الخميس، 7 مارس، 2013

البحر اللي حواليه شط









دي أول مرة أبقى عايزة أرجع أكتب تاني من غير اسمي ما يبقى مكتوب
حاسة إني مخنوقة بعيون لناس وهميين


النهاردة وأنا ماشية في طرقة دار الكتب 
لقيت بنت عيونها مليانة ترحيب وحب
أنا متأكدة إني معرفهاش بس وقفت قدامها قالتلي: أنا منى
منى بنوتة كل العلاقة اللي بيني وبينها كلام في الإنبوكس
يخص إنها عايزة تروح تقرا مع سلوى  .... بس كدة
بس أنا بشوف الحب دا في عيون ناس كتييير ومببقاش فاهمة ربنا عايز يقولي إيه


البنات اللي حواليا تعاستهم مختلفة عن تعاستي
الحكاية دي صعبة على فكرة
مش عارفة أشرحها أو مش عايزة
بس بتخليني دايمًا فوق الرصيف بقرا كتيب إرشادات المشي بصوت عالي عشانهم
أصلًا مسألة إرشادات المشي دي ساخرة جدًا
بس جوا شارع كل الناس اللي فيه بتتكعبل في الطوب
أو بتقع من طولها طول الوقت يبقى المشي ..... بس مجرد المشي محتاج إرشادات


بنام بشكل متقطع وغير عميق وباصحى تعبانة من أحلامي
بروح مشاوير كتييييير أوي مش عايزة أروحها
رغبتي في الوجود برا البيت بتتضاءل ووجودي برا البيت بيزيد
إزاااااي معرفش


امبارح كنت بقول لولد كنت بحبه إنه المشي بين الحب والصداقة مبقاش مناسب ليَّ
وقلت دا بمنتهى العقل ونهيت الموضوع ببساطة وكملت مشي واتكلمت في حاجات تانية بعيد ......... هو أنا ليه مينفعش أصرخ وانفجر في العياط في وسط الشارع زي بقية البنات ..... أنا ليه عاقلة كدة ؟؟؟ ليه بس؟


ساعات بحس إن غضبي المتحوش ممكن يحرق بلد بحالها
وساعات بحس إنهم ميستاهلوش يشوفوا وجعي عريان لإنهم مش مهمين للدرجة دي


أنا مش هنبسط لو سيبت بيت أهلي ورحت بيت تاني عشت فيه حياة تعيسة ومُنهِكة
وبصراحة هو دا اللي أنا مصدقاه جدًا
مش عارفة إيه اللي ممكن يحصل عشان أمشي من هنا
الحل الوحيد إنه البيت يقع فوق دماغي
على فكرة ... هو بقاله شوية بيقع وأنا خايفة أواجه الحقيقة دي


محدش ممكن يحس بلسعة الحشرات الصغننة اللي بتتمشى عليك
بس كل الناس هتلومك 
لما وشك وإديك يطفحوا حبوب حمرا محدش عارف طلعت فجأة إزاي


كل الناس حواليا عايزة مني شوية نور ودفا
وأنا عايزة حضن من ربنا وبس


بطلت أكتب مذكراتي لأنها مبتتطورش ..... بشتكي من نفس الحاجات اللي بقالي كتييير بشتكي منها ..... بس أسامي الناس بتتغير وساعات مبتتغيرش

عندي تصور إنه كل حاجة أنا عايزاها هتجيلي لحد عندي 
بس أنا مش هفرح بيها لأسباب مجهولة
يمكن ميكنش تصور وبس ... دا بيحصل فعلًا


اللمبة النيون اتحرقت بقالها شوية .... حادثة بسيطة زي دي ممكن تخلي مودي سخيف
كل يوم باليل وأنا بدور عليها ومش بلاقيها


ساعات بحس إني مسجونة جوايا 
وكل الناس بتبعتلي جوابات شكر إني بحررهم من سجنهم


عايزة أعوم في البحر .... الحكاية دي عمرها ما حصلت
أنا عايزة أعوم في البحر اللي حواليه شط قاعدين عليه عيلتي بيضحكوا زي الصور بتاعة الناس زمان
الحلم دا عمره ما اتحقق أبدًا
وأصحابي صعب يبقوا العيلة دي ..... صعب أتمسك بأحلام بعيدة وصعبة للدرجة دي
بس هو دا ملخص حياتي مجموعة أحلام صعبة وبعيدة أوي


الناس بتشوف أد إيه أنا قوية وجميلة
وأنا كل يوم بقعد ألملم في الوجع وأغسل روحي من الدم


عايزة حد ييجي ينضف معايا البيت اللي عمره ما بينضف مهما حاولت أنضفه
حاساه بيهزمني وبيصحي فيَّ وجع أكبر مني بكتييييير


