الخميس، 17 ديسمبر 2009

تهييس حزايني








عندي رغبة اني أصررررخ بأعلى صوت ممكن
أول مرة اكتشف اني أنا وأختي لا ننتمي لنفس السرب
يعني لو انا سيد قشطة هي ممكن تطلع بطة
أول مرة أحس ان كلامي غير قابل للفهم

هوا انا ليه ما اعرفش ولا سيد قشطة واحد
مضطرة أشرح وأحكي .... بس بيقاطعوني ويتريقوا على
وبيقوللي اللي المفروض كنت عايزة أقوله
اللي هو بعيد جداً عن الحدوتة

ايه بقى الحدوتة
الحدوتة اني بستهبل والسحر موجود في الحكايات وبس
في الخيال والأحلام محدش بيصدق وجودوه في الواقع
وانتي أصلاً معندكيش ولا دليل واحد
بيقى انتي حاجة من اتنين يإما بتضحكي على نفسك
يإما مايلزمكيش .... خليكي بقى لحد ما تبقى تفوقي
بس انتي ف كل الأحوال بتهرتلي وبتقولي كلام محدش هيسمعه

ايه قيمة انك تقولي قابلت حد عرفت اتكلم معاه
وايه يعني مادا بيحصلهم كل يوم عادي جداً خالص ...
وانتي مفيش حاجة بتحصلك يعني

عمر ما حد شافه معاكي .... وعمرك ماقلتي بنحب بعض
يبقى ايه بقى فاضل ايه محتاجة تحكية ... هتقولي ايه
انتي م الآخر بتضحكي على نفسك وتضيعي وقت
كنتي لسة هتقولي ... قاطعوكي بالتريقة والتهريج فحسيتي فجأة بالبرد
ولسانك مبقاش عارف يقول والدموع اتجمدت جواكي

في الشارع بتحاولى تتنفسي مش عارفة
الهوا عمال يقل ...
يقل ...

يقل



...........

المدونة كانت واحشاني مش عارفة ليه
الكتابة ع الهوا من غير مراجعة وقص ولزق
من غير وشوش طيبة ووشوش شريرة






.....


10 التعليقات:

رضوى داود يقول...

و أنا كمان.

basma saghir يقول...

لو انتي قابلتي في حياتك السحر فعلا..يبقى انتي شخص محظوظ جداً..حتى لو كنتي لمحتيه من بعيد..حتى لو كان لمرة واحدة بس

في ناس غيرك بيسمعوا عنه بس..حتى معندمهمش القوة ولا القدرة انهم يتجرأوا ويدوروا عليه..يمكن بسبب الخوف من خيبة الامل ويمكن علشان ناس واقعيين بزيادة وفاكرين انهم كدة ناضجين وعايشين الحياة صح

غادة عايزة اقولك ان انا واحدة من الناس اللي عمرهم ماقبلوا السحر في حياتهم..ولاحتى في الاوهام اللي عشتها قبل كدة بس الحياة بيس يعني وشغالة والدنيا ماشية بس يعني لو قابلته دي هتبقى حاجة هايلة ورائعة

ليه دايماً حاسة ان انتي فيكي حاجة مش تمام وانك مش باقي السرب..مش يمكن السرب هو اللي مش زيك :)

keep the spirit up ;)

nudy يقول...

انضم الي بسمة حافظي علي روحك الجميلة وصدقيني سيد قشطة بيسمح لنفسه يستمتع بالدنيا ويحس بمشاعر الناس لانه طيب لكن البطة كلنا عارفينها عمرها ما بتبص لحاجة غير البحيرة ومش بتشوف حاجة خارج حدود الميه حتي الصياد اللي معدي في القارب عمرها ما شافته وعمرها ما لعبت مع السمك ولا شافت عروسة البحر لكن سيد قشطة مصاحب الصياد وبيقعد مع عروسة البحر كل يوم وهي بتمشط شعرهافي الشمس ويحكوا حاجات كتير عمر البطة ما ح تشوفها

Unknown يقول...

:)
انا كنت مؤمنة بكل الحاجات دي .. لحد يوم 25 يوليو 2008
دة بالنسبة لي ما قبل التاريخ ...
دلوقتي انا اتغيرت .. :)
ممكن بقيت قاسية شوية على الاخرين لأن محدش فيهم هيكون حنون معايا لو اتحطيت مكانهم و همة مكاني !!
ممكن حاجات كتير :)
بس ماتفقديش ايمانك .. احسن تبقي زيي ..
و صدقيني انا نفسي مش عاجبني اني ابقى زيي !!
:)

صباحك سكر .

