الأربعاء، 2 مايو، 2012

full makeup

.





. .

.

بتسمع ماجدة الرومي وهي بتغني: أنا قلبي دليلي
وكل ما تخلص تعيدها تاني

دموعها نازلة من غير سبب أو لأسباب كتييييير أوي .... متعدش

النهاردة مراحتش العباسية
ولا ناوية تروح مع إنه الناس اللي بتموت كل يوم بتوجع قلبها أوي

وبتتمنى تكون معاهم علشان متطرش تشوف الصور دي تاني


امبارح كان فيه واحد بيقولها اتعلمي إزاي تبقى ست
هاعرفك على واحدة شقية موت

اتعلمي منها أي حاجة
ولأنها جبانة بزيادة ماعترفتش لنفسها إنه الراجل دا جرحها أوي
وقعدت تقول ميقصدش طبعاً ... إحنا اصحاب
بس بعد ماراحت تقابل البنت
معرفتش تعمل إيه في نافورة الدم اللي انفجرت من صباعها
وهي بتغسل الكوبايات في بيت أختها

أختها اللي شافت حاجات كتير بتعدي على وشها
ومكانش فيه وقت تسألها : مالك؟


الحدوتة دلوقتي بقت قليلة الأدب أوي
عايزة تروح هناك تموت مع الناس اللي بتموت
مش علشان عندها ضمير وعايزة تدافع عن الناس اللي بتموت من غير ذنب

خالص
أهي عايزة تنتحر بحيث يكون ليها لازمة
بس هي جبانة
الصراحة أجبن من إنها تتحرك من قدام جهاز الكمبيوتر

المفروض تدور على شغل بأة
لأنها محتاجة فلوس تجيب بيها لبس ملون علشان الناس يشوفوها حلوة

وميشوفهاش حادة وصوتها عالي وبتخوفهم

أيوة هيبقى فيه فلوس
علشان تجيب علبة مكياج كبيرة
وتغطي وشها كله بكريم الأساس والبودرة

لكن كل دا مش هيغير حاجة في مصير الناس اللي بتموت في الشارع
ولا هيخلي ماجدة الرومي تعتذر انها بتغني أغاني مش بتاعتها



...

painted by: Alexander Sigov


....

5 التعليقات:

ملا البحر يقول...

احيانا بيكون الانتحار وسيله غير مشروعةلانهاء حياة بلا جدوى لكن الافضل محاولة انهاء حياة بلا جدوى بحياة تستحق ان تحيا....جميلة اوى يا غاده جميلة انتى وجميلة كتاباتك دايما فى تقدم ان شاء الله

سابرينا يقول...

اتعلمي إزاي تبقى ست!
أدعو له من كل قلبي ان يتزوج مثل تلك"الست"
ساعتها بس هيعرف!

ست الحسن يقول...

ملا البحر

عندك حق أوي
وتسلمي كتيييييييييييير
شكراً ع الدعم والمحبة


....

سابرينا الجميلة

:)))))))))))

نورتي والله

...

غير معرف يقول...

دي معاكسة رسمي من الولد اللي قالك كده
http://www.youtube.com/watch?v=thtQNG29FjQ

غير معرف يقول...

http://www.youtube.com/watch?v=thtQNG29FjQ