الجمعة، 19 سبتمبر 2008

يوم غريب




النهاردة اليوم كان غريب جداً
واحدة صاحبتي كانت مسافرة تشتغل في الخليج ( لوحدها )
ونزلت أجازة في رمضان وراجعة تاني
اتغيرت كتييييير
كل كلامها عن أسعار الحاجات وأحدث أنواع العربيات
وكمية العرسان اللي اتقدمولها هناك
وطريقتها في التفكير فيهم
ده اسمه بلدي والتاني معندوش غير عربية واحدة
والتالت حيطة وشكله مش هيبقى لطيف جنبها

طول الوقت الكلام عن الفساتين السوارية اللي جابتهم
وعن انها مجتش بفلوس لأنها صرفت كتير أوي هناك

وطبعاً الكلام عن نضافة البلد البعيد وتكييف البلد البعيد و .......
مسألتش علينا ولا سؤال
ولا سألت على أي حد

أصل احنا في النهاية يعني هيبقى تمنَّا كام ؟؟
مهما كان هتقدر تشتري تلاتة من كل واحدة فينا
وتركنهم لما تعزهم

هو للدرجة دي احنا بقينا قليلين
انا حسيت ان حكاية البحث عن الذات وطموح البني آدم
والبحث عن شخص يكملنا ويحقق أحلامنا
والمعافرة بس علشان نقدر نضحك وسط دا كله ومنيأسش
كل ده وهم كبير الغلابة اللي زينا مصدقينه بس علشان يعرفوا يعيشوا
بس الحقيقة ان احنا منسواش حاجة أبداً

على فكرة صاحبتي اللي انا عارفاها مرجعتش ...
تاهت في البلد البعيد
اللي جت واحدة شبهها بتحسب كل حاجة
هتدفع كام وهتاخد كام

يااااااه
دا انا اتوجعت أويييييي




..............

5 التعليقات:

آيــة يقول...

ده انا اللي اتوجعت اوي من كلامك ..

لا على فكرة احنا نسوى كتير
و كتير اوي كمان
اللي يفارقنا و يبعد عنا و ميقدرناش زي ما نستاهل
هو الخسران .. و اكتر منا كمان

عارفة انا دايما بفكر .. اذا حد كان قريب و بعد .. فاحنا خسرنا .. بس هو كمان خسارته متقلش عننا ابدا.. بالعكس .. احنا بنفضل غاليين لان احنا .. احنا ..

محدش عند نفسه رخيص ... و ده من كرم ربنا علينا

البعد بيغير .. و الحياة المادية بتخلي اللسان يتغير و التفكير و الاولويات ...

رغم كرهي لكل ده ..

ارجع اقولك ..

يابختنا اننا غلابة .. في بلد غلبانة ...

غلابة اه .. بس احلامنا حلوة ... و طعمها حلو ...

ربنا يرجع صاحبتك بالسلامة :)

العنكبوت النونو يقول...

ما تلوميهاش على فكرة
اصلنا هنا بيتداس علينا قوي فالنفس هناك بتروح تكتشف انها لسة متداس عليها فترجع برغبة ملحة انها تدوس على اي حد
لو كنتي مكانها يأما ما كنتيش هتستحملي هناك وترجعي نهائي يأما هتبقي كده
دي طريقتها في التكيف فماتلوميهاش
هي الخسرانة نفسها قبل ما تخسركم
احنا غاليين قوي اغلى كتير من الفلوس عشان كده مهما كانت هي بالنسبة لنا وسيلة مش غاية وعمرنا ما هنرخص نفسنا لدرجة اننا نتقارن بيها

nudy يقول...

ghadahendطول ما فيه ناس لسه بتقول لا ح هنفضل غاليين قوي شكرا لاني لقيت رد علي سؤال جالي النهارده وهو ان مدرسين زمايلي عاوزني اكون زيهم ادي الحصة السنة اللي فاتت ب 25 جنية زالسنه دي ب 50 ومصرين اكون زيهم انا دلوقت عرفت اني لازم اقول لا وطول ما فيه حد بيقول لا ح نفضل غاليين وعلي فكره انا مش الزحيدة فيه لسه ناس ما بتبعش نفسها

ست الحسن يقول...

اية مش هنا

لأ انتِ دايماً هنا موجودة وغالية
بس عجبتني أوي كلمة ( ربنا يرجعلك صاحبتك بالسلامة )

تسلمي


................

العنكبوت النونو

تصدقي عندك حق
محدش يعرف لو كان مكانها كان هيعمل ايه

طبعاً انتِ عارفة انك منورة دايماً


.............

nudy

مش عارفة أقولك ايه
بس الواحد لازم يعرف كويس هو مين وعاوز ايه
ومن غير كده هنتووووه كتير

عموماً لازم نفكر ان فيه ناس زينا بيكافحو ويتعبوا علشان يعرفوا يعلموا ولادهم
منبقاش احنا والظروف عليهم

أنا متأكدة انك هتتصرفي صح

Blank-Socrate يقول...

حصل نفس الكلام مع واحد صاحبى
الثراء شىء جميل لكن لو هو الهدف
فاكيد اننا هنخسر نفسنا و تبقى قيمتنا رخيصه قوى قوى