الجمعة، 15 أبريل 2011

كتيب الإرشادات للفتيات الصغيرات

.
إلى الغزالة الصغيرة أو إلى جيلان الشافعي

.



.




أول حاجة كانوا المفروض يعلموهالنا في المدرسة
إنه كل واحد مطلوب منه يعرف أجوبة الأسئلة بتاعته
أجوبة الأسئلة بتاعة الطرف التاني متخصناااااش
ومش المفروض نسأل عنها أبداً أو نحط توقع ليها ونتصرف على أساسه

يعني انتي مستلطفة ولد مثلاً
إنتي مستلطفاه ولا لأ ؟ .... الإجابة: آه
بس كدة
السؤال بأة بتاع يا ترى يا هلترى هوة مستلطفني ولا لأ
المفروض انتي متجاوبيش عليه خااالص
سيبي الولد يجاوب عليه وبيجاوب عليه عادةً وبسرعة

عمرك اتصلتي بحد وقالك كنت لسة هكلمك حالاً
أو كنتي سرحانة شوية وسط مجموعة بشر
ورفعتي عنيكي لقيتي واحد مركز معاكي جداً
دي إجابات

لما تتصلي بحد وتقوليله تعالى نتكلم في الموضوع الفلاني
اليوم الفلاني الساعة كذا
لو قالك موافق بيقى مستلطفك ....
لو قالك خليني أشوف مواعيدي
هاكلمك آخر الإسبوع ونتفق على يوم الإسبوع اللي بعده
يبقى المعاد ده رخم وعايز يتخلص منه

في كل الأحوال مش مهم خااااالص مين كلم مين الأول
أو مين اللي طلب معاد علشان يقابل مين
المهم لما ترجعي من المعاد تجاوبي على السؤال ده
انتي كنتي مبسوطة معاه ولا لأ ؟
بس كدة
وأرجوكي مهما كانت الإجابة
إوعي تسألي السؤال بتاع طب وياترى هوة كان حاسس بإيه



بنسبة 90 %
كل الناس اللي بنفكر فيهم بقوة وبتركيز
وبييجوا فجأة على بالنا إحنا كمان بنبقى على بالهم
لو انبسطتي مع حد جداً اعرفي انه ضروري انبسط
الفرح دا تيار رايح جي صعب أوي يبقى
ONE WAY

عبري عن نفسك ببساطة وبقوة
تصوري مثلاً
لو حد قالك إنه لفة الطرحة دي أحلى من كل اللفات اللي فاتت
هيبقى رد فعلك إيه؟
هتبقى مبسوطة ومندهشة في نفس الوقت
ليه بأة ؟
لأنه دي مش اسطوانه ومش معاكسة
ومش محاولة من حد انه يبقى لطيف

دا ولد شايف حاجة وبيقولها
بيعبر عن إحساسه وبس
من غير ما يفكر
إنك ضروري هتتصوري انه مركز معاكي جداً
وبيتابعك
وعارف إنه دي أول مرة تعملي اللفة الجديدة دي

قصدي إيه
متحاوليش تبقى لطيفة
عبري عن اللي جواكي ببساطة وانتي هتبقى مذهلة

أنا ساعات بتكلم كتيييييييير
ومتخيلة انه اللي قدامي بيفهمني أكتر كل ما اعبر عن نفسي أكتر
بس المسألة دي طلعت كدبة كبيرة أوي
محدش بيفهمك من الكلام اللي بتحكيه عن نفسك
الناس بتحسك وتشوفك بطريقتها
أفضل طريقة الحدوتة دي تحصل بيها
انك تسترخي وتبقى على طبيعتك بس



متسأليش صاحبتك الأنتيم
هوة كان يقصد إيه لما قال كدة؟
اسألي نفسك بشويش إنتي حسيتي بإيه لما هو قال كدة
والإجابة هتجيلك ببساطة
وغالباً إحساسك صح مهما كان غريب وبعيد

بلاش تقيمي اللي قدامك
لو حس انك بتتفرجي عليه هيجري بعيد
كلنا مليانين عيوب بس كمان مليانين مزايا
وأنا باحب الناس
اللي تقدر تطلع مني أفضل واحدة ممكنة
وبحاول أطلع منهم أفضل أشخاص ممكنين
بس الحدوتة دي محتاجة لعبة سحرية
خلطة كدة من الحب للناس كلها لله في الله
ومن الثقة المطلقة اننا مليانين جمال مخفي
مفيش فرص انه يبان


متغضبيش منه لأنه ماتصلش بيكي
علشان يقولك أنا انبسطت أوي معاكي ومتشكر جداً
ومتغضبيش لو اختفى فجأة بعد يوم رااائع الجمال
الناس بتخاف من الدفا ....
بتحس إنها دخلت دايرة أضيق من القرب
وانها غالباً مش مستعدة لده
وانها خايفة جداً وهتحط نقطة هنا وتمشي

