إلى قرنفل

مساء الجمال يا أفندي

بص بقى

أنا بجرب معاك تجربة جديدة جداً علىَّ من ساعة ما عرفتك

هي خاصة جداً وصعبة أوي

إسمها الحقيقة العارية

يعني بقولك اللي جوايا مهما كان صعب ومؤلم وعيب

معرفش الحكاية دي هتوديني لفين

بس أديني بكمل فيها وربنا يستر

طبعاً الرسالة بتاعتك لمست قلب اللي خلفوني

مش عارفة أقولك إيه

صاحبتي كانت قاعدة معايا فمعرفتش أرد في ساعتها زي ما قلتلك

قبل ما ادخل أنام

قعدت أكتب في كراستي عنك

هنقلك اللي كتبته واللي يحصل يحصل

"قرنفل

أيتها الأسبرينة اللطيفة 

التي كلما قررت التوقف عن تناولها تمسَّكتْ ببقائها داخلي

ماذا أفعل معك؟

تكتب لي : ياحلوة، ألن تذهبي معي إلى الإسكندرية 

وأنا أردُّ: آه .... لا تقل لي اذهبي معي يا حلوة

العطش يقتلني يا قرنفل ولا أستطيع أن أشربك

أنت البحر البعيد الذي لن يرويني ولن أتخفف داخله من ثقلي

أنت البحر الذي يخصُّ أسماكاً أخرى

بالنسبة لي أنت بحيرةً ضيقة جداً لا تسعني ولا تحملني

ولا يمكن لي سوى أن أضع أطرافي بها في هدوءٍ وأراقب جمالها الأخاذ

يا قرنفل

أنا عطشى وأنت تلألأ أمامي مثل مطرٍ بعيد

ليس بإمكاني أن أزيف الواقع

يا إسبرينتي الطيبة ، أحتاجُ إلى علاج

الألم سيذهب بي

أريدُ أن أُشفى

فقط

أقرر أن أحتمل الألم دون مُسكنات كي يرشدني إلى الطريق

يا قرنفل

أنت تحجب طريقي

تأخذ عينيَّ ومشاعري

أندمج معك وأنسى

أنسى كل شيء

ولا أتذكر أنني أكاد أموت من الضياع"

................

طيب أنا نقلت المكتوب في الكشكول بالظبط

من غير حذف كلمة

ومش عارفة ان كان ده كويس ولا وحش


برغم اني مش عارفة إيه اللي بيحصل معاك ومع أصحابك

وإيه اللي خلاك تقرر تقفل على نفسك أو تغير طريقك أو تحس بانهيار العالم

بس أقدر أقولك بمنتهى الهدوء

"العالم القديم ينهار"

واضح انك بتستيقظ من حياة علشان تبقى في حياة تانية

وده لازم له مجموعة انهيارات داخلية في الأساس بس بتبان انها في الخارج

فيه قرنفل جديد بيتولد والمسألة دي مش سهلة خااالص وهتاخد شوية وقت

 كنت داخلة أقول كلام تاني يمكن يبان بعيد عن المود ده بس هوة قريب يعني

الناس اللي في الشارع بتهز ثقتي في بكرة وانا مش حابة المسألة دي

أنا يمكن أحياناً بنجح إني أطمنهم بس هما في كل الأحول بيقلقوني

محتاجة بابا أوي

أو حضن دافي جداً أطمن جواه وأحس انه مهما حصل مفيش حاجة وحشة

بما إن الحدوتة دي مش واردة تقريباً

فانا بحاول أعمل الحضن ده لنفسي

يعني واحدة من الغادات تبقى أهدا شوية ومتطمنة أكتر وتعرف تحضن الباقيين

مش عارفة دا تنظير بجد ولا خيالي

يعني بيحصل أحياناً ولا دي مجرد فكرة ع الورق

محتاجة شوية دفا زي بتاع إعلانات الشيكولاتة

..........

2011




وهنا أيضًا
إلى قرنفل أفندي






painted by: Dayanand Kamakar


.......