الأحد، 15 فبراير 2009

بطلات باطلات ,,, وأغرب عيد حب عشته









عايزة أكتب عن الرسالة الدافية أوي اللي فتَّحت عيني عليها
وبجد لمست قلبي من صديق وأخ عزيز جداً
( علشان دماغكو متوديش وتجيب مرتبط ببنت جميلة جداً وصاحبتي)

بعد شوية لقيت رسالة ع الفيس بوك من حد عمري ما شفته قبل كده

ومعرفوش خالص ... طلب يتعرف علىَّ ويشوفني
طبعاً دا غيراني صاحية مبسوطة وبغني من غير سبب

قرَّبت أصدق الخيالات اللي بتدفيني
قرَّبت بجد أصدق ان عندي معجب وهمي معرفش حتى اسمه الأول ايه

عيد حب غريب اكتشفت فيه ببساطة

انهم قدروا يضحكوا علىَّ كل الوقت اللي فات ده
الأفلام والأغاني والورد الأحمر والدباديب والبنات والولاد
لأنه مفيش حاجة فعلاً بتحصل بالشكل ده
مفيش واحد -في البلد دي ع الأقل- بيجيب لحبيبته 3 دست شمع

و50 وردة بلدي بريحة وصندوق كبييييير مليان بالونات ملونة
مبتحصلش خالص

ولو فرضنا انها حصلت مرة فطبعاً مستحيل هتحصل معايا
مش لأني مش مرتبطة

ومش لأن ذوقي في الرجالة منيل بستين نيلة
بس لأن الوقت المفترض فيه ان الحاجات دي تحصل خلص خلاص

كمان بقى الولد الجميل خالص الوحيد جداً اللي عمري ما قابلته
مفيش أي سبب يخليه وحيد

إلا إذا كانوا البنات اللي حواليه مبيشوفوش
والله دول حتى اللي مبيشوفوش بيحسوا
بصراحة مش فاهمة ...

حد بالجمال ده المفروض انه يبقى مطارد بالمعجبات
مش قاعد لوحده في بيتهم

ومحدش يقولي مبتطارديهوش ليه
لأني خايبة يا جماعة ومبعرفش أطارد حد


وبعدين اتضح ان معظم الناس غارقانين في وحدتهم إذا كانوا ولاد ولا بنات
طب ليه منعملهمش تجمع في (عيد الوحدة) ونشوف هيحصل ايه

وليه منعملش للناس دول _وانا معاهم _ علاج جماعي
نزود ثقتهم بنفسهم ونعلي الإحساس بالأمان

ونوطي مؤشر الخوف وعدم الثقة شوية
ومزيكا مناسبة في مكان مفتوح

وحبايتين تلقائية والدنيا هتبقى زي الفل
طب والله الفكرة دي بجد مش هزار


ما احنا لازم نساعد نفسنا
لأن واضح ان المجتمع والناس وأهالينا نفضولنا وشالوا إيدهم م العملية
محدش بيدور على عريس لبنته

بس طبعاً بيعايرها ويذلها انها لسة قاعدة في البيت
ومحدش بيساعد ابنه في الجواز

بس بيفوقوا متأخر لما يكتشفوا ان نفسهم في الأحفاد
ما علينا

حاجة غريبة أوي حصلت النهاردة كمان
لقيت تعليق على موضوع قديم عندي لشخص مجهول


لو انا مش متأكدة اني معنديش أحباء سابقين
كنت قلت دا حد كان بيحبني زمان
مش لأني حسيت إنه يعرفني أوي

بس لأني حسيت انه يقصد فعلاً اللي بيقوله....

وفعلاً كان ممكن أصدق اني بدوب بس في الغياب
وبتجمد في الواقع بمواجهة البطل
بس بنظرة سريعة للتاريخ
اتضح ان البطل الأولاني كان بيسكت خالص

لما ابقى حقيقية ومشاعري طالعة فى وجوده
ومبيقبلش أي كلمة فيها شبهة دفا أو حنان

والبطل التاني كان بيسمع صوت أفكاري ..
وبيشوف الحاجات اللي مقدرش حتى أصارح نفسي بيها
كان حاسسني أوي بس لا أنا ولا هو كان ينفع نمشي أي خطوة مع بعض


البطل التالت بقى كان بيعتبر رغبتي في اني أمسك ايديه
أو اترمي ف حضنه انها انحلال أخلاقي
لدرجة انه كان بيسلم علىَّ غصب عنه

ومن هنا يتضح ليه أنا مضطرة أدوب ف الغياب أيها المجهول العزيز
لأنه الواقع مدنيش ولو فرصة واحدة صغنونة للتعبير عن نفسي
ومتشكرة أوي للتعليق الملهم ده






.............

9 التعليقات:

محمد سلامة يقول...

