الأحد، 30 أغسطس 2009

بلكونة رمضان





بقالي اسبوع عايزة اكتب تدوينة ومش عارفة
جوايا أفكار كتير ...كتبت تدوينتين ومنشرتهمش ...
حاساهم ناقصين حاجة
وحاسة نفسي مش قادرة انشر الكلام ده ... دلوقتي ع الأقل

المدونة وحشاااااني أوي
والناس الافتراضيين الجامدين جداً اللي بيقروا وبيعلقوا ...

أو بيقروا ويبتسموا
أوبيقروا ومبياخدوش في بالهم

عايزة أغير جو ... يعني أروح ع البحر في حتة بعيدة
أأجر عيلة بالساعة واسافر معاها ....

أو أشوف واد أمور كدة ونسافر سوا
لسة مش عارفة هحلها إزاي يعني
ممكن أمشيها ملاهي وخلاص وبلاش موضوع السفر ده
بس هقعد أصرخ للصبح .... وماله
أهو تغيير برده

بقالي كتير مقعدتش ع البورصة وطلبت البن المظبوط
عايزة أروح هناك مرة بعد الفطار على طول

وياريت بأة لو يبطلوا يشغلوا عبد الحليم
ويغيروا موعود ويحطوا لنا الست فات المعاد
أهو كدة القعدة تبقى آخر سلطنة

بفكر آخد معايا صاحبتي اللي بتحب الكوتشينة
ونلعب ع المشاريب
بس هي مبقتش موجودة دلوقتي
ومبقاش ينفع نقعد مع بعض أكتر من عشر دقايق
الدنيا اتغيرت والبنت بطلت كوتشينة
وبقت تشيش بس

ممكن أروح الحسين
الزحمة هناك دلوقتي جامدة .... وانا هتوه في الناس الكتير
والوقت هيفوت وانا بتفرج على بدل الرقص المضروبة
اللي بيبيعوها للسياح وافتكر صاحبتي اللي بقالي سنين مشفتهاش
وكان نفسها تشتري واحدة منهم
انا خلاص قررت أرجع للشغل تاني
يعني مش هابقى فاضية للتدوين ولا للكتابة عن حد
هدخل دوامة الشغل تاني وبمزاجي أوي وعايزاها جداً
ع الأقل يبقى فيه فلوس معايا لوطلعت في دماغي أسافر

التدوينة دي شكلها قلبت على تهييس بس وماله
التهييس ابن حلال برده
طالما مش أد الجد
خلينا في التهييس أحسن




كان معكم أمنا الغولة من بلكونة رمضان
كل سنة وانتم طيبين





.....

13 التعليقات:

رضوى يقول...

و انتي طيبة يا امنا الغولة
و الله ليكي وحشه
نفسي اسافر اناا كمان
نفسي اطلع اي حتة مقطوعة في الصحرا و اتوهلي هناك كام يوم و يمكن كمان حظي يبقى حلو و اضيع يااااه دي هاتبقى حاجه حلوة خالص
ماعلينا الملاهي بنت حلال برضه خديني معاكي انا كمان بقالي -مش هاقولك قد ايه-نفسي اصرخ

وحشتيني على فكره
و بعدين تتصرفي, يعني ايه هاترجعي الشغل و مايبقاش فيه وقت للتدوين...ماليش دعوة انتي تخصصيلنا يومين في الاسبوع للمدونة
:*

pink paradise يقول...

رمضان كريم يا ست الحاجة
واضح ان الصيام عامل عمايله
عموما مبروك موضوع الشغل ده
و فكرة السفر دى بتلح علينا كلنا
لدرجة انى فكرت انى اسافر بره مصر مع واحد صاحبى
و بعدين كبرت دماغى
قلت ابقى افسح ماما و بابا بعد العيد اولى منى
نشوفك على خير

ضكتور جدا يقول...

ههههههه
وماله التهييس حلو برضه
ورمضان كريم

آية مش هنا يقول...

بصي كنتي ف بالي النهاردة و بقول هكلمك اقولك حاجتين

الأولى ... اني وحشني ادخل هنا و الاقيكي كاتبة ... متتقليش علينا كده ، و انتي عارفة اني بحب المكان هنا اوي

و التانية : كنت هقولك ان نفسي نفطر سوا ف الحسين ...مصدقتش اني لاقيتك كاتبة عايزة تروحي اصلا :))


عايزة اقول حاجة كمان

انا بحب أمنا الغولة ..
:*

nudy يقول...

واضح ان كتير من الناس واقفة في بلكونة رمضان وبتتفرج علي اللي عايزين يعملوة وقال ايه اصل الدنيا تحت زخمة انصحهم يبطلوا حجج وينزلوا حري ويعملوا كل اللي نفسهم فيه

اما عن الشغل فغير مسموح انك تبعدي عن الكتابة والتدوين وتسيبي الناس اللي بيحبوك ويستنوك دايما هنا

سارح فى ملكوته يقول...