مش عايزة أقعد أكتب ع الكمبيوتر لحد ما أموت
ولا عايزة أتحرك من بيت لبيت عشان أمي عايزة كدة والمجتمع هيبقى مبسوط كدة


أنا كبرت جدًا على فكرة بس عندي خلل جوايا بيقولي إني مكبرتش ولا حاجة وإنه الحياة قدامي مش ورايا
الخلل دا ساعات بيختفي وكل حاجة بتمشي زي ما المفروض تمشي
وأحس إني عايزة أموت هنا وكفاية كدة تعب ع الفاضي بأة


أنا بتكلم عن نفسي بس عارفة إني بتكلم عن ناس كتير ودا بيحميني من الضياع طول الوقت

أنا بفرح بحاجات صغيرة أوي وبازعل أوييييي
بس بروق بسرعة وبارجع أفكر في خطة جديدة تخليني عايزة أصحى من النوم


بس كدة


.......

5 التعليقات:

مؤنس فرحان يقول...

=-=-=-=-
دي أول مرة أبقى عايزة أرجع أكتب تاني من غير اسمي ما يبقى مكتوب
=-=-=-=-
(كتير يا غادة بأحس بنفس الإحساس دا .. وموش عارف ليه .. ؟؟ هل أنا بقيت بأمثل كتير ..؟؟
أنا بقيت سئ ..؟؟
أنا منافق .. أنا كذاب ..؟؟
بس بحس انى بأعمل مجهود عشان ما أمشيش ورا القطيع)
=-=-=-=-
بروح مشاوير كتييييير أوي مش عايزة أروحها
رغبتي في الوجود برا البيت بتتضاءل ووجودي برا البيت بيزيد
إزاااااي معرفش
=-=-=-=-
(إحنا مفتقدين الأنانية .. و القسوة)
=-=-=-=-
امبارح كنت بقول لولد كنت بحبه إنه المشي بين الحب والصداقة مبقاش مناسب ليَّ
(هو كان رد فعله إيه .. لسه عايش ؟؟)
=-=-=-=-
وساعات بحس إنهم ميستاهلوش يشوفوا وجعي عريان لإنهم مش مهمين للدرجة دي
=-=-=-=-
(هما موش مهمين .. بس ممكن فى وسطيهم حد موش باين فى وسط زحمتهم يكون مهم)
=-=-=-=-
أنا مش هنبسط لو سيبت بيت أهلي ورحت بيت تاني عشت فيه حياة تعيسة ومُنهِكة
=-=-=-=-
(أنا مرعوب من كده .. لسه إمبارح كان صحاب ليا بيكلمونى عالجواز .. وبعد ما فضفضت معاهم شوية تأكدت انى مريض نفسى و عندى عقد و مخاوف كتير )
=-=-=-=-
كل الناس حواليا عايزة مني شوية نور ودفا
وأنا عايزة حضن من ربنا وبس
=-=-=-=-
(ربنا من أسماءه العدل)
=-=-=-=-
بطلت أكتب مذكراتي لأنها مبتتطورش ..... بشتكي من نفس الحاجات اللي بقالي كتييير بشتكي منها ..... بس أسامي الناس بتتغير وساعات مبتتغيرش
=-=-=-=-
(أنا حاسس إنى ما بأكبرش .. مابتعلمش .. عمال أعيد نفس الشريط .. كل مايخلص أعيده من تانى)
=-=-=-=-
عندي تصور إنه كل حاجة أنا عايزاها هتجيلي لحد عندي
=-=-=-=-
(سبحان الله .. موش عارف الإيمان دا سببه إيه .. بس متأكد من كده)
=-=-=-=-
ساعات بحس إني مسجونة جوايا
وكل الناس بتبعتلي جوابات شكر إني بحررهم من سجنهم
=-=-=-=-
(إيه الحل ..)
=-=-=-=-
عايزة أعوم في البحر .... الحكاية دي عمرها ما حصلت
أنا عايزة أعوم في البحر اللي حواليه شط قاعدين عليه عيلتي بيضحكوا زي الصور بتاعة الناس زمان
الحلم دا عمره ما اتحقق أبدًا
وأصحابي صعب يبقوا العيلة دي ..... صعب أتمسك بأحلام بعيدة وصعبة للدرجة دي
بس هو دا ملخص حياتي مجموعة أحلام صعبة وبعيدة أوي
=-=-=-=-
(أنا عايز حاجات كتير .. المشكلة انها عمالة تكتر)
=-=-=-=-
مش عايزة أقعد أكتب ع الكمبيوتر لحد ما أموت
ولا عايزة أتحرك من بيت لبيت عشان أمي عايزة كدة والمجتمع هيبقى مبسوط كدة
=-=-=-=-
أنا كبرت جدًا على فكرة بس عندي خلل جوايا بيقولي إني مكبرتش ولا حاجة وإنه الحياة قدامي مش ورايا
الخلل دا ساعات بيختفي وكل حاجة بتمشي زي ما المفروض تمشي
وأحس إني عايزة أموت هنا وكفاية كدة تعب ع الفاضي بأة
=-=-=-=-
أنا بتكلم عن نفسي بس عارفة إني بتكلم عن ناس كتير ودا بيحميني من الضياع طول الوقت
=-=-=-=-
أنا بفرح بحاجات صغيرة أوي وبازعل أوييييي
بس بروق بسرعة وبارجع أفكر في خطة جديدة تخليني عايزة أصحى من النوم
=-=-=-=-

