السبت، 27 ديسمبر 2008

باي باي 2008






.
2008 بتودع وماشية خلاص
بس تصدقوا كانت سنة حلوة ومليانة أحداث كتيرة
كل السنين اللي فاتت لما كانوا بيمشوا كنت ببقى زعلانة منهم
وبودعهم بالدموع .... بس السنة دي لأ

يمكن علشان استقبلتها بالدموع يبقى لازم أودعها بابتسامة
مفيش أحداث كبيرة حصلت ينفع أحكيها
بس فيه تفاصيل كتير يمكن متهمش حد بس فرقت معايا جداً

عايزة أقول للسنة اللي ماشية
متنسيش تترمي ف حضن السنة اللي جاية
وابقى احكيلها على كل حاجة علشان تفهم احنا عايزين منها ايه

أنا انبسطت خالص في أيام كتيرة
وجاتلي أجوبة عمري ما كنت أتصور اني هلاقيها
ووقفت أدام مرايات كتير وشفت نفسي

أنا اتعلمت ازاي أعمل أصحاب جداد وبقى عندي أمل
واتعلمت مخافش من مشاعري وبقى عندي ناس غاليين أوي

في العيلة ومع اخواتي حاجات كتير اتصلحت وعلاقات كنت يئست منها
اتضح انها محتاجة رعاية مكثفة شوية علشان تخضر تاني

في الشغل اتنصب علىَّ بس مش معترفة وعندي أمل في بكرة
في الحب ... اتضح اني عندي حاجة أديها للي أدامي ...
بجد اكتشفت قدرتي على إسعاد الآخرين
واكتشفت اني أهدا مما كنت متصورة وأكثر رومانسية

متصدمتش ف ناس كتير ... بس أخدت مسافة من ناس أساسيين في حياتي
وجربت أعيش من غير ما اتعكز على حد أو اعتمد على وجوده في حياتي

أنا بجد بحب أمنا الغولة ... أكتر من ست الحسن
بحسها قريبة مني خالص وشوية عايشة الواقع ...
ست الحسن يا جماعة تقريباً ضايعة في الخيال
بس في النهاية أنا قابلاهم وهما قابلني
ومعاركنا مع بعض بتهدا كل ما واحدة فينا بتعترف بوجود التانيين

السنة دي كنت أول مرة أجرب فيها اني أقول الحاجات لآخرها زي ما هي جوايا
وأواجه رد الفعل الوهمي اللي جوايا ان الناس هتفتكرني مجنونة
بس تصوروا .. ولا حد قالي كدة ، بالعكس دول قدروا يشوفوني أوضح
وفتحوا قلبهم ليَ أكتر

السنة بتمشي
ولأول مرة مبقاش بتمنى أقابل حد أحبه قبل السنة ما تخلص
مبقاش عندي الأفكار بتاعت اني أمشي مع حد بحبه ع النيل
ليلة رأس السنة .. زي كل سنة
وبصراحة مستغرباني

السنة اللي بتمشي كان فيها أفعال حقيقية ...
ومشاعر م اللي بتحرك الواحد تجاه الناس مش اللي بتبعده عنهم
أنا بقى عندي أمل وعمر وحسناء ....
وفيه حتة صغيرة جوايا نورت بعد ما كنت متخيلة انها اتحرقت خالص

أفضل وصف أوصفه لنفسي خلال السنة
اني كنت قريبة
كنت قريبة من نفسي ومن اللي حواليا ... حبيت ناس واتحبيت من ناس
وعملت نسيج شفاف ودافي مع عيون كتير

أنا بجد مش زعلانة من 2008 ومسامحة في كل الحاجات اللي وجعتني
وعايزاها تبقى ماشية وهي عارفة اني ممتنة ليها أوي


......

10 التعليقات:

nudy يقول...

عندك حق تكوني ممتنه ل 2008 انتي فعلا اتغيرت فيها كثير قوي وفعلا يا دودو بقيتي قريبة من الناس بدرجة كبيرة ومبقيتيش بتخافي من القرب ده زي الاول وحتي لو حد ضايقك بقيتي بتقدري تعرفي هو عمل كده ليه والوجع طبعا بيقل لما بنفهم احنا مين وعاوزين من الناس ايه وهم كمان بشوفونا احسن اتمني ان تحمل لك 2009 كل السعادة والامنيات التي تتمنيها

هدى يقول...

كل سنة وانتي طيبة ..

كتير ببقى عايزة اقول كلام كبير في بدل الجملة اللي احيانا بتبدو عادية

لكن برجع وأقول ان طيبة مليانة كل الحاجات الحلوة اللي بتمنهالك في السنة الجاية

..

