الثلاثاء، 5 أكتوبر 2010

الدنيا من الناحية التانية




.


.

ساعات بصدق إنه الطريقة اللي بفسر بيها الدنيا
هي مجرد خيال واسع بيساعدني اني اعيش أبسط
المهم اني أقول حاجة جديدة لنفسي

هتكلم عن الحب من طرف واحد
للمرة الأولى عندي الشجاعة اتكلم من الناحية التانية
ناحية المحبوبة اللي مش بتحب الطرف التاني

الغريب ان الوضع ده صعب هوة كمان ومتعب

متعب لحظة وجود المحب
في لحظة عدم وجوده مفيش حاجة مؤلمة
الحياة ماشية عادي
ومش حاسة إني بعذب حد معايا مع انه متعذب
ومش حاسة إنه فيه حد مستنيني مع انه مستنيني

واحد صاحبي محبوب بطريقة مش طبيعية
ودايماً بيبقى مش بيحب الطرف التاني
مرة قالي: أحسن طريقة للتعامل مع الحكاية دي التجاهل
صحيح قاسي بس رحيم
مش عارفة ليه مش قادرة أحس ان التجاهل رحيم
بأي شكل من الأشكال

عشت وقت طويل أتجاهل مشاعر الناس
وأتجاهل مشاعري
وصلت لحالة من التجمد الشديد
احتجت بعدها نار مرعبه علشان أرجع في الحالة الطبيعية
وأكسر صندوق التلج اللي عشت جواه سنين

مبسوطة طبعاً انه فيه حد بيحبني
وحاسة بالزهو شوية ومش خايفة عليه خالص
حاسة انه محتاج وجع زي ده وألم علشان يكبر
يستوي .. علشان يعرف هو مين
بفتكر فيلم "رسايل البحر"
لما بسمة كانت بتقول: يحيى محتاج يتألم علشان يكبر
بس بسمة كانت بتحب يحيي وانا مش بحب يحيي
ع الأقل مش بحبه بالطريقة اللي هوة عايزني أحبه بيها

- انت بتحبني
- بتسألي ليه
- علشان حاسة بكدة
أصل الحب ده بتاع ربنا ومش بإيد حد
ومحدش بيختار يحب مين
- انتي بتحبيني
- .......................
- طب ما تديني فرصة
قربي منى ...اعرفيني
- حاولت والله بس الموضوع محسوم
يمكن يكون الغلط عندي ومشاعري هي اللي صعب تتحرك

- انتَ تستاهل أحلى بنت في الدنيا
- ماهو انتي أحلى بنت في الدنيا
- وبعدين معاك
متضيعش عمرك تستناني
استحمل مشاعرك واصبر عليها شوية
وقريب أوي هتقابل الجميلة اللي تستاهلك
أنا متأكدة


مش سهل أبداً اننا نواجه مشاعرنا
بس الحقيقة عمرها ما بتجرح
الحقيقة بتشفى وبس



..........

9 التعليقات:

P A S H A يقول...

مش سهل نواجه مشاعرنا والأصعب إننا نوجهها
:)

نهى جمال يقول...

الدنيا من الناحية التانية

الدنيا التي نحمل ذنبها

حاجة كده ماينفعش تقوليلها
غير " أيّ " !

إنه الحب .. ضحاياه مش دايماً اتنين بس
صباحو ورد :)

حلم بيعافر يقول...

لاء التجاهل رحيم على فكرة

كريم بهي يقول...

فى الحقيقة انا لا اعتبر الحب مرداف للدنيا
او حتى بحجم الدنيا
ولكن اعتبر الحب اكبر من الكون
اما فكرة الحب من طرف واحد
فانا عندي نظرية روحية فى الموضوع دا هي
" كل العاشقين مفارقون مخلدون "
بدعيكي تقري قصيدتي " شق روح .. تراتيل عن العشق والفراق "
في مدونتي
او على الينك دا
http://roaua.net/art-3568-0-%D8%AA%D8%B1%D8%A7%D8%AA%D9%8A%D9%84%20%D8%B9%D9%86%20%D8%A7%D9%84%D8%B9%D8%B4%D9%82%20%D9%88%D8%A7%D9%84%D9%81%D8%B1%D8%A7%D9%82%20.html

يمكن تلاقى حاجة تعجبك او تقارب احساسك وتفكيرك على الموضوع دا
*
تحياتى لك كبيرة وعميقة
اسعدتنى الزيرة لمدونتك
واسمحي لي بالزيارة من وقت لاخر
كريم بهي
شاعر
معيد ادارة الاعمال جامعة بنها

bosy يقول...

عجبتني اوي
ساعات بصدق إنه الطريقة اللي بفسر بيها الدنيا
هي مجرد خيال واسع بيساعدني اني اعيش أبسط

عشت وقت طويل أتجاهل مشاعر الناس
وأتجاهل مشاعري
وصلت لحالة من التجمد الشديد
احتجت بعدها نار مرعبه علشان أرجع في الحالة الطبيعية
وأكسر صندوق التلج اللي عشت جواه سنين اد ايه رائعه
فعلا انا بستغرب دايما اللي تحبه بيحب حد تاني واللي بيحبك انت مش قادر تحبه سبحان الله

احلام جوليا يقول...

اظن ان التجاهل رحيم فعلا فصعب تخبري انسان انك لا تشعرين به وانت متاكده من انه يحبك الافضل التجاهل فقد جرحتي قلبه فلا تجرحي كرامته كذلك

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى
www.ouregypt.us

قهوة بالفانيليا - شيماء علي يقول...

صح ..
الحقيقة مش بتجرح ..:)
هي بتشفي بس .. :)
عجبني البوست دة .

ست الحسن يقول...

باشا

منور المكان بجد

...

نهى

سلامتك من الوجع يا جميلة

....

حلم بيعافر

من زواية تانية التجاهل مرعب
لإنه مش دايماً بيتفسر بالطريقة دي
فيه مليون طريقة تقدر تفسر بيها برود مشاعر اللي أدامك
ولو كنت بتحبه هتلاقيله ميت عذر

وتفضل تحاول وتستنى وتضيع عمرك
الوضوح جميييييييييل أوي
على الأقل من الزاوية بتاعتي

جايز يكون رحيم من زوايا تانية


...........

كريم

نورت المدونة
وأتمنى تمر من هنا تاني
دخلت عندك
وهتلاقي تعليقي قريب

شكراً لاهتمامك

.........

بوسي

تسلمي
وعندك حق ساعات الدنيا بتبقى معقدة أكتر من اللازم
بس بتتحل كل الحاجات مع الوقت

هستناكي بعد كدة


........

جوليا

إيه علاقة الكرامة بالحدوتة دي
الحب ده مش اختيار أصلاً دا قدر
يعني مينفعش حد يختار انه يحب حد
أو يختار أنه ميحبش حد

المشاعر بتحصلنا
احنا بنختار بس ردود فعلنا تجاهها
بنختار نتصرف إزاي معاها بس

وبعدين
أنهى أحسن
يتوجع شوية ويستحمل مشاعره
وبعدين يتجاوز الأمر ويحب حد تاني
ويعيش

ولا يقعد مركون في حتة غلط
مستني حاجات عمرها ما هتحصل
يحاول ويحاول ويحاول فيها من غير فايدة

جوليا
الحقيقة بتشفي بجد
أنا أختارها
ووالله حياتي هتبقى أحسن
لو حد بحبه قالي
على فكرة مش بحبك


يسلملي وجودك

...

شيماء

تسلمي يا قمر


...