الخميس، 27 نوفمبر، 2008

Help







أنا مش عايزة أكتب اللي هكتبه ده
كنت عايزة أكتب حاجة دمها خفيف أي حد يقراها يبتسم
أو على الأقل أكتب كلمات أغنية بحبها
أو أحط صور عيال بتجري ورا بعض
أكتب قصيدة أو قصة أو أي مقطوعة أدبية
أي حاجة .... أكتب أي حاجة غير اللي انا هكتبه دلوقتي


بصوا أنا معنديش رغبة في الشكوى ومبحبهاش وبكره الكآبة
ومش عايزة أوصف حاجات تقريباً كل الناس غرقانين فيها
مش هحكي ع الشغل اللي كل ما يبتدي يقوم يقع تاني
ولا عن الولاد اللطاف جداً اللي بقعد معاهم وبتدفا جداً
والنتيجة زي ماهي صفر .. صفر
مش قادرة أحكي عن البيت المضلم ولا عن الشمس اللي بتمشي بسرعة
ولا عن الأكل اللي من غير طعم
يمكن أكون بحب أحكي عن الأحلام الطويلة اللي مبعرفش أصحى منها
ويمكن بحب أحكي عن الخيال اللي بيدفيني كل الوقت

بس للأسف
الحاجة الوحيدة اللي لازم أكتب عنها
واللي مش قادرة مكتبش عنها
That I need some help

بالظبط
أنا محتاجة مساعدة ومعنديش أي فكرة أطلبها من مين
لأني بطلبها على طول وبتيجي أحياناً بس الأمر مبيتحلش كله
أجزاء منه بتتحل وأجزاء بتختفي
بس الدنيا لسة ضلمة

أنا محتاجة مساعدة أوي
وعارفة ان اللي بقوله ده باين عليه ملوش معنى
لأني مش بكتب تفاصيل المشكلة أو ايه نوع المساعدة اللي انا محتاجها
ولو حد سألني
فيه إيه برده مش هيلاقي عندي إجابة
...
عادي يعني ان الواحد يكون مش قادر يحكي
بس عارف انه محتاج مساعدة ...
صحيح مش عارف ايه نوع المساعدة اللي هو عايزها
بس متأكد انه محتاج مساعدة

ما هو انت لما تحاول بكل الطرق المعروفة وغير المعروفة انك تساعد نفسك ومتعرفش
يبقى انت محتاج مساعدة

ولما تستعين بكل الناس اللي تعرفهم وتسأل حتى الناس اللي متعرفهمش وبرده متقدرش
فدا معناه انك محتاج مساعدة

لو انا دخلت بلوج وقريت الكلام ده يمكن مفهموش أوي
بس هيبقى عندي رغبة اني أساعد البني آدم ده
ومش هاعرف أنا ممكن أعمل ايه

أنا بقى هاقولكم تعملوا ايه
ادعوا لي



.......................

5 التعليقات:

msafa يقول...

ههههههههههههههه رائع ده بس يعنى سيبى ولو خيط رفيع علشان اللى عايز يساعد يساعد

أنا يقول...

و مين محتاج مساعدة و بتجيلوا ف الوقت المناسب؟؟
مش أنتى بس بجد ..أنا عن نفسى بمر بالحالة ديه كتير و العالم بيفضى عليا مرة و احدة

ربنا معاكى

nudy يقول...

اول ما خلصت قراية البوست وقريت ادعولي الفحر قال الله اكبر ودعيت لك والله كثير قوي

ست الحسن يقول...

مسافة

دي زيارة حضرتك الأولى هنا
أتمنى تكون لقيت في المدونة حاجات عجبتك
بما انك يعني تشكيلي وبتكتب
طبعاً أحب أعرف رأيك بالتفصيل

ويارب متكونش الزيارة الأخيرة

.........

أنتي

تصدقي عندك حق
كلنا في نفس المكان

كلامك خلاني أفكر كتير
بجد نورتي

وربنا معانا كلنا

......

نودي

يا حبيبتي ربنا يخليكي ليا
وانا متأكدة انك دعيتيلي من قلبك
ربنا يستجيب

ويجعلنا مخرج جميعاً

وجودك دايماً جميل

Blank-Socrate يقول...

انا حاسس بيكى
الموضووووووووووووع كبير
ربنا معاكى
تحياتى
نفسى اتكلم اكتر من كدا
لكن للاسف انا مش تمام محتاج مساعدة علشان اقدر اتكلم
:)