الأربعاء، 17 مارس 2010

أنا كسبت يا جدعاااان

.

.






.
.


وحشتني المدونة أوي
والمفروض أكتب نص فرحان ومزأطط
كسبت أول جايزة ف حياتي – احتمال تكون الأخيرة بردو محدش عارف –

الملتقى العربي لقصيدة النثر
كان عامل مسابقة للدواوين اللي صدرت 2009 / 2008
وانا اشتركت وفوزت أنا و3 تانين من زمايلي
وآه كانت مفاجأة جامدة
وانبسطت ان وديع سعادة بنفسه سلمني درع الملتقى
واديته نسخة من الديوان "تقفز من سحابةٍ لأخرى"

المفروض أكتب عن الباب اللي بيتفتح جوة فجأة
فتبقى فرحان ومتلخبط وخايف وتايه في نفس الوقت

واكتب عن الحضن الكبير
اللي ادتهوني "هبة اسماعيل" صاحبتي الجديدة
اللي جت حفل الختام بالصدفة وفرقت معايا أوي
لأنها كانت اختصار لكل الناس اللي كنت عايزاهم يبقوا معايا
احتفلت أنا وهبة مع الزبادي بالتوت احتفال رااائع

المفروض أكتب انه الفوز ده علامة علشان أكمل في السكة دي
وطبطبة جامدة أوي جاية ف وقتها جداً

وانا كل اللي عايزة أكتبه إني مبعرفش أفرح
لأنه مفيش راجل ممكن أجري عليه وأترمي ف حضنه وأصرخ
كسبت يا بابااااا كسبت

ممكن أقف هنا ؟
خلاص التدوينة دي خلصت

أصلي بقاوم بقالي يومين
ومش عايزة أكتب اللي هكتبه دلوقتي

فاكرين الأفلام اللي فيها حدوتة صعبة
بتنتهي بفريق بيفوز بعد صعوبات شديدة
أو بممثلة بتاخد الأوسكار فى آخر مشهد
أو طفل بيحقق رقم جديد في الأولمبياد

فاكرين إحساسكم ساعتها
أنا بحس بانتصار قوى وبفرح وبدموع كتيرة
وبفكر أنا ليه مبعملش كدة أبداً

بس أنا فزت
صحيح مش زي الأفلام بحاجة كبيرة
لكن حصل
بس اللي محصلشي
هي انه مشاعري مكنتش شبه الفيلم خالص

قلبي كان مفتوح ع الآخر
وشفت كل الحاجات في كام لقطة كدة
كل الألوان مع بعض
الفرح مع الوجع مع الخوف مع الدهشة
كله مع بعضه
بس المُحصلة النهائية كانت دموع
بس مش زي بتاعة الفيلم
كانت دموع محبوسة بقالها زمن طوييييل

"محمد رضا فريد" أستاذ العربي اللي كان بيديني ف ثانوي
كان هيفرح بيا أوي
الله يرحمه .... كان نفسي أشكره واحضنه جاااامد

أنا نكدية شوية عادي يعني
اتعودت على نفسي
وابتديت أتأكد إن الأفلام اللي بصدقها أوي دي
هي اللي بوظت دماغي
لأني بقارن دايماً تأثير الواقع بتأثير السينما
فبتطلع السينما أجمل
وافضل اتخانق مع الواقع وازعل منه

أختي قالتلي في السينما بيختصروا حياة كاملة ف ساعتين
فطبيعي المشاعر هتبقى مركزة أوي
وكل حاجة هيبقى ليها طعم تاني
هوه ده الفن أصلاً
يعني انتي مثلاً بتكتبي عن الحب
اللي يقرا ده يقول حبِّيبة بقى وعايشة
بس الواقع إيه

الواقع إيه
الواقع إني كنت فرحانة ومتلخبطة
وماشية في الشارع الضلمة اللي في الزمالك
بقول هيييه ...هيييييه




.....


.


.

18 التعليقات:

Mahmoud Ahmed يقول...

