الأحد، 21 نوفمبر، 2010

hair cut




.

التدوينة دي مهداة للست نهى جمال صاحبتي

.

زمان كنت فاكرة ان الشاطر لازم يصاحب الشاطر اللي زيه
طول عمري فاهمة اننا كل ما نكون شبه بعض أكتر كل ما كنا هنحب بعض أكتر
ونتفاهم أكتر ونبقى أصحاب كويسين

الموضوع طلع غير كدة خااااالص

الناس اللي بتصاحب عليهم وبيبقوا أصحابي بجد
مبيبقوش شبهي
أو بيبقوا شبهي في حاجة غير الحاجات اللي انا بدور عليها عند الناس

أنا بدور على العقل اللي بيناقش الدنيا وعلى الوعي والتجربة
بدور على المشاعر الحرة اللي مفيش حاجة بتقيدها
وبدور على الاهتمام بالفن بشكل عام وبالأدب


عمري ما سألت نفسي أنا بدور على الحاجات دي ليه
أو سألت إيه نسبة حضور الصفات دي جوايا

بس دايماً باندهش وساعات بتصدم
لما بحب ناس بعااااد أوي عني لأسباب لحد دلوقتي معرفش أحددها

والغريب كمان انك تلاقي ناس على الناحية التانية من الدنيا
- أو على الأقل دا تصوري عنهم – بيحبوك ومحتاجينلك

فيه لحظة بتكتشف فيها احتياجك للونس وللدعم بشكل أساسي
وتفتكر عدد الناس اللي انت ضيعتهم واللي كانوا ممكن يبقوا حواليك دلوقتي


جيبي من الآخر وبطلي لف ودوران واعترفي بالحقيقة
الحب بيعقد حياتك مش بيملاها بهجة
بيخليكي تفقدي الناس ومتتمسكيش بيهم
الحب بيخليكي تايهة وضعيفة ومش محبوبة حتى من نفسك
الحل انك تفرحي بالحياة في شكلها المتاح
وشكلها المتاح ده يعني انك ترضي بالحواديت زي ما بتحصل
ومتحاوليش أبداً تتدخلي في السيناريو أو تألفي حوار جديد


ومتصدقيش نفسك

بطلي الحكاية دي وحافظي على المسافة
الصداقة طيبة ودافية ومفيدة
ومش كل مرة هتقابلي راجل حليوة وبيفهم هتحبيه
الحب بيخليكي تبعدي عن الناس
جربي تعملي استوب لمشاعرك
اوقفي عند نقطة ثابتة
ومتسمحيش بتطور العلاقة
حتى لو اللي قدامك قرر انه يطورها ويكتب حوار جديد

الحب بيعقد الحياة


البنات مش بيصدقوني لما أقول اني بقابل رجالة كتير بتفهم وبتحس
بيتصوروا اني بزايد عليهم

لحد ما بقيت أسكت
أسكت وخلاص لإني مش هعرف أجاوب ع السؤال بتاع
فينهم ؟

فين الناس اللي بتحكي عنهم دول
هقولهم إيه
حبيتهم ونتيجة طبيعية لده سبتهم

دلوقتي الولد اللي باعتلي جواب 29 سطر
كل اللي بيقوله فيه .... ولا حاجة تقريباً
ولا حاجة غير "محتاج أتونس بيكي واتكلم معاكي وبس"
الولد ده مينفعش أبداً أبتسم له أو أطبطب عليه لما الدموع تغرق قلبه
لإن المسافة مهمة جداً

انتي حاسة انه بيفهم ودافي وبتتونسي بيه جامد
خلاص
حطي نقطة واقعدي اكتبي نفس السطر اللي بينتهي بنفس النهاية
متصدقيش التفاصيل الصغيرة لإنها ياما ضحكت عليكي
ولا تصدقي الأغاني اللي بتجيلك من الراديو لإنها كدابة في أصل وشها
انتي محتاجة ونس وانتي عارفة
متسمحيش لمشاعرك انها تمسك لجامك
ولا تمسكي انتي لجامها لإنك مش أدها

قصيها من البداية وكل ما تطول حبة قصيها
ببساطة شديدة
إيه يعني أول ولا آخر مرة هتقصي فيها مشاعرك
قصيها وارضي وبس



.....




