.
تسكب جمالها دون طائل
دا الديوان التاني وما أدراكم ما الديوان التاني
بعد ما الديوان الأول ما نزل السوق من 3 سنين كدة ( تقفز من سحابة لآخرى)
كنت فرحانة أوي وعندي توقعات كتير أوي بخصوصه
أقلهم إنه هيتنافش والناس هتكتب عنه
اللي حصل إنه الديوان واجه مشاكل في التوزيع تخص دار النشر
وإنه متعملوش ولا مناقشة واحدة
لأني متصورة دايماً إنه النقاد لما يقروا هيتصلوا بقا
ويقولي نعمل مناقشة وكدة
مع إني ساعتها كنت فاهمة إنه الشاعر أو الكاتب هو اللي بياخد الكتاب
لفلان وفلان وفلان ويطلب منهم يحدووا معاد علشان يناقشوا الديوان
بس انا محبتش أعمل دا
وبمرور الوقت بقيت بسمع لردود أفعال الناس عن الشغل
لحد ما نزلته pdf
وساعتها حسيت إني طبعته مرة كمان
لأنه اتقرا أحسن كتير ع النت
المهم قرار الديوان التاني مكنش سهل أبداً
كان عليَّ إني أعمل تجربة مختلفة عن الديوان السابق
وإلا مفيش أي معنى إني أنزل نفس التجربة مرة كمان
المهم أنا سبت الوقت هو اللي يسوي التجربة على مهله
لحد ما في يوم قررت فيه إنه الشغل دا جاهز لإنه يخرج للناس
ابتدت رحلة العذاب للبحث عن ناشر
لحد ما اتحلت من عند ربنا لما قدمت في مسابقة المورد الثقافي
وفزت بمنحة لطباعة الديوان
وطبعاً زي أي واحدة ساذجة كنت شايفه إنه مشاكل الطباعة كدة اتحلت
لكن الحقيقة إني قعدت وقت طويل لحد ما استقريت على دار نشر
تطبع الكتاب بالمواصفات اللي انا عايزها
فرحة أو إحساس الديوان التاني مختلفة أوي
مفيش حاجة تشبه الديوان الأول خالص
يمكن علشان صدر في ظروف صعبة
فكانت مساحات الفرح جوايا ضيقة غصب عني
وجايز علشان التجربة التانية دايماً محيفة أكتر
خصوصاً إنه الناس مستنيين يشوفوا الديوان التاني دا بقى فيه إيه
أنا اجتهدت بحيث إنه يطلع في أفضل صورة ممكنة
وهتلاقو في آخر الديوان ملزمة رسومات ملونة
أتمنى الناس تنورني في حفلة التوقيع
ويقولولي رأيهم
حفلة توقيع ومناقشة ديوان ( تسكب جمالها دون طائل)
السبت 18 / 2 بمركز سعد زغلول الثقافي ( بيت الأمة)
الساعة 6 ونص مساءً
عنوان المركز: 2 شارع سعد زغلول – بجوار محطة مترو سعد زغلول
وده الإيفنت على الفيس بوك
......
عن حفل توقيع ( تقفز من سحابة لآخرى)
....
5 التعليقات:
الف الف الف مبروك ياست الحسن
على فكرة، صورة الغلاف راااااااائعة جدا :-)
ألف ألف مليون مبروك يا فنانة
:)
بإذن الله بالنجاح والتوفيق ، أنت مبدعة والله وإن شاء الله ربنا هايكرمك
:)
خالص تحياتي
كل لما افكر فيه بحس انى مش من حقى افكر فيه لا مش عايزة افكر فيه ولا افتكر فيه كل ما افكر فيه افتكر دموع وبس الم وبس وجع وجع جامد اوى هو مش هيحسه ولا هيحسه ابدا لانه مش انا ولا عمره هيكون انا انا اللى وهمت نفسى انه انا هو هو انا كل ما افكر فيه يجيى على بالى صوت التليفون وهو على ودنى بيرن ويرن ويفضل يرن مش بمل ولا بزهق اعذره اقول يمكن نايم اما انا رخمة بشكل وارجع ارن وارن قلقانه يمكن زعلان منى او حاجة مضايقاه ويرن ويرن افتكر الخط الجديد اللى كلمته عليه بصدفه عجيبة اتصل يرد غريبة هى مين دى انا اللى غريبة اعذريه اممممممم انا اسفة انى رنيت كتير وازعجتك كل ماافكر فيه افتكر كلامه اللى كان بيقوله ليا كلام حلو مش على طول بس كنت قنوعه لانه كان حبيبى اسفه يا حبيبى انى فكرتك حبيبى كل ماافكر فيه اسمع صوت عالى اوى وفجاة السكة اتقفلت اصله اتعصب مش مهم كله على التليفون كل مايجيى على بالى الاقى شخص غريب مش بيفكر غير فى حاجة هو عايزها وبس اخدها يلا سلام مااخدهاش يلا اقفلى خلاص مش عايزاك تيجى على بالى انا ندمانه ان جيت على بالى مش لانى وحشة بس لانك بعتنى بالرخيص اوى وانا ادتك نفسى من غير مااطلب غير بس نيه صافيه منك مش مكالمة تليفون
.غادة كلامك جميل اوى اوى اوى انا ساعات كتير بحس انى بقرا لنفسى اللى عمرى ماديته لحد يقراه ربنا معاكى وينولك كل ممناكى
ألف مبروك انتى انسانة بدعة جدا ورائعة جدا جدا
عقبال الديوان المليون
محسن
الله يبارك فيك
وشكراً جداً
......
باشا
تسلم والله
متشكرة أوي
......
ملا البحر
رسالتك فاجئتني وفرحتني
مبسوطة إنك بتتشاركي معايا إحساسك
ومشاعرك
وتسلمي أوي
....
حنان خورشيد
شكراً جداً
وتسلمي والله
....
إرسال تعليق