الأربعاء، 12 مارس 2008

ليه مبقاش فيه ثقة بين الناس وبعض ؟

النهاردة أنا حاسة ان استقبالي للحاجات فيه حساسية عالية .

مثلا افتكرت حاجة مهمة حصلت وانا عندي 8 سنين ، كان عندنا ابن جيران أكبر مني ب 9 سنين وكنت بحبه أوي ومقلتش لحد خالص على الموضوع ده إلا لأختي وبعدين أفتكر في مرة كنا عندهم أنا وأختي ومامته كانت موجودة وبعدين أختي قالت له اني باحبه كلهم انفجروا في الضحك وأنا وشي جاب ألوان وكنت مكسوفة أوي ساعتها هو قالي انت مقلتليش ليه مش اللي يحب حد لازم يقوله .

من ساعتها وانا بطلت اعترف اني بحب حد أبداًً ولا اشتكي لحد من أصحابي لدرجة اني عمري ما قلت لولد اني بحبه أبداً بالرغم ان أنا حبيت ناس كتير بس عمري ما كانت عندي الشجاعة اني أعترفلهم
بدأت أفكر اني عمري ما بقول للناس بجد ايه اللي واجعني لأني بتخيل دايماً إما ان أنا أبقى غير مفهومة وإما أتعرض للأذى، فبقيت بعيدة بعيدة أوي محدش يقدر يأذيني وكمان محدش يقدر يدفيني

يااه
كل الوقت ده ضاع
كل الوقت ده وانا مش قادرة أعيش مشاعري الحقيقية لأن الناس هتقول علي كئيبة أو غريبة المهم اني محدش هيحبني

دلوقتي بس عرفت ان عدم الثقة في الناس آخرته انك مبتقاش واثق بنفسك أو حتي شايفها صح ولا بتسمح لنفسك انك تحب وتتحب

1 التعليقات:

Me...No One Else يقول...

ياغدغودة...

انا برضو بحس كده

اانا حبيت كتير ومكنش عندى الشجاعه انى اقول!

معرفش بالظبط حادثه خلتنى مثقش فى الناس

بس هو انا مبثقش فى نفسى لدرجه معينة..

مش عارفة انا كده بجد ولا عشان مفيش مواقف تخلينا نثق فى نفسنا ولو حصلت هنثق؟

تفتكرى النقص فينا ولا فى المواقف اللى تثبتلنا نفسنا ؟