بعد وقت هتلاقيه بيكلمك
وبيطلب تتقابلوا تاني ....
لو غضبتي وعاملتيه بسخافة
يبقى معندكيش ثقة بنفسك
وأول حاجة جت على بالك إنه مش بيحبك ولا حاجة
أو إنه مش عايز يبقى معاكي
أو إنك مش قريبة منه زي ما انتي متخيلة
أو إنك مجرد واحدة صاحبته زي ناس كتيير
وإنك مش شخص خاص بالنسباله

السيناريوهات دي مؤلمة
وعلى فكرة أنا بقاوم نفسي لما بتخطر جوايا بقوة
استحمليها بس ما تندمجيش معاها أو تصدقيها
وادي فرصة لبكرة ييجي على مهله



مفيهاش حاجة لما توقفي حد في وسط الكلام
وتقوليله إنه الجملة دي رااائعة
أو إنك أول مرة تشوفي النظرة دي في عنيه
انتي كدة مش بتعاكسيه
انتي كدة بتعبري عن اللي بيدور جواكي وبس
وصدقيني الناس دايماً محتاجين يسمعوا ويشوفوا تأثيرهم علينا

قولي الحقيقة دايماً حتى لو كانت غير مفهومة أحياناً

قولي مثلاً:
انك مش هتعرفي تعملي معاه شات
لإنك بتتعلقي بالناس بسرعة وبتصدقيهم أوي
والشات مجرد حالة كتابة بتعكس وش واحد بس من وشوشنا
ودا غالباً الوش اللي بنختار نعسكه
واللي غالباً مش بيمثلنا أوي ولا بيعبر عننا بجد
قوليله إنك محتاجة تشوفيه
علشان تتأكدي انه فاهم تقصدي إيه من اللي بتقوليه
وتفهمي كمان يقصد إيه من اللي بيقوله
قوليله انك بتتونسي بالناس بوجودهم الحي بابتساماتهم
مش بالكتابة ليهم في مربع صغير بائس



بلاش تاخدي نصايح أو إرشادات من حد
جواكي بنت فاهمة أوي ومدركة كل جاجة كويس جداً
سيبيها تحركك تجاه الناس واسمعي كلامها ...
الناس مهما كانوا قريبين منك وبيفهموكي
هيلخبطوكي جااامد لإنهم بيسمعوا منك عن فلان
بيسمعوا اللي انتي تعرفي تقوليه عن فلان
بس اللي انتي مش عارفة تقوليه هوة الأهم
وهو اللي بيحركك أحسن

اثبتي وخلي عندك ثقة بنفسك ....
خلي عندك إيمان ببكرة واقبلي كل حاجة وانبسطي
ومتسمعيش إرشادات من حد .... متسمعيش إرشادات من حد
الكلام ده ينطبق ع التدوينة دي كمان
:))))





...........

16 التعليقات:

كليشيه يقول...

"محدش بيفهمك من الكلام اللي بتحكيه عن نفسك
الناس بتحسك وتشوفك بطريقتها"

شكراً عشان شوفتيني , بطريقتك الخاصة جداً
شكراً

Salma Dahab يقول...

الفكرة كٌلها أن إنت تبقى انت ..مش حد تانى ..يااا التفاصيل الصٌغيرة اللى بتتكلميها عليها دى هى الحاجة الحلوة أصلاَ اللى بتبقى بين إتنين و بتبقى بسيطة و سهلة و تلقائية مش محتاجة حتى الواحد يفكر فيها بعد كده =)

ندى نصر يقول...

كلام جميل..

وكلام معقول..مقدرش أقول حاجة عنه

حقيقي أفدتيني كتير وسعيدة لأني اتعرفت على مدونتك

فعلا احنا بنقف عند الحاجات الصغيرة وبنعمل من الحبة قبة..لكن لما نسيب القلب لإحساسه هنشوف حياتنا أجمل

تقبلي مروري المتواضع..

إبـراهيم ... يقول...

ده ممكن يبقى كتيب إرشادات بجد، أحسن من الحاجات العبيطة بتاعة السنارة بتغمز والباااوي اللي ماليه البلد دي

.
بس خللي بالك إن كل بنت(أو ولد) بالمناسبة هتقع في مشكلة بسبب إحساسها ، هتيجي تشتكي لك

وساعتها هتبقى ماما غادة :) لبنات كثيييرااااات ....
.
.
وبعد كده ما تلوميش عليَّا على فكرة
.

وما تسألينيش قصدي إيه من التعليق ده

هه ... بـــــٍ


وما تضحكيش



.
أنا مش بهزر

aya يقول...