الف مليون مبروووك
بس عاوزين نسخه طيب ولا حتي شويه مقتطفتات من الديوان كده

او ذبادي بالتوووت ^_^
يمشي برضه عادي

اميرات الاسرار يقول...

الف الف مبرووووووووووووووووووك
ويارب من نجاح لنجاح

دمتى بخير زهراء

سعدية صديق يقول...

مليون مبروك يا قمر

ربنا يفرحك كده على طول يارب

:)

عين فى الجنة يقول...

مبروك

Unknown يقول...

ألف ألف مبروك يا غادة :)
يا رب تكسبي على طول كدة :)
و تبقي تاخدي جوايز ..
عشان تفضلي فرحانة :)

مصطفى عبدربــه يقول...

ألف ألف مبروك

بجد..

أهم انجازات المؤتمر :)

وبالتوفيق دايما

إبراهيم شعبان يقول...

ألف مبرووووووك يا غادة،و عقبال ما تكسبي تاني و تالت و رابع و.....

بحلم يقول...

ألف مبروك يا سكر
بحب كلامك وبصدقك
يارب تعرفي تفرحي لأنك تستاهلي

Unknown يقول...

مبرووووووك

هديك قبل يومين كنت بتصفح ديوانك
واليوم سمعت هالخبر الحلو

منها للأحسن منها إن شالله:)

على باب الله يقول...

الف مبروك

نهر الحب يقول...

فرحتلك اوي اوي اوي
الف مبروك وبصراحة كان المفروض اقولها من زمان
لكني كنت مستنياها هنا في المدونة مش عارفة ليه

حلو احساسك اوي وان شاء الله جوايز كتيرة اوي في الطريق
:))))))))

غير معرف يقول...

rania masoud
أنتِ فرحتنيني و أبكيتيني
مبروك يا حبيبتي على فوزك و يا رب دايماً بس كنت أتمنى تدعيني لمناسبة جميلة زي دي.
أبكيتيني لأني افتكرت اليوم اللي كنا فيه واقفين في طابور الصباح بعدحادث قطار الصعيد و تقف أستاذة زينب أحمد إسماعيل مديرة المدرسة و خلفها الناظر و يعلنون وفاة أستاذ دمعت أعيننا عليه و لم نره. تناقشت معه و جادلته في المكتبة في حصة من كن يكبرنني بعامين...كن صراعاً على التشبه بالرجال في ارتداء البنطال.. بعدها أتمنى لو لم تكن كلماتي، أو لو كانت أطول...
لست أدري....!!
في كل مرة تذكريني به!
أحاول أن أنساه ببشرته السمراء و شعره المجعد..
أحاول أن أنسى أن زميلة زميلاتي كانت له زوجة
أحاول أن أنسى غرفته التي احتلها أ.إيهاب أكثر من بكاه بحرقة يوم أعلنت وفاته بالمدرسة.
رحمة الله عليه.
و رحم الله أ.ناهد مدرسة الفلسفة التي ماتت بعده بقليل بمرض السرطان.
و رحم الله أستاذي المحترم أ.سيد فريد مدرس الإحصاء و الرياضيات.

islam yusuf يقول...

ألف مبرووووك يا غادة

بجد تستاهلى كل خير و فرحت أوى

هيا النصوص نزلت فى الكتابة الأخرى و اللا لسة، و هل نزلت لى نصوص
لو كده يبقى شرف ليا انى ينزل لى نصوص فى العدد معاكى

nudy يقول...

