الأحد، 12 أغسطس، 2012

من الأول

.





.

.



أنا يوم ماجيت أعمل المدونة
كان السبب الرئيسي في الحدوتة دي إني عايزة أكمل كلامي للآخر....
لآخر كلمة جوايا لأنه الناس غالبًا بتقاطعني بعد أول 3 جُمل
اللي هما بيبقوا حوالين الحدوتة مش الحدوتة اللي بتحصل جوايا خالص

دلوقتي حاسة نفس الإحساس
واقعة في حفرة مش عارفة أسميها
بس عارفة إنه بقالي كام شهر بحوم حواليها وبرفض أقع
بقاوم ... بقاوم ... بقاوم
الموت طبعًا أكبر مني بكتير
وقعت
دي كل الحكاية

بعمل روحي كويسة وبروح الحتت اللي متعودة أروحها
بس دايمًا بلاقي وجع مستنيني وبيترمي ف حضني أول ما يشوفني
أنا هبطل مقاومة
وهستسلم للأسى
هيحصل إيه يعني

ولا حاجة
كل الناس بتبقى عريانة أوي في اللحظة دي
وبعييييييييدة
مش فاكرة في أنهي تدوينة كتبت إنه الصداقة في الإنعاش
النهاردة ممكن أكتب إنه الصداقة كلها خيال أصلاً وشوية تفاصيل صغيرة بتحصل فعلاً
لو انت توقفت عن بث الخيال لأي سبب هتبان هزيلة أوي ومضحكة

فاكرين الأفلام اللي البطلة مثلاً يبقى عندها أربعتاشر سنة
تصحى من النوم تلاقي نفسها عندها 30 سنة
ويحصل كم مفارقات ومفاجآت وحاجات كتير هي مش فاهماها بس مضطرة تتعامل معاها
أنا حصلي كدة بس الحدوتة مش كوميدية عندي للأسف
فجأة بقيت لازم آخد بالي من أمي ومن البيت .... ومن نفسي ودي أسوأ حاجة فيهم
خلاص
الست اللي كانت بتدلعني مبقتش موجودة في الدنيا
وأنا دلوقتي لازم أكبر غصب عني وإلا هضيع

نسيت أقول إني ضايعة فعلاً
ومش عارفة أنا مين وبعمل إيه هنا وعايزة إيه من الدنيا
تاني رجعت للسؤال الأصلي أنا مين وعايزة إيه



....










Painted by:
Alexander Ross
(watercolor- colored pencil- and graphite on paper -2007)





....

2 التعليقات:

أسماء سعيد يقول...

اذا كانت هموم الحياه قد جعلتكِ تكبرين عمرك وسنك ،
فكونوا كما طلبت منك الحياه ان تكون
ولتكتبِ لنا أحاديث أخرى بعمرك الجديد

وان ضعتى فالكتابه ستردك فقط أطلبى منها العون

والألم هوا صديق كتاب كثيرون لولاه مانزفت أقلامهم إبداعا ..

ست الحسن يقول...

أسماء

الألم صديق الجميع فعلاً

تسلمي
وشكراً لاهتمامك