الخميس، 28 يناير 2010

نصيحة أخوية

.



.




إوعي ترتبط بواحدة مثقفة ،
البنات دول حكايتهم حكاية
هتقعد تقولك أنا قريت لمين النهاردة

وكان بيتكلم عن مش عارف اية
وكل يوم كتاب جديد واسم جديد
وقابل يا صاحبي ...

إوعى تعمل في نفسك العملة دي
ياخبر بقى لو طلعت بتكتب هتضحك عليك رسمي يعني

الكتابة حاجة والواقع حاجة تانية خالص
هتلاقيها حنينة ومتسهوكة والحب مقطعها راقات ع الورق بس
في الواقع هتقعد تناقشك في نظريات الوجود وعلم النفس
ومش عارف مين قال إيه
أصلاً مش هتعرف تشوف الست اللي جواها
هتبقى دايماً متخشبة معاك وبتتكلم كلام كبير

وياويلك ياسواد ليلك لو قلتلها نكتة أوحكيتلها موقف بسيط
هتقعد تطلع عينك
انت بتقولي دا ليه ...
وانت أصلاً كنت بتفكر ف إيه لما اتصرفت بالشكل ده

وخد عندك لو اتلطشت ف نافوخك وقررت تتجوزها
أول حاجة هتقولهالك أنا ماليش ف شغل البيت والطبيخ والكلام ده
مش فاضية للحاجات دي أنا مشغولة جداً باكتب واقرا واروح ندوات
يعني نتصرف نشيل بعض يا معلم شوية عليك شوية علية

آه والله هتقولك يا معلم تصور
عارف انت الكلام الناعم بتاع زمان
يا حبيبي .... يا حياتي .... يا روحي
مش هتقولهولك خالص
بس ممكن بكل إخلاص تكتبهولك ع النت
زي ما تكون البنت اللي جواها بتطلع ع الورق وبس
مش قولتلك متخليش حد يضحك عليك

وبعدين توجع قلبك ليه
مالها مروة بنت خالتك
ماهي زي الفل حلوة ونغشة وبنت حلال
وان كانت الثقافة نأحة عليك أوي
ابقى اديها كتاب لباولو كويلهو وواحد لماركيز ووصيها تقراهم
وهي بتموت ف تراب رجليك
يعني هتقراهم طبعاً وابقى اشرحهملها

ومروة بقى هتريحك وتسمع كلامك
ومش هتعارضك ف أي حاجة
مروة يا ابني شايفاك نازل م السما
لما هتصدق بس تشاورلها
فكر كويس
فكر قبل ما تتدبس تدبيسة عجب












.........

.

14 التعليقات:

سمراء يقول...

كلمة السر " قبول "
الأثنين يقبلوا بعض زي ما هما
الطريق " نية تفاهم "
يتكلموا مع بعض في كل حاجة حتي المشاعر

يعني من الاخر
مينفعش كل واحد منهم يعمل قايمة للتاني ايه الاجابي وايه السلبي

سمراء

مصطفى عبدربــه يقول...

وان كانت الثقافة نأحة عليك أوي
ابقى اديها كتاب لباولو كويلهو وواحد لماركيز ووصيها تقراهم
وهي بتموت ف تراب رجليك
يعني هتقراهم طبعاً وابقى اشرحهملها

هنا كنت هاموت م الضحك
:D

Mahmoud Ahmed يقول...

هاخد بنصيحتك ان شاء الله ^_^

nudy يقول...

اهي دي النصايح الجامده طحن اللي تنفع الواحد في حياته بس مين يفهم ومين يدرك
اتفضلي اهو برده كلام الثقافة بينأح فعلا علينا
البوست حلو قوي قوي قوي جدا يا غادة

حُضن دافى...فى عز البرد يقول...

هههههههههههه

حلوه اوى النصايح دى

اجدع نصايح الواحد لازم يعمل عكسها فوراً

بس تصدقى احنا فعلا فينا كتير م اللى الراجل ده قاله

نياهاهااههههاهاه

حلم بيعافر يقول...