8 التعليقات:

VOltaa يقول...

"الحب بيعقد حياتك مش بيملاها بهجة
بيخليكي تفقدي الناس ومتتمسكيش بيهم
الحب بيخليكي تايهة وضعيفة ومش محبوبة حتى من نفسك
الحل انك تفرحي بالحياة في شكلها المتاح
وشكلها المتاح ده يعني انك ترضي بالحواديت زي ما بتحصل
ومتحاوليش أبداً تتدخلي في السيناريو أو تألفي حوار جديد"

,

بيعجبنى فيكى صراحتك وبساطتك مع نفسك
اللهم دمها نعمة عليكى

بوست مليان كلام كويس جدا :)

نهى جمال يقول...

الولد ده مينفعش أبداً أبتسم له أو أطبطب عليه لما الدموع تغرق قلبه
لإن المسافة مهمة جداً
<<
انا قلبي وجعني في الحتة ديه
>>
انتي محتاجة ونس وانتي عارفة
متسمحيش لمشاعرك انها تمسك لجامك
ولا تمسكي انتي لجامها لإنك مش أدها

تفتكري ينفع اصلا

ده شيء لا ارادي بيحصل

بحبك يا بنت اللذينة :*

P A S H A يقول...

يخرب بيت ده بوست !
الله على ده كلام :)
بس

بنت القمر يقول...

مبسوطة جدا اني اكتشفت مدونتك متاخر ومبسوطة من التدوينة وحابة اقولك انك من الناس القريبين البعاد يا غادة
زيك زي نهي زي مروة زي ناس كتير
المسافة هنا بتحافظ علي علاقة دافية وحقيقة، ممكن تكون ساذجة جدا زي الحب من طرف واحد، لكن بتحقق الغرض الونس، فقدان الونس مش بس غياب الرجل لانه يمكن مع الوقت تكتشفي ان وجود رجل برضه مش كافي لسد فراغ الفقد!
الفقد مش غياب شخص بعينه لكن حالة بتقل وتزيد مع الوقت،مهما بانت حياتك جميلة وكاملة للاخرين،علي فاكرة الشاطر مش بيحب الشاطر اللي زيه، الاطر بيكره الشطار، لانه غالبا بيكون مليان مشاعر منافسة معاهم،انا رأيي ان قص المشاعر محتاج خبير علن طول العر بيضعفه ويعقده وكمان موس الحلاقة ممكن يعور، تهذيب الماعر والسيطرة عليها مطلوب معظم الوقت
:-))
اماني خليل

Baskouta يقول...

عجبني اوي
وخصوصا حكاية اني ارضى بالحكايات زي ما هى من غير ما اتدخل في سيناريو
طيب ممكن فعلا نسيب الحكاية تمشي من غير ما نتدخل في السيناريو بس هل يا ترى الاطراف التانية في الحكاية هم كمان مش هيتدخلو في السيناريو
ياريت
وموافقة ان في نقطة لازم نعمل فيها ستوب لو مقتنعين ان هنا لازم يبقا في ستوب حتى لو الطرف التاني لسة مكمل
استمراره في الحكاية مش معناه استمراري ..
تحياتي على البوست الرائع

مؤنس فرحان يقول...

واحنا صغيرين ولسه مفاهيمنا صغنونة ومحدودة الإطار كنا بنعتقد فى حاجات كتير غريبة

الشطار يصاحبو الشطار

اللى بيلعبو كورة كويس يصاحبو بردو اللعيبة اللى زيهم

الاهلاوى يصاحب الاهلاوى

الخ

كل مابنكبر شوية كنا بنلاحظ ان اصحابنا واللى شوية شوية اتطورو و بقو اصدقاءنا ماكانوش بيتشابهو معانا فى مظاهرنا الخارجية سواء المعنوية او الفيزيائية

