الأحد، 22 يونيو 2008

البوست ده بتاع أمنا الغولة - وسعوا بأه -






ياجماعة خليكوا معانا شوية
أعمل ايه ف( ست الحسن) دي اللي سايبة شغلها ومعطلة حياتها
والدنيا تضرب تقلب وهي كل ما اقولها بتعملي ايه
تقول داخلة المدونة ... كنت ع المدونة

هتنفعها بإيه والنبي المدونة دي
الكلام اللي بتكتبه كله من أصله
والنبي فيه واحدة عاقلة تسمي نفسها (ست الحسن)
طب تخيلوا معايا دي شكلها يبقى ايه يعني
أكيد مبعجرة ومش باينلها راس من رقبة
وأل ايه (ست الحسن) .... إزاي يعني

وايه بأه متشحتفة والحب مقطعها ع الآخر
اللي يشوف كده يقول حبيَّبة بقى وعايشة
والنبي أهو كله كلام ولا عمري شفتها قالت لحد أي كلام من ده
وتلاقيها كده على جنب

حاجة غريبة لأ والناس اللي بتعلق عليها
اللي يقولها رقة واللي يقولها مشاعر واللي يقولها إحساس
طب هتعرفوا منين ، ده كله فشر من الدرجة الأولى

دي واحدة عبيطة وفاضية وبصراحة مش لاقية حاجة تعملها
وبدال ما تروح تدور على شغل
قاعدة جنبي وفرحانة أوي آل إيه عملت مدونة
غطيني وصوتي يا اختي

أنا حطيت صوابعي في الشق منك
كفاية لحد كده
بلا مدونات بلا بتاع

آل (ست الحسن) آل



...............
أمنا الغولة

6 التعليقات:

غير معرف يقول...

امنا الغولة
ووسعوا
واوعى
قولت المدونة هتتكسر على دماغ ست الحسن
ورسيت فى الاخر على يا دوبك كلمتين
ودول ما يهزوش شعرة فى باروكةست الحسن

بس مالكيش حق فى الى بتعمليه فى ست الحسن

كل واحدة عاقلة او هابلة وماسكة -طبلة حتى
بتقول فى نفسها انا ست الحسن
ويا ارض اتهدى ما عليكى قدى

-حتى الحب والمشاعر مستخسرهم فيها صدق الى سمتك امنا الغولة

-الناس ليها الظاهر يا مفترية


-لو على الغطا خليه علي اختها اه برضه ستر وغطا

وبعدين يا امنا الغولة خدى بالك وخافى على نفسك واحترسى لان

ال ست الحسن

بيشكلوا نص المجتمع والكون

منذر

راجى يقول...

ازاى الغولة تواطئت مع الخواجة جوجل وعرفت كلمة السر بتاعتك ؟
انا خايف تيجى عندى انا كمان
يا أمه

Ahmed يقول...

أمنا الغولة كسيرة بدورها ..
متعبة بدورها ..
تختفي خلف ستار من القسوة، وتبتسم لك بتشفي وهي تنتزع منك لحظات السعادة ..
وإن كانت تعرف بأنها كسيرة تمامًا كست الحسن تمامًا ..

ست الحسن وأمنا الغولة عملتين لقطعة نقدية واحدة ..
الأولى واجهت حياتها بالرومانسية
والثانية بالقوة ..
وكلاهما حزينتان من الداخل ..

أمنا الغولة ..
لا تتعاقدي مع الخواجة جوجل كما يقول الأخ ناجي .. ارسلي لي وسأقول لك بنفسي كلمة السر :)

:)

ست الحسن يقول...

طيب البوست ده أنا عاملاه علشان أرد ع الناس اللي باعتين وعايزين يتعرفوا على ست الحسن وفاكرين إنهم هايقابلوا فاتن حمامة ولا زبيدة ثروت في الأفلام

أنا بس حبيت أديهم مثل بسيط للي هما ممكن يشوفوه
ست الحسن موجودة جوة ناس كتييييير أوي بس احنا مش بنبص أبعد من الشكل والمظهر ،
ما علينا

................

منذر

اول ما قريت التعليق اتخضيت وبعدين عجبتني حكاية ( مش هيهز شعرة ف باروكة ست الحسن )

بقيت ردي عليك أحمد كتبه كله مش ناقص كلمة ياريت تقرا تعليقه

على فكرة ضروري تيجي تاني وتقول رأيك


.......................


راجي

أمنا الغولة أصلاً هي اللي عاملة المدونة وانا من وراها بكتب في السر

بس كويسة حكاية سرقة كلمة السر دي
أهو أبلغ عنها واخلص

نورت المدونة يا افندم


...................

أحمد

وجودك ومتابعتك
ليهم جمال خاص ،
قلت كل اللي عايزة أقوله

على فكرة كلمة السر بتاعتك عندي !

غير معرف يقول...

ههههههههههههههههههههههه

ست الحسن غصب عنك يا غوله

FAWEST يقول...

الصوره اللى مصورها ليكى
أختك وحطاها على المدونه خدعا الناس فيكى وبتقول عليكى قطقوطه وعسوله
ليه بس عاوزه توريلهم الوش التانى والحقيقى
ههههههههههههههههههههه