رانيا مسعود Rania Masoud يقول...

وحشتيني و وحشني كلامك.. و خلليني بدال الفراغ اللي سايباه هبه شوية ف حياتك
بجد و الله بحبك يا أختي الجميلة الهادية
و بحب فيكِ كل تفاصيل بتجمعنا سوا
أقولك للصدفة جت لي أغنية يا بنت يام المريلة كحلي و افتكرتك و افتكرت المدرسة و افتكرت الصحاب و بيتهيألي إن محمد منير و الأبنودي مش اتنين واحد كتب و التاني غناله، لأ بيتهيألي إن غادة حبت الغنوة و رانيا كمان و في لحظة جت لرانيا الغنوة زي ما جت غادة من غير ترتيب و لا معاد.
خلليني دايما ببالك.

لو خرجتِ قريب كلميني
و كمان نفسي أقعد معاكِ تسمعيني و أسمعلك زي ما كنا من وقت قريب
تحياتي

السيد الرئيس يقول...

هه !

Ahmad Abdulatif يقول...

حطي احتمال واحد في المة ان معاهم حق ، مش يمكن ؟

هاني مهران يقول...

مافيش حاجة اسمها سحر احنا اللى بنوهم نفسنا بكل احاسيسنا واحنا اللى بنتحكم فى مدلول الاحساس واحنا اللى بنطورة وبنموته وبنعمل كل حاجة واحنا اللى بنحرج نفسنا مش الناس اللى بتحرجنا
من الاخر نحن العدو الاول والصديق الاول لأنفسنا .
فيها ايه لو كل حاجة مهما كانت اتاخدت ببساطةوسهولة وماعقدناش الامور ولا عقدنا نفسنا ولا عقدنا غيرنا .
الدنيا هتبقى احلى لو اتحررنا من _المفروض والمسلمات والتقاليد المتحجرة_
احنا محتاجين نفسنا عشان نفوق
ولازم تيجى عشان نشوفك الاربعاء

ست الحسن يقول...

رضوى

كدة تبقى بصرة

..........

بسمة

مهما قولتلك مش هتقدري تعرفي تعليقك أثر فية إزاى
انتي خدتيني ف حضنك جااااامد

بس تعرفي حتى لو لسة مقابلتيش السحر
فانتي بكل تأكيد جواكي سحر حقيقى
وقدرة عالية على الإحساس بالناس

موضوع السرب ده حكاية قديمة أوي جوايا
وبتظهر لما الدنيا تتلخبط



وجودك هنا دعمني بقوة


......

نودي

عجبتني المقارنة بين البطة وسيد قشطة
بغض النظر عن المسافة بينها وبين الواقع

بس انتي عارفة اني بحبك أوى

صح

.....

شيماء

صعب أوي أصدق انك قاسية
الشخص اللي بيدعم الناس بالطريقة دي شخص جواه حب مش قسوة
ف تقديري انك غضبانة بس
غضبانة أوي

إدي لنفسك فرصة تانية
واتكلمي معاها بهدوء

متأكدة انك هتصفي بسرعة
والدنيا هتتصلح قريب

انتي لسة مفقدتيش إيمانك
انتي بس مجروحة شوية


كل شيء هيبقى كويس قريب ان شاء الله

صباحك مليان دفا وحنان


.......

ست الحسن يقول...

رانيا الجميلة


يا حبيبتي أنا مستحملش الدلع ده كله
تسلمي وربنا يسعدك ويخليكي ليا

آمييين

....

محمد بك فوزي

أنا مخدعتكش أنا قايلة انه تهييس

منور يا افندم


......

احمد عبد اللطيف

الآزمة مش في ان كنت أنا غلطانة وهم اللي صح واللا العكس
الأزمة الأساسية كانت في اني مش مسموح أعبر عن نفسي بطريقتي
بس كدة

وجودك جميل دايماً

.....

هانيييي

مش عارفة ليه جالي إحساس انك بتتكلم مع هاني أكتر ماانت بتتكلم مع غادة

شوف السحر موجود ومش موجود
جوانا وف نفس الوقت برانا
بس كمان هو جزء مهم من قوتنا

بصراحة
انتم كمان وحشتوني أوي
وهحاول آجي


متشكرة يا هاني على كل حاجة

....