الله يا غادة

عارفة انتي عملتي ايه
انتي قلتي بصوت عالي كلام بقوله لنفسي بصوت وااااااطي بقالي سنين .. و خايفة اصدقه
انتي دفيتيني جدا .. و حسستيني بونس جدا ...

و فكرتيني بأيام مراهقتي اللي دلوقتي بقيت بحبها .. و بشوف فيها بنوتة حساسة و صادقة اوي .. بدور عليها دلوقتي

وحشتيني يا غادة بجد
:)))

رانيا مسعود Rania Masoud يقول...

حلو يا غادة أنا كنت منتظرة منك الخطوة دي من ساعة ما كلمتيني إنك هتكتبي نصايح في موضوعات تمس البنات. منتظرة المزيد
بنوتة

غير معرف يقول...

:)
حسام

نهر الحب يقول...

37pm شوفي بقي يا ستي
بصراحة كدة انا ساعات بعمل حاجات من اللي بتقولي عليها دي وبخاف وبندم لأني بحس ان العفوية دي بتتفهم غلط احيان كتير
كتير بكون عاوزة اقول اللي جوايا بجد بخاف يبقي ده غلط معرفش العيب في مين فينا واللا في تربيتنا اللي هلت الخوف جوانا ديما

عارفة من كام يوم حد غاب عني حوالي خمس ايام ولما شفته قلتله انت مجتش بقالك كتير ليه متقوليش انك بتيجي حسيت انه ابتسم وفرح وحس اني ملاحظة غيابه وانا فعلا ملاحظة غيابه وشرحلي كان غايب ليه
بعدها قلت لنفسي انا ازاي قلت كدة مكنش المفروض...اقول..بس كويس اني قلت الي جوايا من غير ما احطه جوه مربع المفروض اقول ايه ومقولش ايه
احيانا لما بنطلع الاحاسيس اللي جوانا بجد بجد برتاح

عمرك اتصلتي بحد وقالك كنت لسة هكلمك حالاً
أو كنتي سرحانة شوية وسط مجموعة بشر
ورفعتي عنيكي لقيتي واحد مركز معاكي جداً
دي إجابات

بصي حاجات كتير زي دي بتحصل بس ممكن من كتر الي حصل معانا نوصل لدرجة نخاف نصدق اللي حاسينه او اللي بنعتقد اللي قدامنا حاسه زينا عشان منتصدمش في الاخر ممكن ده يضيع فرص حب بجد وممكن نكون فعلا فاهمين غلط

فرحت بالنص ده اوي ولمستيني كالعادة
محتاجين نصايحك ديما تقريبا كدة محتاجة قعدةى طويلة معاكي
:))

Asmaa يقول...

غادة...
الكلام طالع من احساس حقيقى..و شعور بالغ القوة جواكى
القوة من الدفا و من الحب...
قولى كمان و كمان

مين جيلان بقى...؟

Lobna Ahmed Nour يقول...

غادة خليفة يا ست الحسن
أردت أن أشكركِ بحجم الروعة والحسن الذي تطلين به على الحياة

http://unique100.blogspot.com/2011/04/blog-post_16.html

شكرًا بحق

hanan khorshid يقول...

اووووووووووووو
بجد تجنن مش ممكن ايه التلقائية دى
حقيقي مذهلة
واحلى قطعة
........
الناس بتخاف من الدفا ....
بتحس إنها دخلت دايرة أضيق من القرب
وانها غالباً مش مستعدة لده
وانها خايفة جداً وهتحط نقطة هنا وتمشي

.................

Faten Ahmed يقول...

راااائعة لأقصى درجات الروعة...."لو غضبتي وعاملتيه بسخافة
يبقى معندكيش ثقة بنفسك
وأول حاجة جت على بالك إنه مش بيحبك ولا حاجة
أو إنه مش عايز يبقى معاكي
أو إنك مش قريبة منه زي ما انتي متخيلة
أو إنك مجرد واجدة صاحبته زي ناس كتيير
وإنك مش شخص خاص بالنسباله

السيناريوهات دي مؤلمة
وعلى فكرة أنا بقاوم نفسي لما بتخطر جوايا بقوة
استحمليها بس ما تندمجيش معاها أو تصدقيها
وادي فرصة لبكرة ييجي على مهله"

غريب جدا اللي بيحصل لي ان كل ماابدأ افكر التفكير اللي بتقوليه دا ويتمكن مني تجيلي حاجة ترجعني عنو..والمرة دي كلامك انتي اللي رجعني عنو...يا ترى دي إشارة؟..يا ترى فعلا انا صح؟...هحاول اثق بنفسي اكتر

على فكرة مش قادرة اتخيل ان الإرشادات دي للفتيات الصغيرات بس...انا 25 سنة وحاسة انو يكفيني اتعلم منو كمان 25 سنة قدام :)

الحلم العربي يقول...