ههههههههه

معنديش قرايب للجواااااااااااز

العنكبوت النونو يقول...

طب ولو فيه واحدة مثقفة وعندها استعداد تعمل كل الحاجات اللي مروة بنت خالتك هتعملها دي وتطبخ وتغسل وترتب وتقعد بالليل مستنياك لما ترجع تعملك كوفيات وبلوفرات
وبرضه تكون بتكتب وبتقرا وبتفهم وبتفكر وبتتكلم نفس لغتك
وتكون بتحبك بنفس الطريقة وشايفاك نازل من السما برضه
ولما سيادتك تشاور وتتمني بس هي تجري تنفذ
وتكون قدامك عيلة صغيرة مستنية منك الحماية والأمان
وتكون مع كل ده ذكية وبتعرف توزن المعادلة وتعرف امتى لازم يكون امتى
__________________________
نصيحة اخويا برضه لأ
________________________
ماشي يا غادة ماشي
___________________
مارلين مونرو كانت بتقول:
i make mistakes, i'm out of control and sometimes I am hard to handle
but if u can't handle me at my worst
then by hell you don't deserve me at my best
وبس كده
:kiss:

سواحة يقول...

:-)))
للاسف صح النصيحة

نهر الحب يقول...

ههههههههه
مع انك ضحكتيني
الا اني بصراحة مش متفقة معاكي خالص

مش معني ان البنت مثقفة انهاتكون منعزلة عن العالم الحقيقي وعايشة بس طول النهار في الكتب والندوات
صح؟؟

ولا حتي لما تكون رومانسية وبتكتب علي النت مش معني ده انها متقدرش تعمل ده في الحقيقة

الفكرة ان الواحد يكون متوازن في كل اللي بيعمله
الحب ليه وقت والقراءة ليها وقت والحياة الزوجية ليها حقوقها

شكرا ع التدوينة موضوع جميل اوي علي فكرة
:)

السيد الرئيس يقول...

بصي يا غادة
خدي التكنيك ده من أخوكي
لو هيا هتهاجم من اليمين ههاجم من الشمال
هتقولي لي البرمجة اللغوية العصبية هقولها إدلر وكارل يونج وسيجموند فرويد
هتقول لي باولو كيوليو هقولها ماركيز وإيزابيل الليندي

هتقول لي رايحة ندوة ثقافية
هقول لها انا رايح الأوبرا

من الآخر

هتعملي نيللي نيللي
هعملها شريهان شريهان

بيس ؟

احلام جوليا يقول...

بصراحة بوست دمه زي السكر بجد موت على نفسي من الضحك وفعلا دي النصايح الي بينصحها الشبان لبعض علشان كده البنات لازم يقولوا لبعض ايه خدي بالك يا مثقفة داري ثقافتك واتمكيجي يا حبيبتي لان الرجالة مش بيشوفوا الوش ولا الراس ولا الدماغ الي ورا المكياج البسي يا حبيبتي مكسم ومقسم وحطي طرحة وبصي للارض واعملي مكسوفة خليه يقول ايه الجمال والخجل ده وازا جاب لك سيرة الكتب قولي له انك مش بتقري كتير علشان مشغولة بتتعلمي الاكلات الايطالي بعد ما خلصتي المطبخ المصري كله وطبعا حيندب ويجري يطلب ايدك قبل ما حد غيره يخطبك وبعد الجواز بقى ابقي العبي به زي ما تحبي والطبيخ كله مطاعم هههههههههههههههههههه الرجالة يستاهلوا

محمد سلامة يقول...

فكرتيني بأحمد ذكي في فيلم أربعة في مهمة رسمية ساعة ما قال لنور لما سألته عن سبب الحرب في الكويت : هقولك على نصيحة تحافظي بيها على جمالك ورقتك طول حياتك , أوعي تحاولي تفهمي حاجة

غير معرف يقول...