أنتي عنيكي بتبص لجوه , مش لبره زي بقيت الخلق , على رأي نجيب محفوظ
لكن المرة دي أنا حاسس إنك بدأتي تدركي أن هذا الولد المنتظر , يسكن داخل غادة فقط
و طول ما هو جواكي و مش عايزه تطلعيه , عمرك ما هتمسكي إيده و لا هتترمي في حضنه .
بصي بره شوية يا غادة من فضلك .
على فكره عدم حضورك الاربع اللي فات خلانا حاسين إن في حد مهم جدا ناقصنا

Unknown يقول...

مش عارفه

بس عجبتني "أذوب في الغياب"

Blank-Socrate يقول...

غادة العزيزة
انا لى نفس جوانب شخصيتك سواء الخجل او شبه الانطواء
لى عالم شخصى خصب
و لى امنيات و امال عريضه
ناس اصحابى قالولى انى عايش فى ميه البطيخ
و ناس اكثر تأدبا قالوا انت عايش فى عالم سمسم
اعتقد انه العالم اللى بنخلقه لنفسنا نتيجه انعزالنا عى الاخريين
انا اتفق معك انها مسؤليه المجتمع الاهل و ..و ...
لكن انت انسان
مدرك (انت المخلوق الوحيد المدرك فى الخليقه كلها)
انت اعظم من الكون باكمله
لانك تدركين و جود الله و تمتلكين اقوى شىء الحب المدرك
فقط الايمان بالنفس و الثقه فى محبه الاخريين لك
-------------
زمان و انا فى الكليه كنت هادى جدا و مش باعرف اهذر واتكلم مع الناس
كان فى واحد صحبى عكسى تماما منتشر و معروف لدى الجميع
فى نهايه العام اتعودنا نكتب اوتوجرفات للناس اللى اتخرجت و هم يكتبلونا فى اوتجرافتنا
المهم انى كنت مهتم اعرف الناس كتبت ايه لصحبى لانى حاسس انه باسلوبه المرح بيوصل للناس افضل منى
اتفاجئت انى بالفعل الناس اتكلمت كتير عن خفه دمه و ذكرياتهم الجميله معاه
انا الناس كتبتلى عن حاجات جوايه كنت فاهم انى مش باقدر اوصلها ليهم لانى خجول و مش باتكلم او اهذر
عاوز اقولك انك محتاجه تصدقى انك بتوصلى للناس كويس قوى
لان الناس اللى احساسها مرهف و بتتعامل بمحبه بتكون محبوبه من الكل
--------------------
اما موضوع الارتباط
فهو معقد
:)
لكن انا اؤمن ان الله يهتم بشكل خاص بهذا الامر
و ان طاقه الحب اللى جواكى دايما هتصلح كل الامور و الظروف
------------------
انت بتقولى ان فى حاجات مينفعش انك تعميلها دلوقتى
عاوزك تفكرى لما انسان او شاب تغمريه بكل الحب و الدفء المختزن جواكى هتكون قد ايه مشاعر حبه ليكى
---------------
اسف للاطاله المشوة
بش انت و انا بنتكلم نفس اللغه نفس المشاعر و الواحد مبيعرفش يعبر عن نفسه
و لا مبيحبش يعبر عن نفسه؟

ميرا ( وومن ) يقول...

ياااااااااااااه معقول انتي بجد حد حساس قوي وشجاع جداً

غادة بجد مبسوطة اني قابلتك وبعديت قريتلك

فكرتيني بيا قوي قوي اسمحيلي اعمل حاجة عمري ما عملتها اني اعزمك عندي في المدونة تقريلي بوست أسمه أريد رجلاً ومستنية رأيك فية

تحياتي
ميرا

elsha3er يقول...

انا اول مرة ازور مدونتك ومبسوط جدا ان دة حصل

بس انتى خلتينى احس احساس غريب جدا والله انتى ممكن تستغربى بس دة اللى حصل هل فى حد قليل الثقة بنفسه للدرجادى

مش عيب انك تكونى خجولة مش عيب انك تطاردى حد بس العيب انك ما تكونيش واثقة انك تقدرى تعملى حاجة من السهل انك تعمليها

حلوة اوى فكرة التدريبات اللى انتى قولتى عليها

بس خلى دايما ثقتك بنفسك نابعة من ايمانك بربك وهو دة معنى الامان الحقيقى خليكى دايما واثقة ان ربك لن يخزلك


وانا اذا سمحتى ان شاء الله ححتاج حضرتك فى فكرة حيجتمع فيها عدد كبير من المدونيين بس مش حقدر اقولها عشان الفكرة ما تتسرقش ان شاء الله اتمنى انها تعجبك وانك تكونى فيها لان انا شايف فى حضرتك امكانيات كبيرة ضايعة وراء عدم الثقة

انا سعيد جدا لانى زرت مدونتك الجميلة

تحياتى


احمد الشاعر

غير معرف يقول...