غادة .. أنا واحد من اللى قلتى انك بتتكلمى عنهم .. يمكن انتى أشجع منى و بتعبرى أحسن و كمان أطيب منى

ست الحسن يقول...

مبسوطة أوي بالمشاركة الخاصة دي
بجد

.....

شكرًا يا مؤنس

وأنا مش أشجع ولا أطيب منك
أيدًا
أنا بخبي الوحش اللي جوايا وبس
زي كل الناس


:) :)

Sheroo يقول...

ايه الحزن ده كله
بتفكرينى بنفسى زمان
مش من زمان اوى
لحد 3 سنين فاتوا
كنت وقتها عايشة كل اللى انتى بتكتبيه
كل حاجة هى هى كل يوم زى اللى قبله نفس الشكاوى و نفس المشاكل والبيت اللى تعبت من انى افضل قاعده فيه
وبحاول ابعد عنه باستمرار

وإحساس اليقين فى ربنا غن فى حاجة حلوة اوى جاية

وفضلت مستنية
بقيت 27 لما خلاص هنفجر
مش علشان عايزة احب و أتجوز واخلف
بس على الأقل كان نفسى فى مشاكل جديدة اشتكى منها
مش هى هى نفس المشاكل

بقيت أخرج وأقرا وأروح حفلات و ندوات اللى ليا فيه واللى مليش فيه
أعرف ناس
كل يوم ناس جديدة
و مزهقتش
كا نفسى احس إن فى إختلاف
كنت فى صدمة قصة حب جامده اوى
كانت اكبر من قدرتى على إحتمالها
كانت بدمرنى
وكل ما أفتكر كلمة الضربة اللى ما تموتنيش تقوينى أضحك أوى
علشان كنت كل يوم حاجة فيا بتموت ومكنش عندى اوى قدرة إنى أنقذ اى حاجة
مكنش عندى غير الأمل بتاع بكرة أحلى
رغم إن بكرة زى إمبارح زى بعد بكرة زى الاسبوع اللى فات

وبين يوم وليلة

بكرة بقى أحلى
والدنيا اتغيرت 180
وبقى عندى سلمى بنتى
وجوزى
فى كام شهر

وكل ما أفتكر اللى فات
أقول ياه ده أنا كنت ميته بالحيا زى ما بيقولوا

ربنا مفيش أكرم منه

وعوضنى عن كل اللى فات

بس بينى وبينك
أنا فى أى لحظة بيخطر فى بالى القصة القديمة بلقى نفسى مش قادرة أسامح رغم كل المُحاولات اللى بينى و بين نفسى علشان أسامح
وألقى نفسى لسه بدعى عليه غن ربنا ينتقم منه
رغم إنى دلوقتى بعيش حياه أجمل كتييييييييييير من اللى انا كنت بتمناه أو حتى بحلم إنى أعيشه

خلى الأمل فى ربنا كبير

ويقينك أعلى من كده

ربنا دايماً عند ظن عبده بيه

ولا أيه

ست الحسن يقول...

دا مش تعليق ع النص يا شيرو
دا حضن دااافي وقوي جدًا


تسلمي يا جميلة
ربنا يطمنك ويسعدك

وخلي اللي فات يفوت من جواكي بردو
متنسيش تشكري الألم اللي اتسبب فيه
لأنه خلاكي تكتشفي دنيا أوسع وتعرفي نفسك أكتر
وتتغسلي من الشوائب وتبقي مستعدة للسعادة اللي ربنا بعتهالك


خارج الألم والوجع دا
كانت السعادة هتيجي بردو بس انتي مكنتيش هتشوفيها كويس أو تحسني تقدير قيمتها
فهتعدي كأنها محصلتش ومجاتش


الحمد لله على نعمة الألم وعلى الأمل
والحمد لله على رسالتك الدافية أوي دي

شيرين يقول...

جمييييل جدا ومؤلم