كوني دايما ..انتي

..

أبو عبد الله عمر يقول...

طيّب

نبراس العتمة يقول...

ست الحسن..أمنا الغولة
الاسم الأول غارق وراء المساحيق منمق مصطنع..أما الاسم الثاني فهخو غامكر الحنان رغم سوداوية حروفه..
أهنؤك أولا على التدوينات التي أرفعها إلى مفضلتي ولا أستيطيع أن أضغط زر الاغلاق أعلى الصفحة إلا بمشقة..
باي باي 2008 افتقدتك فيها..أهلا أهلا بـ2009 لو كنت فاتحتها..
مودتي للأمل الذي يتوج عمق تدويناتك

Blank-Socrate يقول...

كل سنه و انت طيبه
كلامك جميل جدا و فعلا واضح ان 2008 أثرتك
اتمنى السنه الجايه تكون افضل
وكل امنياتك تتحقق حتى حوار النيل
:)

محمد سلامة يقول...

أنا بقى واخد على خاطري شوية من 2008 بسبب التعويره اللي فوق حاجبي اليمين و البنت اللي خدها الغراب و طار و بقيت حامل دلوقت ف غراب صغير و المرتب اللي مزدش نكله و القدرة على الكتابة زي زمان اللي مش قادر ارجعها و اني مكنتش واحد من أصدقاء ست الحسن غادة و أهم من كل دول الجاكت اللي سلفته لواحد صحبي و مرجعهوش لحد دلوقت و معرفش عنه أي حاجة تفتكري بحدسك الأنثوي هيرجع ؟

ست الحسن يقول...

نودي

أنا متفائلة خير وان شاء الله 2009 تقدر تفرحنا كلنا
وبعدين كل الحاجات الحلوة أو الوحشة بنقسمها مع بعض
أنا مبسوطة ان لىَ صاحبة زيك وربنا يخليكي ليا ونبقى أصحاب على طول

............

هدى

كل سنة وانتي أطيب وأصدق وأجمل
والسنة دي تبقى مليانة نور
وحب ودفا وبالونات
وياسمين من اللي بتحبيه

.........

عمر

مبتهددش يا افندم

........

نبراس العتمة

تعليقك كان مدهش جداً بالنسبة لي
خصوصاً والمدونة بتاعتك بالشكل اللي هي عليه
محسساني بالنقص واني عايزة يبقى عندي مدونة دسمة زي دي

بجد مندهشة ومتشكرة
ومستغربة ان مدونتي عجبتك

..........

مينا

يارب سنة سعيدة علينا كلنا
وانت كمان تحقق كل أمنياتك
وكل الحاجات والحوارت

ربنا يسعدك يا مينا

.........

محمد سلامة

أول مرة أكتشف ان دمك خفيف
بس يعني كنت هاكتشف ازاي وتعاملاتنا مع بعض قليلة جداً

الجاكت راجع ... راجع يامحمد متقلقش
انت محتاج صاحبك ولا نضحي بيه وننقذ الجاكت
والمرتب انساه بقى يا محمد
حضرتك بتشتغل في الحكومة يعني كويس أوي انهم بيقبضوك مش بيدفعوك

وللأسف ست الحسن مش موجودة بس أمنا الغولة بتيجي على طول ... تنفع

كل حاجة هتتصلح
متقلقش
وعموماً صداقتك تشرفني يا افندم

نورت المكان


...

مها يقول...

كل سنة و انت بخير و سعادة

على فكرة أنا كمان بحب أمنا الغولة أكتر

بس بتاعتك انت مش بتاعتى أنا

:)

غير معرف يقول...

كل سنة وانتي..انتي

ست الحسن يقول...

مها رضوان

كل سنة وانتي بخير وسعادة
ومبسوطة انك بتحبي أمنا الغولة ومتأكدة ان أمنا الغولة بتاعتك كمان تستحق انها تتحب أوي

بس انتي خليها تبقى موجودة وظاهرة
وعرفيني عليها
وأكيد هتتصاحب على أمنا الغولة اللي عندي ويطلعونا برة الموضوع

نورتي يا افندم

........

كاميليا

بصراحة أنا مبستحملش التعليقات الدافية دي

انتِ فكرتيني بأغنية فيروز (كيفك إنت)
فيه جزء من الأغنية بتقول فيه لحبيبها
إنتَ ... إنتَ
وبس مبتقولش غير كده
ومع ذلك فيها كمية حب ودفا رهيبة
هي مقلتش كتير بس عبرت كويس

بجد وجودك جميل