والله اللي هتدبس في الليلة دي هي البنت

لان الراجل سواء كان مثقف او جاهل مش بيفكر الا في الاكل والجنس وبس

هي الاولى بالنصح

ست الحسن يقول...

سمرا الجمبلة

والله انتي بتتكلمي بالعقل والناس دي مبتفكرش الناس دي بتستسهل وأهو أي حد مكان أي حد وخلاص

يسلملي مرورك الدافي

......

مصطفى

والله دي كوميديا سودا
هم يبكي وهم يضحك


مبسوطة انك هنا
يارب دايماً

......

سبايدرمان

اتكل على الله
مروة ست البنات

بالشفا

نورت في أول زيارة يا افندم

.......

نودي الجميلة

تسلمي يا ست البنات

إلا يعني إيه ثقافة صحيح

.......

فراجيل

طبعاً فينا منها كتير
بس أصل الحدوتة مش كدة مبتتحسبش بالطريقة دي هكسب إيه وهخسر إيه
الحياة مشاركة مش كورة فيها كسبان وخسران

نورتي يا جميلة في أول زيارة ليكي هنا

.......

حلم بيعافر

تصدق صعبت علىَّ
بس ما تقلقش المروات كتيير يعني
بص هتلاقيها بنت الجيران أو زميلتك في الشغل

هتلاقيها ضروري
دا مفيش أكتر منهم
اسألني أنا


نورت يا افندم

......

مني

إنتي أصلاً حد دافعلك صح
أصل مش معقولة
ايه الحنان والدفا والرعاية دي كلها
يا منى دا انتي بتيجي هنا تاخديني ف حضنك وتمشي
قوليلي أعمل أنا إيه

منى هو انا قلتلك اني بحبك قبل كدة
أصلي بحبك خاااااااالص

وبعدين الست مارلين مونرو طول عمرها جامدة يعني
بس النوبة دي تستحق تصفيق حاد وانحناء


لمستي قلبي يا بت انتي
ووحشتيني

.......

واندا

وللأسف ليه
فيه ناس ضروري يروحوا لمروة على طول
وميوجعوش دماغنا

نورتي ف أول زيارة للمدونة يا افندم

.......

نهر الحب

والله أنا مشقتش حد بالشكل ده
كل الحكاية ان البنات بيبقوا بيتكسفوا حية وخجولين وخوافين شوية ومحناجين شوية حنان وحب بس كدة

بس اللي داخل ينقى ف طماطم ده مش هينفع
مروة أحسن له ميت مرة
الحياة شركة فيها تفاهم ودفا مش معركة أبداً

يسلملي مرورك يا نهر الحب

.....

محمد

أنا قعدت أضحك نص ساعة
هوة دا الكلام
هي دي الرجالة بتاعة زمان
صح كدة يا معلم

طب تصدق وحشتني
مرورك دايما جميل


......

جوليا الجميلة

يعني هما يستهبلوا واحنا نقعد نضحك عليهم ونسبلهم
الحل في الصراحة والصدق والمشاركة اللي بجد
يعني هو مش بيحب واحدة علشان تقعد تقوله كلام حلو عمال على بطال
وضروري يقرب منها بجد علشان تقدر تفتح قلبها ونقول كلام حقيقى يمسها

والله يااختي رجالة آخر زمن
بس سيبك
وجودك هنا بيفرحني والله

.....

محمد سلامة

لأ كله إلاالفهم
بعد الشر علية منه يا اخويا

نورت يا محمد

........

الغير معرفة

والله الرجالة والستات الاتنين غلابة ومقهورين ومش عارفين يعملوا إيه
وأسهل حاجة الواحد بنزل السوق ويشتري حسب المواصفات

القرب من الناس بجد صعب
عمل علاقة مشتركة فيها تفاهم وحب واحترام صعب
ان الواحد بفتح قلبه للناس صعب

علشان كدة الحدوتة اتلخبطت

نورتي يا افندم

...