رمضان جانا و .......

محتاجة أتكلم مع الفراغ .. مع الناس الوهميين اللي بحبهم وبصدقهم ......
مع العلامات اللي بتلمس عنيه كل يوم وانا بفتح المدونة
واعرف
أد ايه انا قريبة من ناس وبعييييييدة أوي عن ناس تانية

محتاجة أفتح قلبي بجد
واسيب دموعي تنزل من غير خوف
محتاجة أصررررخ بصوت عالي ...
واضحك ضحكة صافية تهز الجبال
محتاجة أحلم أحلام ناعمة فيها سنووايت والأقزام
وفانوسي اللي بشمعة وباب إزاز

محتاجة اركب آلة الزمن وارجع لرمضان من عشرين سنة
واتفرج على نيلي وهي بترقص وبتقول ( طبلي بلدي )
أحلى أيام رمضان قضيتها مع وردشان وشاندو اللي قلبي عنده
وريما وعادتها القديمة
وأخو البنات وهو وهي و..........

تفاصيل كتير
الدفا اللي كان بيلمنا ع السفرة والفرحة الطاغية برمضان
وصوت القرآن قبل المغرب
احساس العيلة والناس واللمة
السحور اللي كنت باصحي بالعافية فيه
وصوت طبلة المسحراتي اللي باستغرب شكله لما ييجي يوم العيد
......................


ياه
هو احنا كبرنا كده امتى
والحاجات دي كلها راحت فين




......................