إلى ريهام

بصي يا ستي

فيه رسايل الواحد مهما هرب منها لازم هيرد عليها بردو
أنا بأجل الرد على رسالتك من ساعة ما جت

لأنه أي رد هيبقى أقل كتيييير من اللي انتي كتبتيه

أنا اتفاجئت جداً، متصورتش إنه الرسالة هتبقى قريبة كدة من قلبي

وتوقيتها كمان غريب ومناسب أوي

اللي باسطني أكتر إني مطلبتش منك تكتبي رسالة 

وإنه المسألة كلها حصلت بالصدفة

طيب علشان تبقي عارفة دا الرد التالت

فيه ردين تانيين ناقصين معرفتش أكملهم

ولو دا مكملش بردو هركنه وهيبقى فيه رد رابع وخامس 

لحد ما أكتب رسالة كاملة

المفروض والطبيعي إنه لما الناس يقولولك إنهم بيحبوكي تفرحي وتدفي

بس أنا بتألم لسبب غير معروف

زي ما أكون بشيل الغطا وبصرخ :"مش هينفع أنا خلاص اتعودت ع البرد"

بس لما الغطيان دي بتكرر ...

دفا ورا دفا مبتقدريش تقاوميها وبتسيبها تدخل قلبك بطريقتها

الصعب بعد دا كله إنك تلاقي روحك جوا البرد بردو ومن غير سبب

رسالتك اللي مريتي فيها على تقاصيل تخصنا سوا 

حضنتني ووجعتني في نفس الوقت

تعرفي إحنا كنا مرشحين جداً نبقى أصدقاء قريبين أوي

ولسبب معرفوش دا محصلش

أنا أخدت مسافة في يوم من الأيام وفضلت موجودة عندها

صحيح تم اختراقها أكتر من مرة في ظروف كتيرة

بس برجع تاني أقف عند النقطة البعيدة

الدنيا كانت ماشية بالطريقة دي كويس أوي

لحد ما لقيت نفسي من كام شهر بدخل أقرا المدونة عندك بانتظام

زي ما تقولي رجعت أقابلك وأقعد معاكي تاني

حبيت القطة بتاعتك وحبيت الأمومة الدافية اللي بتطلع منك تجاهها

وكنت بتلمس من تفاصيل حياتك اللي بتودي لأماكن غير متوقعة

أنا معرفش إزاي بتطلعي من شوية أسى ووجع وافتقاد نسيج دافي أوي كدة

لدرجة إني ببتسم بعد ما أخلص قراية وأقول لروحي" مش مهم ... أنا كمان متفائلة زي ريهام ... بكرة أحسن"


علشان كدة لما حكيتي حدوتة إننا مش لعب ومش لازم نخاف من الكسر أنا اتخضيت .... أنا محتاجة الكلمة دي أوي دلوقتي ومش فاكرة إني قلتهالك أصلاً.
انتي زي ما تكوني جيتي علشان تقوليلي: افتكري قوتك .... انتي مش ضعيفة أوي كدة
علشان كدة الدموع ملت وشي وأنا بقرا كلامك

وعلشان كدة معرفتش أقرا رسالتك دي تاني إلا بعد وقت طويل
.
.
.
وأنا كمان بحبك على فكرة

....

إلى ست الحسن












painted by: Luz Letts