الأحد، 16 مارس 2008

أنا اتسرقت يا جماعة

اللي حصل إن الشقة (اللي احنا عاملينها مرسم ) اتسرقت ، الحرامية _مرجح انهم اثنين_ فتحوا الباب ببلطة حديد وسرقوا كاسيت وكاميرا.

مش مهم الحاجات اللي اتسرقت كانت غالية ولا لأ بس المهم ان أنا كنت خايفة أوي على اللوحات والكراسات كنت خايفة على الكتابة وعلى الأفكار كنت حاسة إن فيه حاجات كتير أوي غالية في حياتنا ممكن منحسش بقيمتها إلا لو اتسرقت مننا.


أنا مش عارفة أنا بكتب الكلام ده لمين لأن من ساعة ما عملت المدونة محدش قراها ومفيش ولا تعليق واحد عليها ، بس أنا محتاجة أتكلم حتى ولو كنت بتكلم مع نفسي ، المهم أنا حاسة بفقدان أمان شديد وبخوف ، في نفس الوقت مبسوطة إن الأمر بس كان شوية حاجات اتسرقت وان محدش جرى له حاجة .

تقدوروا تقوله إن أنا مفزوعة شوية وعنية غرقانة ومش عارفة أرد على أختي بإيه لما بتقولي إن السرقة دي علامة على حاجة مهمة أوي
هي حاسة بالذنب وحاسة إن إحنا مش بنقدر نحافظ على حاجتنا وإن الحرامية ممكن ييجوا تاني ويسرقوا بيتنا ومحدش عارف ساعتها ممكن يحصل إيه .

كتير أوي ماما كانت بتقول لنا لما تطلعوا في المرسم لازم أقف تحت أستنى لحد ما تقفلوا وراكم واطمن لأن ممكن يكون فيه حرامي مستنيكم فوق . طبعاً إحنا كنا بنتريق عليها ونقول لها حرامي إيه ده الغبي اللي هيطلع يسرق مرسم وهيطلع يسرق منه إيه أساساً وانت خايفة على إيه دا إحنا نخوف ألف حرامي ونضحك ونطلع واحنا شايفين إنها بتبالغ وإن الحكاية مش مستاهلة قلق

مش عارفة أشرح أنا حاسة بإيه ،حاسة إن كل التحذيرات اللي كنت باخدها باستخفاف وبقلة اهتمام ممكن تبقى حقيقية فعلاً يعني ممكن حد فعلاً يأذيني وانا راجعة بيتنا باليل وساعات بيبقى متأخر.

وممكن أقع في بلاعة مفتوحة وممكن حد يغتصبني وممكن وممكن ..........................

كل الحاجات الوحشة أوي اللي ماما بتحذرني منها كل يوم واللي أنا كنت باتجاهلها يمكن عن قصد لأني مش هقدر أعيش خايفة من كل حاجة وببساطة كده مش هخرج من بيتنا أصلاً .


أنا عارفة ومتأكدة إن ربنا بيسترها معانا وبيحمينا من حاجات كتير وحشة جداً ممكن تحصل لنا في أي وقت بس أنا دلوقتي خايفة شوية
ربنا يطمنا كلنا

3 التعليقات:

شغف يقول...

على فكرة
من وقت قريب انتشرت في منطقتنا مسألة خطف الشنط
و كان التحذير الأكبر دايما ان كل واحدة تحرص على شنطتها و مش تحط فيها فلوس كتييير
أنا شخصيا ساعات كنت بأبقى مرعوبة لما أفكر إن ممكن حد يخطف شنطتي
عشان حاجة واحدة بس : المفكرة بتاعتي اللي بأخدها معايا في أي حتة اللي فيها كتابتي ، و يومياتي ، و كل ما يخصني من الداخل

***********
كل شيء جايز : السرقة / الاغتصاب / الاعتداء
بس برضة بأحاول دايما أفكر إن الواحد لو فكر دايما في المخاطر ، يبقى عمره ما هايعيش بجد

ست الحسن يقول...

شغف

مبسوطة أوي إنك قريتي المدونة كلها
ومتشكرة على اهتمامك بالتعليق على كل الحاجات اللي عجبتك

حاسة زي ما اكون كتبت مواضيع تعبير كتييير ونسيتهم وف يوم بصيت لقيت الجنية الطيبة سايبالي نجوم في كراستي

ساحرٌ مرورك العذب

Soooo يقول...

الخوف غريزه بتتوجد في الانسان لما بيكبر ويبدأ عقله في التعامل مع عقول الاخرين باختلاف تفكيرهم ومنطقهم
ومش عيب ان الانسان يخاف .. بالعكس ده صحي جدا
بس العيب .. ان خوفك يتحكم فيكي

قريتلك جمله بتقول ان مافيش حد بيقرا مدونتك .. جايز زمان لما ابتديتي تكتبي ماكانش في تفاعل من الناس حواليكي .. ويمكن مرجع عدم التعامل ده هو عدم تعاملك مع الناس من نفس منطق الخوف وعدم الثقه .. لكن لما ابتديتي تتفاعلي مع الناس ولما جيتيلي في مدونتي وعلقتي .. انا كمان جيت اتعامل معاكي

فهمتي حاجه؟؟؟
عايزه فيسكافيه معايا؟؟؟؟






سلاموووووووووووز