الثلاثاء، 6 مايو 2008

أنا ليه عملت مدونة أصلاً


أنا كنت فاكرة إني عملت مدونة علشان اترفدت من الشغل وبقيت فاضية ،
أو علشان أسرب الوقت التقيل اللي مكنش بيمر وانا غضبانة
أو علشان بالصدفة قريت حواديت رحاب ولمستني جامد
وحسيت الواحد أد إيه ممكن يعمل اتصال قوي بناس عمره ما شافهم

كنت فاكرة إني هعمل مدونة (ومش هكتب اسمي ) علشان أقدر أتكلم من قلبي وبراحتي ...
براحتي أقول كل الحاجات اللي مش بقدر أقولها وبنكسف منها وعمري ما قدرت أحكيها لحد
(يا إما هيقولوا لي إنزلي شوية ع الأرض أو إنت أصلاً مجنونة )

المهم إن أنا كنت فاكرة إني عملت المدونة علشان الأسباب دي
واتضح النهاردة إن السبب كان حاجة تانية خالص

أنا عملت مدونة علشان أدخل أعلق على مدونات الناس التانيه
وبالصدفة كده أكتشف مدونة حسين (طبعاً مش اسمه الحقيقي )


يااااااااه الدنيا دي صغيرة أوي
وانا بجد مبسوطة
أنا شفت حسين مرتين بس قبل كده وعمرنا ما اتكلمنا سوا
بس كان دايماً عندي إحساس إن الولد ده عميق ... عميق وعنده تجربة في الدنيا
هقولكم إيه المدونة كانت حلوة
مكنش دا اللي هاممني أد ما كنت بكتشف إن كل الأغاني اللي هوه بيحبها أنا كمان بحبها
وانه زيي أول 50 موضوع في المدونة بتاعته محدش علق عليهم

أقول ايه حسيت بفرح شديد مش لأن أنا وهو ممكن نبقى أي حاجة مع بعض
ولا لأن لسة فيه ناس بتفكر وعندها طريقتها
بس لأن إحساسي كان سليم 100%





علي فكرة أنا اللي رسمت البورتريه ده

6 التعليقات:

إبـراهيم ... يقول...

مبروووك على حسين، وبرافو عليه بجد، وعليكي !!
تعرفي يا ست الحسن لما تحسي إنك مخنوقة حتى من الكتابة أو الفضفضة ف مدونتك، عارفة ليه ، لإن الناس عارفاكي، وأصحابك ممكن يدخلوا عليها يقروكي، بيبقى نفسك تعملي مدونة تانية باسم تاني محدش يعرفها، ولا يقراها ، مساحة حقيقية لنفسك وبـــس

على فكرة أنا عملت ده !!
بس مكملتش فيها !!!
حلو قوووي

تحياتي

إبـراهيم ... يقول...

بدون مناسبة، هوا إنتي جيتي حفل التوقيع، ولا جبتي الكتاب بعد كده ؟؟؟
.
.
وعلى فكرة إنتي لو اتنشرتي شوية ف التعليقات عند الناس، الرجل هتزيد عندك :)

لأن كتابتك حلوة بجد


ياللا يا ستي تعليقين ف نفس واحد أهه

غير معرف يقول...

عاوز أقول لك إني مبسوط جدًا، وإن البورتريه اللي إنتي راسماه حلو قوي ...

وياريت تشيلي الـ حروف اللي لازم نكتبها تحت التعليق دي

ست الحسن يقول...

مساء الخير يا ابراهيم

أولاً أنا مبسوطة إنك جيت عندي تاني ويارب دايماً

طيب حكاية إني مكتبش اسمي علشان أكتب براحتي دي بجد فعلاً
بس ساعات بحس إن فيها شوية جبن وخوف من الناس

ساعات بحس إني عايزة أحكي عن الناس بأساميهم الحقيقية وابقى عايزة أحكي براحتتيي أوي وساعات بخاف أحكي عن الحاجات اللي بتحصل دلوقتي لحسن متكملش أو تضيع

طب هقولك على حاجة غريبة يا ابراهيم

مرة - قبل ما يبقى عندي مدونة - دخلت بالصدفة على مدونة حد كل علاقتي بيه إني عارفة اسمه وبشوفه بسسس

وبعدين لقيته كاتب تدوينة حلوة أوي وحسساسة وحقيقية ومن غير أسامي خالص

عارف يا ابراهيم
التدوينة دي كانت عني
أيوة عني أنا تحديداً مش عن أي واحدة تانية ومتسألنيش عرفت إزاي
أنا عرفت وبس ( عارفة هتقول دي هابلة دي ولا إيه )



..........................

رداً عليك تاني
أنا جيت حفلة التوقيع
وعقبال حفلة الكتاب اللي بعده



.....................

إنت

مبسوط والبورتريه عاجبك

ربنا يسعدك
وهتيجي تاني صح


بالنسبة للكلام اللي تحت التعليق أنا عملت محاولة علشان يتشال لو متشالش يبقى إنت تبعت تاني وتقولي أشيله إزاي

ماشي

إبـراهيم ... يقول...

هههههههه
اتشال يا ست الحسن
ومفاجأة جميييلة إنك شرفتي حفل التوقيع، وتقريبًا كده أبقى عرفتـــك


وهبلغ عنك، وهقول لهم أيوة جت :)

وهيا دي البنت التي حضرت حفل التوقيع
.
.
كلامك عجبني

Soooo يقول...

معلش يعني بس انا ضد الواد باراهيم اللي مع نفسياتو ده

اتكلمي براحتك .. قولي كل اللي عايزه تقوليه وليكي مطلق الحريه
لو عايزه تشتمي شخص اشتميه
لو عايزه تقولي لشخص حاجه قوليها

التدوين فيه جزء عباره عن علاج نفسي .. وانتي بنفسك اكيد لاحظتي ده
يعني انا عمال اقلب في مدونتك وجايب عاليها واطيها .. وعمال اقرى من اول موضوع لآخر موضوع .. لاحظت انك في اول كام موضوع كانت كتاباتك بحذر وخوف وفيها اضطراب من عرض افكارك عالملأ .. حتى لو مش كاتبه اسمك الحقيقي
وده كان باديء مع الكل .. في الاول انا وغيري كنا خايفين ان حد يقرالنا مواضيعنا وكلامنا .. ولما لقينا تشجيع شويه قلنا لاصحابنا المقربين .. دلوقتي الموضوع وصل لأني بقيت بالاقي بنات اخويا الصغنغنين .. واخويا نفسه هو ومراته كمان .. بيقولولي خبر ايه يا سوووو .. هو مافيش جديد في مدونتك ليه

انا متأكد ان ست الحسن اللي ابتدت التدوين زمان .. وتحديدا يوم تلاته مارس الفين وتمانيه . غير ست الحسن بتاعة دلوقتي
ست الحسن دلوقتي عندها جرأه اكتر .. وثقة بالنفس اكتر .. ورغبة اكتر في انها تقول اللي هي عايزه تقولو .. حتى لو الناس عرفت اسمها الحقيقي




سلامووووووووووز