الثلاثاء، 29 يوليو 2008

يا سلاااااااااام ، هو لسة فيه حد بيتجوز بالطريقة دي ؟؟؟؟؟؟؟؟؟؟؟؟؟؟




صحيت من النوم على رنة تليفون غريبة

- أيوة مين معايا
- الأستاذة فلانة
-أيوة مين حضرتك
- أنا (علي محمود) ولقيت نملاتك مكتوبة عندي وجنبها كلمة ضروري
- نعم يعني حضرتك عايز مين
- الحقيقة انا مش عارف قابلتك فين ، يعني أكيد انتي تعرفيني
- آسفة مش فاكرة الاسم خالص ، حضرتك عايز ايه
- انا مش عارف بس لو فكرتيني أنا قابلتك امتي هعرف
- أوكي لما تعرف ابقى اتصل تاني ، مع السلامة
- بس استني أنا شفتك في النقابة وانتي اديتني الرقم
- طبعاً كنت صحيت وافتكرت ( آه أستاذ علي أنا افتكرت اني قابلت حضرتك فعلاً)
بس ده كان من سنة!!!!!!!!!!
- طيب بس فكريني انت بتشتغلي ايه
- بشتغل في التصميمات
- بنت حلال أنا عندي ليكي شغل ، كلميني بأه ع النمرة الأرضي دي

استغفرت ربنا وقمت غسلت وشي وكلمته بس علشان أفهم ايه الحكاية

- انت اتجوزتي
-لأ
- ليه؟
- زيي زي بنات كتير يعني هو أنا لوحدي ، دي ظروف البلد
- لأ بس انتي مش زيهم
- ليه يعني دا فيه بنات كتير أوي متجوزوش وأحسن مني في حاجات كتير
وكلهم من عيلة وحلوين ومتربيين كويس أوي
- بقولك انتي مش زيهم
- ياعم فيه ايه أنا مش احسن منهم
- انت واخدة قرار انك متتجوزيش
انت رافضة الجواز لية ؟؟؟
-................
انت حضرتك مهتم أوي بموضوع الجواز ليه ، هو انت جايبلي عريس

بعد نصف ساعة من اللف والدوران وأسئلة ملهاش آخر

- أصل انا عايز أتجوزك ؟
- نعم ؟؟؟
- عايز أتجوزك رأيك ايه
- كدة خبط بلزق أنا يدوب شفت حضرتك مرتين ومتكلمتش معاك فييهم اكترمن عشر دقايق
يعني على أساس ايه عايز تتجوزني !!!!!!!!!!
- انا عاجبانبي دماغك أوي
- انفجرت في الضحك ويالله بقى قمت قايلاله اللي ف قلبي
بذمتك في حد يطلب من واحدة انه يتجوزها بالطريقة دي ؟؟؟؟

- مش احسن ما يقعد يحبها من غير ما يقولها
- يعني ما هو ده مش كويس بردو ، وهتتجوزني ازاي من غير متعرفني
ولو شايف انك عارفني بس انا بقى معرفكش

- لو ماما جنبك خليني أكلمها
- نعم؟؟؟؟؟
- طيب طيب احنا مش هنتقابل قريب علشان اوريكي الشغل
- آه
- النهاردة كويس
- ايه.......... النهاردة لأ ماينفعش ، خليها الإسبوع الجاي


.....................................؟؟؟؟؟؟؟؟؟؟؟؟؟!!!!!!!!!!!!!!!

5 التعليقات:

!!! عارفة ... مش عارف ليه يقول...

أغرب حاجة في كلامه تناقضه مع نفسه

هو مش عارف قابلك فين اوووكي أدي واحدة

والتانية بقى أنه معجب بدماغك أووي وعايز يتجوزك علشانها

ماشي هو سبب ممكن نقول عليه وجيه

أنما هو عرف منين دماغك علشان يعجب بيها

-----
ده باين عليه هو اللي دماغ

تحياتي
وليد

Mona Shereif يقول...

وربنا انتى عسل

و حلوة اوى الجمله اللى انتى كاتباها فوق دى

باسم المليجي يقول...

وفيه اسوأ من كده
من زمان كنت قريت تحقيق صحفي عن اللي بيشوف واحدة في الشارع يوقفها ويقولها الجملة الخالدة.. حضرتك مرتبطة؟-كما استغلها سعد الصغير في أحد روائعه- وممكن اكلم طنط
المهم بعد ما قريت الموضوع ده بقترة قصيرة زميلة ليا في الشغل حكت لي إن فيه واحد في الميكروباص سألها نفس السؤال.. المشكلة إن زميلتي دي متجوزة وكانت ساعتها حامل

فبطمنك إن لسه فيه كتتتتيييير بيتجوزو بالطريقة دي

في رأيي ده عشان ظروف المجتمع اللي لسه مش واخد قرار.. نفتح العلاقات بين الجنسين ولا نقفل العلاقات؟، فكل شيء جائز في هذا البلد
بس برضك بما إنه عارف انتي بتشتغلي فين وقابلك هناك.. طب ليه مش واجهك بدل التليفون؟
هو يا إما خجول زيادة عن اللزوم
يا إما حاجة تانية
على العموم خلي بالك.. الموضوع مش مريح

ست الحسن يقول...

عارفة .. مش عارف ليه

شوف ياوليد انت عندك حق
هو شخص متناقض مع نفسه وأغلب الظن انه لما اتصل بية مكنش في كامل وعيه
بس انا حسيت ان الموضوع غريب وتحس انك لو شفته في فيلم عربي هتستبوخه ومش هتصدقه

منور المدونة دايماً

....................

sometimes

دي أول مرة تشرفيني بالزيارة
يارب أشوفك هنا دايماً

...................

باسم

أنا متفقة معاك ان الموضوع مش مريح
بس العجيب اللي في الأمر هو توقيت حدوثه

بالظبط زي ما بتكون بتسأل أسئلة كتيرة بإلحاح وبيأس وطالب تعرف إجابتها بقالك زمن
فتصحى من النوم على تليفون مجهول
حد متعرفوش ولو عرفته فانت مش فاكر غير شكله

المهم ان فلان ده بيجاوب لك على أسئلة كتير أوي وبيقولك حاجات عن نفسك عمرك ما كنت تتخيل ان الناس اللي حواليك شايفاها جواك والحاجات دي كلها إيجابية
( كان صعب أوي اني اكتب كل المكالمة )

مثلاً لما حد متعرفوش يقولك
انت عارف انت مفيش حد انت بتحبه ليه
ولما تسأله ليه
يقولك أصل مفيش حد من اللي حواليك قريب منك ، مفيش حد منهم تفكيره يشبه تفكيرك

ولما تقف مصدوم أدام الإجابة دي ومتعرفش هو عرف الموضوع ده ازاي
يقولك
على فكرة مسئوليتك انك تتواجد في أماكن فيها ناس قريبين منك

خد عندك حاجات كتير زي دي
خلاصة الكلام ان الأمر بالنسبة لي كان منجم علامات على حاجات كتير

أُكتب بالرصاص يقول...

ألف مبروووك

حد يرفص جوازة لقطة زي دي برضه

اتكلي على الله
الراجل داخل البيت من التليفون اهوه
يعني ما نطش من الشباك