جميلة قوي
أول مرة آجي هنا بس شكلى هاجى تانى إن شاء الله :))
حلوة حتة ماتسمعيش نصايح من حد
عارفة
زمان كنت بقول لنفسي ان مرارة البوح اقسي من ألم الجرح مهما كان
بعد فترة حسيت ان قلبي ابتدا يضيق عليه من كتر اللى جواه فبقيت ماشية بدلق اسرار في كل حتة يمكن اريحه لقيته بيتعب زيادة و زيادة
محدش يهمه يعرف غير اللى انتى عاوزة تعرفيهوله و محدش من حقه يعرف حاجة انتى عارفة كويس انك هتتجاوزيها ان شاء الله لوحدك من غير ارشادات معظمها بيبقى عقبة اتحطت في وسط طريقك
:)) اشكرك على التدوينة الجميلة دي

ست الحسن يقول...

جيلان

الشكر كله ليكي بجد
تسلمي

............

سلمى

عندك حق جداً
في الآخر مش بيتبقى غير التفاصيل الصغيرة

نورتي

..........

ندى

يارب تبقى أجمل يا ندى
يسمع من بقك ربنا

نورتي

............

إبراهيم

مبسوطة انه النص عجبك
ومندهشة

وعايزة أقولك إنه كل حاجة في الدنيا ليها تمن
لو هتمشي ورا إحساسك هتتعب جامد

بعدين
الكلام اللي انا كاتباه ده مفيد لعدد قليل من الناس بس
بقية الناس بيدخلوا النفق وبيتم تعليبهم جوة أفكار وطرق ثابتة

كل الناس اللي التدوينة دي قريبة منهم
خارج القطيع تماماً

ما علينا

طب سؤال
لما أحب أشتكي أنا بأة

أروح لمين ؟


.............

آية

انتي فين بس
وقفلتي المدونة ليييييييية؟

وانتي واحشاني جااااامد جداً

...........

رانيا

مبسوطة إنه التدوينة عجبتك

نورتي

......

ست الحسن يقول...

حسام

شكراً لمرورك

...............

نهر الحب

مبسوطة إنه النص عجبك
وعايزة أقولك إنه المخاوف اللي جوانا ليها منطقها بردو
بس احنا لازم نقاوم

مش عارفة أقولك إيه
السكة دي في الحياة صعبة
محدش بيمشيها غير المظطرين بس

أقصد سكة إنه الواحد يتبع مشاعره
لأنها مليانة ألم وجماااال

نورتي

...............

أسماء

أولاً شكراً على التعليق ده
إنتي خليتيني أفكر في كلامك
عندك حق أوي
النص ده كان محتاج نقطة قوة علشان يطلع
وكان محتاج حب


عن جيلان بقى

دي بنوتة اسكندرانية عندها 19 سنة
شفتها مرة واحدة بس
وحسيت إني قاعدة مع نفسي لما كنت قدها

فيه شوية سحر حصلوا خلوني أرجع أتصل بالبنت اللي كنتها من زمااااان
والنص ده هو الدوا اللي غادة الصغيرة كانت بتدور عليه ومكانتش لقياه

بس كدة

دا لينك مدونة جيلان
http://jailanelshafie.blogspot.com/

شكراً يا أسماء

............

حنان

مبسوطة إنه النص عجبك
تسلمي

..............

فاتن

بصي بأة

مسألة الفتيات الصغيرات دي ملهاش دعوة بالسن
لو انتي حاسة انك محتاجة التدوينة دي
تبقى فتاة صغيرة
وحتى لو بالسن
انتي لسة كتكوتة

شكراً أوي على مرورك المبهح في المدونة
قريت كل تعليقاتك على النصوص اللي فاتت وفرحت بيها خالص

شكراً جداً
اهتمامك فرق معايا بجد
تسلمي

...............

الحلم العربي

انتي تنوري دايماً

وبالنسبة لمسألة البوح
ساعات بنبقى محتاجين نسمع نفسنا بوضوح
وبنحتاج حد يتعاطف معانا ويسمعنا بحب
دي متهيألي حاجة مختلفة عن الإرشادات اللي البنات عادةً بيتبادلوها سوا

نورتي

.......

أسوار القلب يقول...

متأخر اوي البوست دا ياغادة ياريتني قريته من 10 سنين كان زماني معنديش وقت ولا صبر اقرا حاجة تانية .. كان زماني عندي شواغل أهم وألذ مع كل احترامي وشعوري باللي بتكتبيه لكن كنت عشته بدل ما اقراه .. بدل ما عشت رافعة فوق راسي لافتة تحذير " ممنوع الاقتراب او الاقتراب "