طيب أنا يوم الفالانطاين ده كنت هبعت رسالة لآل بعضشي واقولكم نعمل لقاء للسناجل(جمع single )بس قلت ماحدش هيعبرني كالعادة:D
بس علي فكرة الورد والشيكولاتة والكلام الحلو بيحصلوا ساعات بيحصلوا بشكل مفاجئ جدا ومش متوقع لدجة اننا مش بنصدقهم
ووقتهم ما فاتش ولا هيفوت لان ببساطة مالهمش وقت محدد حكاية الوقت المحدد دي جزء من سلسلة الأكاذيب بتاعة الأهل والمجتمع والأفلام الورد والشيكولاتة مالهمش وقت الناس يحددوه ،هما بييجوا في وقتهم وفي وقتهم الصح جدا
ويوم ما يظهر مستر رايت أنا متأكدة انه هيبقي عنده حاجات كتيـــــــــير أوي يديهالك تنسيكي الود والشيكولاتة والدباديب
اللي لمسني جدا في البوست ده (معظم الناس غرقانين في وحدتهم)ده حقيقي أوي للأسف ،متهيألي لو عملنا عيد الوحدة اللي بتتكلمي عنه ده مش هيبقي للسناجل بس،لا ده هيبقي كمان للناس اللي بتحب بس مش عارفين يعيشوا علاقاتهم دي صح لانهم اتعودوا ع الوحدة وغرقوا فيها للآخر
ما اقدرش احكم علي الأبطال السابقين اللي حكيتي عنهم بس اقدر اقول اننا ممكن نعتبر كل واحد فيهم مسودة غير مكتملة لحدوتة لسة ما اتكتبتش
انتي فنانة وعارفة كويس ان الحدوتة في الآخر هتكون أحلي كتير من كل المسودات الناقصة
حضن جااااااااامد اوي لحد ما أشوفك

غير معرف يقول...

هو ينفع حد يبقى ف قلبه الدنيا كلها و الناس و الألوان و الحياة و الحب ده كله

و يعتبر وحيد !


الوحيد ده حد رافض و كاره
فسفوسة طالعة فى بشرة سوية !
يسمع نفسه و يكلم نفسه و يرى نفسه
فقط

ولا ايه

hasona يقول...

السلام عليكم
دماغنا مش رحات بعيد ولا حاجة
بس الولد ده أصبح فريسة يطارد

،،،


الواقع لا يعطيك فرصة للتعبير عن نفسك
أم نحن من نخلق هذا الواقع

واذا كانت أمامك أكثر من فرصة - وانت خذلتي أو تخاذلتي - في اظهار ما في قلبك

أكيد ذوبتي كثيرا ولكنك كنت تعاني وتعاني ولا يشعر بك أحد
أظهري ما بداخلك
دربي قلبك
وساعديه ولا تعذبيه

تحياتي

ست الحسن يقول...

محمد سلامة

مش هعرف أرد ع التعليق ده يا محمد
لأنه لمس قلبي

أوي

......

مياسي

طيب بس أدوب في الغياب بتاعة المعلق المجهول
وهي حلوة فعلاً

تعالي دايماً

......

مينااااا

أنا بحب عالم سمسم والبطيخ مالهم يعني
الإيمان والثقة ... عندك حق جداً
شوف يامينا
أنا متأكدة انك شخصية محبوبة جداااً
وانا زيك شايفة ان كل حاجة في معادها

بس انا مش هعرف أرد على كل المشاعر الجميلة اللي تعليقك سابها فية
مش عارفة أتكلم بصراحة

ربنا يسعدك وينور قلبك يا مينا

......

ميرااا

أخيراً جيتي
أهلاً بيكي في أول زيارة للمدونة
ومبسوطة ان البوست عجبك
وطبعاً يا افندم رحت عندك وقريت
وعجبني خالص
بس كان المود مش مساعدني أعلق
بس قريب هتلاقيني عندك

نورتي وهستناكي تاني

....

أحمد الشاعر

أهلاً بيك في أول زيارة للمدونة
بس تعليقك بالنسبة لي كان مدهش
لأني قعدت أفكر ... ايه اللي مكتوب ساب عندك الإحساس ده

بس عموماً
أنا متشكرة أوي لاهتمامك
ولتعليقك المليان تعاطف ومشاعر طيبة

نورت يا أحمد وهستناك تاني

...

كاميليا

مليش دعوة أنا عايزة الحضن بتاعي دلوقتي حالاً
والجزء بتاع ان عيد الوحدة هيحتفل بيه ناس مرتبطين ومش عارفين يعيشوا عجبني أوي وحسيته لأنه حقيقى جداً

ومتشكرة لوجودك الجميل

.......

مها

انتي يامها اللي قلبك مليان حب ودفا ونااااس كتير

متغيبيش لأن وجودك هنا بيفرحني

......

حسونة

أهلاً بيك في الزيارة الأولى هنا
ومش عارفة ليه حسيت بشوية هجوم
زي بالظبط لما حد يقولي
فوقوا من اللي انتوا فيه وحلوا مشاكلكم وبطلوا تعلقوها على شماعة الناس

بالنسبة للصياد والفريسة
فاانا مقصدتش أكتر من انه حد جميل وضروري كل البنات اللي حواليه يبقوا شايفين ده
بس

الجزء بتاع دربي قلبك وساعدي نفسك
جميل

شكراً

...