دودو انا زي ما انت عرفاني وزي ما بتقوليلي دايما متأخرة ولكن نعمل ايه علي ما عرفت اصحي من النوم يوم الاجازه

انا مش عارفه مش فرحانه ليه سبحان الله مع ان مفيش اي حاجه تزعل ابدا والوافع وردي وردي وردي

سيبنا بقي من التريقه وقله الادب ونتكلم بجد الجايزه دي يا غاده فرحتني فوق ما تتخيلي ورغم زعلي من عدم وجودي معك ولكن انا فرحت قويييييييييييييييي وعارفه انك تستاهلي الجايزه دي انت تعبتي قوي ومن حقك التقدير انا عارفه اد ايه الديوان ده اخد من روحك اللي دايما طالعه في كتابتك وده اقل تقدير

عقبال الديوان الجاي واللي بعده وانت دايما طريقك مفروش بالجوايز والسعاده

دمت لي في فرح وسعاده يا حبيبتي

غير معرف يقول...

السلام عليكم
هذه خطوة ممتازة
أتمنى لك كل توفيق
وصدقيني الحياة حُلوة وتستحق الفرحة
فقط تذكري أن الله لا يُضيع أجر من أحسن عملا

سمراء يقول...

مبروك
لازم تكوني متأكدة انك تستاهلي

حقيقي تستهليها

استمتعي بنجاحك

اتمني دوامه


سمراء

إيناس حليم يقول...

الف مبروك :)
اول زيارة ليا لمدونتك بس لفتتني الفرحة قلت اهنيكي :)
اسم الديوان شدني هحاول اجيبه قريب ان شاء الله
تحياتي

ست الحسن يقول...

سبايدرمان

الله يبارك فيك يا افندم
تسلم
وان شاء الله هنزل أجزاء م الديوان قريب

زيادي بالتوت
كدة تبقى داخل على طمع

نورت يا افندم

......

أميرات الأسرار

الله يبارك فيكم
وتسلموا

ونورتم خالص

....

الست فرويد

يا أهلاً وسهلاً
نورتي المدونة في أول زيارة يا افندم

متشكرة أوي
وياريت تزورينا دايماً


.....
راجي

الله يبارك فيك تسلم
مفتقدة تعليقاتك الجميلة بقالي فترة

نورت يا افندم

.....

شيماء

تسلمي يا قمراية
ويارب دايماً مبسوطة وجميلة زي ما انتي كدة


....
مصطفى

حلوة أهم إنجازات المؤتمر دي
تسلم يا افندم وربنا يخليك
فرحتني والله ونورت المكان

.....

إبراهيم

تسلم يا افندم
وانت كمان عقبالك
ربنا يخليك

.....

هناء

تسلمي يا ست البنات
وانا كمان بحب وجودك
ولازم أفرح طول ما فيه ناس زيكم حوالية

تسلمي يا جميلة

....

مياسي

الله يبارك فيكي يا قمراية
تسلمي يا حبيبتي


....

على باب الله

الله يبارك فيك
تسلم
متشكرة أوي يا جيمي


....
سهاد

وانا كمان بحب المدونة أكتر
وبشتاق لها لما أغيب عنها

تسلمي يا جميلة
ربنا يسعدك

....

رانيا

مش عارفة أقولك إيه
ربنا يرحم أمواتنا جميعاً

والله يبارك فيكي ويسعدك
ومعلش مكنتش عارفة قبلها فمعرفتش أقولك يا جميلة

تسلمي يا ست البنات

.....

إسلام

انت اختفيت فين
مش موجود خالص على الفيس بوك
ونصوصك وشهادتك اتنشروا في الكتابة الأخرى

وتسلم يا افندم
وعقبالك

......

نودي الجميلة

أكتر حاجة فرحتني ف حكاية الجايزة دي هي فرحتك انتي بيها

تسلمي يا جميلة
ربنا يخليكي


.....

أحمد شريف

أهلاً بيك في أول زيارة واتمنى متكونش الأخيرة
ومتشكرة أوي ربنا يبارك فيك

نورت يا افندم

.......

سمراء

ربنا يسعدك
متشكرة أوي ع الدعم الجااااامد ده

تسلمي
وفرقتي معايا جداً

.......

إيناس

أهلاً وسهلاً بيكي في أول زيارة
متشكرة لوجودك وتهنئتك
واتمنى تقرى الديوان وتقوليلي رأيك يا جميلة

نورتي يا افندم

..