لكن كانو بيتشابهو معانا فى خصائصنا الداخلية

وهو دا اللى بيجذبنا لبعض ويخلينا نستريح لبعض

ودا بيحصل بشكل لا إرادى كعادة أى مشاعر ... أنا موش بأدور على اللى ينفع يكون صديق ليا واقول اه دا ينفع ودا لأ

دا بيحصل توماتيكي توماتيكي

سواء لتشابهنا فى صفات كويسة أو لأ

موضوع الحب ... مابعرفش اتكلم فيه

لكن

الإنسان كائن معقد أوى من ناحية المشاعر ... و فى موضوع الحب .. المنطق بيتوه كتير .. ويمكن دا اللى بيخلى الموضوع مشوق
-----------------------

ست الحسن ... صاحبتك نهى جمال محظوظة بيكى .. وربنا يجمعكم دايما عالخير

بوست جميل ومليان وحاسس ان ردى ناقص أوى وانى عايز اكتب كمان

رضوى يقول...

زمان كنت فاكرة ان كفاية اننا اصحاب و مع بعض مش لازم نبقى شبه بعض قوي بس كمان طول مااحنا مع بعض مش هانبقى كمان شايفين الاختلاف اللي ما بيننا قوي..
هايفضل لينا أذواق مختلفة و شخصيات مختلفة.
زمان كنت فاكرة أن الصحاب بيسمعوا بعض بجد!!
ما اعرفش امتى بس فيه حاجة بيني و بينها اتكسرت اتكسرت و اتفتفتت ف الأرض مابقتش عارفة اخطي مسافة محددة حواليها بقيت كل مرة بقرب بتجرح..
زمان كنت فاكرة أننا اصحاب عمر ، بس دلوقتي تايهة و مش عارفة.
مش عارفة ليه كل مرة بتكلم فيها عينها بتبعد بعيد و بحماس غير عادي بتغير الموضوع.

فيه لحظه أكتشف فيها أحتياجي للونس و خوفي على كل العلاقات | الناس اللي ممكن افقدهم لأنهم اتحاوطوا بكسر الرابط البلور "اللي كان بينا"
ساعات طويلة أراجع كلامي و مواقفي يمكن قلت؟ طب يمكن كان المفروض أعمل؟
الخوف بيشل بيمنعني اتحرك ناحية الناس اللي بحبهم بيمنعني اعلن عن مخاوفي و افضفض مع اقرب الناس

:(
اسفه

ست الحسن يقول...

فولتا

شكراً جداً على الدعم والمساندة
ومبسوطة بوجودك والله

.........

نهى

سلامة قلبك من الوجع
وانا بحبك أكتر على فكرة

يارب يا نهى
النص ده يبقى علامة خير ليكي

...
باشا

إيه الجمال ده
تسلم يا افندم

....

بنت القمر

أنا عارفة مدونتك من زماااان خالص
وباجي عندك على فكرة
بس انا كسلانة شوية في التعليقات

مبسووطة انك اكتشفتي المدونة
وهستنى مرورك دايماً

وعندك حق أوي
المسافة ساعات بتحفظ الدفا
وقص المشاعر محتاج طريقة خاصة

تنعليقك حسسني بونس شديد
تسلمي يا جميلة

..........

بسكوتة

تسلمي
وشكراً لمرورك الجميل

....

مؤنس

مسألة التشابه في خصائصنا الداخلية
حقيقية جداً
وصعب نحسبها كويس لإننا مبنبقاش عارفينها خالص

والله تعليقك فرحني بجد
ومبسووووطة بوجودك أوي

تسلم

...

رضوى

متسمحيش للخوف يعكر صفاء العلاقة بينك وبين الناس
واستحملي الوجع شوية وخطي على الإزاز المكسور واكشفي وجعك
على الأقل هتبقى عبرتي عن نفسك
واديتي فرصة للي قدامك يقول اللي جواه

العلاقات كلها بتمشي في منحنيات صاعدة وهابطة
لما تلاقي نفسك جوة منحنى نازل اعرفي انه هيطلع بعد شوية

على أد ما تعليقك فزعني شوية
على أد ما انا حاسة انه التدوينة لمست قلبك وخلتك تتكلمي معاها

تسلمي

...