الأحد، 11 مايو 2008

معكم من الواقع ( أمنا الغولة )




أعترف
إني بعيييدة أوي عن نفسي ، إني خايفة جداً

أعترف
القمر هلال مخنوق بقاله يومين
بقالي يومين مش عارفة أنا مين

بحلم .... وأنا نايمة بس
وانا صاحية ... بتوووه

خايفة إني أشتغل وخايفة مشتغلش
حياتي اتحولت لمسرحية من فصلين ،
الفصل الأول ( أمنا الغولة ) في الشغل : الصبح بشتغل
وباليل برجع البيت هلكانة يدوب أنام
الفصل التاني ( أمنا الغولة ) في البيت : الصبح بنام وبعد الظهر في البلكونة
وباليل قدام التليفزيون أو الكمبيوتر

أنا بعيش في الوقت اللي بين الفصلين
بعيش لما بكتب حاجة حلوة فعلاً أو لما اتكلم مع حد بحبه
بعيش لما بعمل كيكة الشيكولاتة وتطلع حلوة وتعجب الناس
لما بندمج مع موسيقى حقيقية طالعة من جوايا - الكلام ده بتاع ست الحسن -

تعبتتتت
عايزة أروح حتة بعيييييدة
صحرا مثلاً
عايزة أرجع للنقطة اللي كنت عندها
عايزة أرجع مبسوطة وبضحك من قلبي


أنا هقف هنا
لأني محتاجة أستريح بجد

4 التعليقات:

Miss. Sosa يقول...

احساسك بالوحدة عرفتي تعبري عنه بمشاعر دافية جدا
اكتبي كمان

blackcairorose يقول...

ست الحسن

شعور عام فى المدونات بالاحباط والحزن، والاسباب تختلف سواء كانت شخصية أم وطنية أو الاثنين معا

لعلها ضائقة وتنفرج

يارب

ست الحسن يقول...

miss. sosa
blackcairorose



متشكرة اوي على اهتمامكم
مروركم من هنا فرحني

FAWEST يقول...

أنا مستنى أدوق كيكيه الشوكولا