السلام عليكم
كل سنة وانتى طيبة
اولا مبروك على الشغل بس يا ريت متبعديش اكتر من كدا ده كدا وبتوحشينى جدا امال على كلامك هاعمل ايه
اما الفطار فى الحسين مقولكيش ولا السحور فظيع
والسفر بلاش تجرى ريقى اصل انا ابعد مكان رحته المنوفية حتى المصيف بسمع عنه وبس
طولت عليكى جدا
بس بجد بتوحشينى قوى
مع خالص تحياتى

سارح فى ملكوته يقول...

اه نسيت اقولك ان التهييس طلعت حاجة حلوة قوى بعد معرفت معناها
وفى حد قالى انا مهيس اذا انا كويس
دمتى مهيسة
وسلام

عالمى ازرق يقول...

انتى يابنت وحشانى اوى
كل سنه وانتى طيبه

ممممممم
على فكره احنا عندنا بحر اعمليها وتعالى وهخليكى تاخدى فاصل مؤقت من حياتك
وبجد بقي انا اللى نفسي اجى اصلى التراويح بالازهر

مياسي يقول...

والله انا نفسي كمان اهج من البلد لأني قرفانه جدا!!

وين بدنا نروح؟ وين بدنا نروح؟ ما فيش في بالي اشي ولا في جيبي مصاري!!!

لكان محلك سر!!

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله

كاميليا يقول...

انا ممكن العب معاكي ع المشاريب علي قهوة في الحسين عشان مابحبش البورصة اوي يعني

Blank-Socrate يقول...

كل سنة و انت طيبة يا اجمل غادة
بالنسبة للولد الامور انا معنديش اى مشكلة انى اسافر معاكى او نروح للبورصة او اى مكان فى الدنيا مع ست الحسن
انا كان حلم حياتى ان اتعلم اسوق عجل و لما اجرت عجل اتعلمت
اما العوم فدا الحلم اللى لسة متحققش
-------------------
قرار الشغل جميل جدا و صحى جدا جدا
مهما كانت الضغوط و السلبيات المميتة اللى فى سوق العمل
و الايد البطالة ....
مبروك مقدما و كتقليد اصيل لازم نتعزم من فلوس اول مرتب
تحياتى

ست الحسن يقول...

رضوى

فكرة التوهان في الصحرا دي بنت حلال أوي
خديني معاكب اكسبي فية ثواب

يومين في الإسبوع بس
طب ما تخليهم أربعة وادينا قاعدين يعني

ربنا يسهل يا رضوى
ان شاء الله بس اشتغل ونشوف

.........

حسام باشا

كل سنة وانت طيب يا افندم

موضوع السفر ده طلع حالة عامة
ربنا يقدرنا بس ونعرف نحطها موضع التنفيذ

نورت يا افندم

........

ضكتور جداً

تسلم يا افندم
وعدي تاني بقى يمكن تلاقي جد يعجبك

........

آيه هانم

أمنا الغولة بتموت فيكي أصلاً
تسلمي يا قمرة
وان شاء الله نروح سوا قريب

........

نودي الجميلة

ان شاء الله الحاجات هتتحقق
بس مش عارفة ليه قلقانة

ما علبنا
ربنا يسعدك وتنولي كل اللي تتمنيه

.......

سارحة هانم

وانا كمان زيك يا إسراء
بسمع عن المصيف
بس دي مسألة وقت
بكرة نزهق منه يا ستي

وانتي كمان واحشاني خالص

مش عارفة يعني ايه تهييس
عموماً المدونة هتزودك بكل المصطلحات
متقلقيش

...........

صاحبة العالم الأزرق الغائبة طويلاً

انتي واحشاني أكتر
انتي فين يا قمرة

يا افندم تعالي
دا حتى الأزهر من أنضف وأجمل الجوامع
قريب ان شاء الله تنورينا

.........

مياسييييييي

كل سنة وانتي طيبة يا جميلة

ولا يهمك يا ستي
تتعدل وهيبقى فيه كل حاجة
وهتسافري ويمكن تيجي مصر وتنورينا

واشوفك بأة

ان شاء الله قريب
مين عارف

..........

حسونة

كل سنة وانت بألف خير
ورمضان كريم

.........

كاميليا

ماشي
بس اللي يرجع في كلامه

كلميني ونتفق يا جميلة

..........

مينا

وانت طيب وبخير يا مينا

متأكد انك ليك في الكوتشينة
ان شاء الله هنتقابل قريب
ونشوف الحكاية دي

أول مرتب
طب ادعيلي بس متطلعش نصباية
والدنيا تمشي كويس
وعنينا ليك يا افندم

تسلم يا افندم

...