو حد عارف هو عايز ايه و لا رايح فين اصلا ؟؟؟ انا زعلانة اوي اني ملحقتش اقعد معاكم بس كنت جاية من شغل و رايحة شغل و تعبانة اصلا دور برد سمج و كان موودي هباب كمان و لو انه كده اغلب الوقت الحقيقة بالمناسبة انا معاكي في اغلب الانطباعات اللي قلتيها عن الناس اللي شفتهم طبعا اما اللي مشفتوش معرفوش و مقبلتوش يووه يووه هو فيه النهاردة بيفتكر

يا رب نتجمع تاني و الحق اقعد معاكم المرة ده بقي

LAMIA MAHMOUD يقول...

والله يا غادة انتي بجد زي العسل
انا رغم اني كنت جاية صدفة الا اني اتبسطت جدا وحسيت برده اننا لازم نكون اصحاب واني لازم اشوفك تاني
انتي بنت زي العسل اصلا

nudy يقول...

صديقتي دودو انا انبسطت حدا لان البنات دول عملوا لك حالة حميلة خدي بالك من نفسك وحافظي علي الحالة دي وعلي ميعادنا

رانيا منصور يقول...

مش عايزين نستنى لما الفرحة تروح!
وطعمها يختفي ونرجع ندوّر على طعم تاني طيب!

مرّات لقانا هتبقى كتير بإذن الله كلاتنا فـ بعض كده

انا كمان حاولت اتعلق بفرحتي بيكو لحد اخر الليل
والصبح جيت جري اشوف الصور والتعليقات
أشوفنا !

كنا حلوين يا بنات!
كوكتيل مجنون
بيحب بعض :))

هدى يقول...

طيب

واضح اني جاية متأخر

انا فضلت الليل كله اتكلم عنكم .. لدرجة ان وليد اتفاجا امي الصبح كنت مكشرة و على وش عياط وراجعة بالحالة المعاكسة تماما

تقريبا انطباعات غادة كانت نفسها انطباعاتي ... رغم اني روحت مجهدة جدا من فكرة ان فيه 10 بصمات على روحي مرة واحدة ... خصوصا لما يبقى عندك شغف تعرفي ارواح الناس مش اشكالهم أو اسمائهم

ودا كان سهل جدا امبارح لان الناس كانت حابة دا

...

اممممم

من زمن ما قعدتش قعدة زي دي

ربنا يخليكي يا رانيا انك عملتي دا

..

غادة انتي كمان فجأتيني

صباحك بنات

إبـراهيم ... معـايــا يقول...

إحم ....

أبدو زي الداخل غـلط ، بــس عادي بقى (ولا إيه يا ست غادة) .....ممممممم أولاً أسعدني زماني "الحمد لله يعني" .. إني أعرف من بنـاااتــك دول كتييير ، و مش هعرف أتكلم عنهم أصلاً ، لأن من تجمعهن "رانيا بنت منصور" أكيد يعني هيكونوا ع الفرااازة :) ....

غادة الكاميليا: مــاشي يا ستي ، عارف واحشانا جـد إيه، ومع ذلك جاية خصوصي ، وماشية على طول ، كده فيه عتاب بجد على جنب ....
دكتورة مـروة: منـــورة كل مكان تكوني فيـه
سـارة رشـاد: أيتها الجميلة، مش تقولي إن عندك مدونة تـانية .... مـــااااشي
لميـــا: بتغيبي كثييييييير مش عارف ليه ؟؟؟ ، إبقي اظهري برًا أو بحرًا أو جوًا
.
.
.
هدى ورانيا وغادة(الأخيرة) ...

ربنا يسعدكم كماااان وكمــــان

إبـراهيم ... معـايــا يقول...

ويعدين بلغني من مصادر لا أدعوها بالسرية إن إيمان كانت معاكووو، وكاميليا، ولا دول ما اتفاجئتيش بيهم :) .!!!


أدينــــا بنعدي تـاني أهه


صباحك فـــــل

ست الحسن يقول...

إلى كل الجميلات
اللي كتبت اسمهم واللي مكتبتش اسمهم
اللي جم قروا واللي مجوش

بجد فرحوتني
وان شاء الله هنكررها كتير

......
ابراهيم

حضرتك تنور في أي موضوع
وتعدي تاني وتالت ورابع و....

alexandmellia يقول...

أنا كمان اتبسطت أوي باليوم يابنات
بجد بجد أنا كمان مبسوطة باللقا ده أوي
فرحانة بيكم وباحساسي ان كل واحدة ليها طعم ولون مختلف
وعايزين فعلا نكرر الموضوع قريب جدا وبشكل منتظم

البنوتة اللى جت فى الآخر ... مهـــا يقول...

يا فندم
أنا بدأت اشوف مدونتك بدءا من تاريخ هذه التدوينة أعلاه

و لكنى كنت اتردد فى التعليق عشان شاكة انك تفتكرينى

لكن مادام مصرة بقى خلاص
هاعلق براحتى

;)