الثلاثاء، 23 ديسمبر 2008

محمد

.

.

.

أنا قابلته مرتين ويمكن متكلمتش معاه أكتر من خمس دقايق
بس دايماً بتوصلني رسايله اللي بيبعتها للفراغ

محمد كان بيحب بنت ... من فترة بعيدة
وبعدين البنت دي بعدت عنه لأسباب معرفهاش
كل اللي أنا عارفاه

انه لحد دلوقتي بينزف من جرح عمره ما عرَّضه للشمس
وطول الوقت بيتألم في هدوء

محمد برغم انه لطيف جداً وفعلاً يدخل القلب بسرعة
إلا انه ممرور بطريقة مرعبة ومبيثقش في حد
وبيقابل كل الحاجات اللي بتحصل كإنها محاولات للأذي

محمد ممكن يدخل في معارك وهمية ....
طول الوقت محتاج يدافع عن نفسه
ومبيقبلش ان حد يبقى لطيف معاه
مبيصدقش أي حاجة كويسة تتقال عنه ...
بالرغم انه واضح جداً انه شخص صادق ودافي

محمد مبيديش لنفسه فرصة انه يشوف الناس ...
أو انه يطور علاقته بيهم
تحديداً البنات شايفهم كلهم كدابين عايزين يضحكوا عليه بالوهم
بالمناسبة
أنا مش بحبه ولا عندي خطة طويلة المدى للتواجد في محيطه
بس بتأثر أوي لما ألاقي حد جميل كده وبيتعذب
ومش قادر يشوف أد ايه هو يستاهل حاجات كتير أفضل من كدة
على الأقل يستاهل انه يعيش بجد
بدل ما يحبس نفسه أدام كمبيوتر ويشتكي للفراغ

بما إن فيه حد في الفراغ ده سمعه وتقدروا تقولوا حس بيه
محتاجة أقوله
انه صعب أوي يعرف يلاقي دفا وهو قافل كل الشبابيك والبيبان

الناس بتتواصل أكتر مع ابتسامتك ليه بس سايب لهم شرودك
متخفش من الدنيا يا محمد .... انت فعلاً مريت بالأسوأ
ليه مش عايز تسيب فرصة للأجمل انه ييجي
انت فعلاً محبوب ...
على الأقل تلات بنات من اللي كانوا قاعدين كانوا بيسألوا نفسهم
هو محمد مرتبط ... طب عنده كام سنة ...
طب ياترى ممكن ألفت نظره ... طب...؟؟
صدقني ناس كتير محتاجة تاخد فرصتها معاك وانت كمان محتاج تاخد فرصة
من حقك تحب وتتحب وتنبسط
والله من حقك تبقى سعيد ومش مكتئب.... بس ادي لنفسك وللي حواليك فرصة
اتكلم مع الناس حتى لو حاسس ان كلامك مش هيزود ولا هينقص
كفاية انه من قلبك وانك حاسه بجد...

البنات مبتعرفش تتصرف لما تحاول تتعرف على حد وتلاقيه مش مهتم
بيتصورا ان الغلط عندهم وانهم مش عاجبينك ..
عمرهم ما هيفكروا انك تايه وزهقان م الدنيا
وبتتمنى تقابل حد يخرجك م القوقعة اللي حابس نفسك فيها

طيب
أنا عارفة انك مش هتقرا الكلام ده ...
بس يمكن حد قريب منك يقدر يقولك
ويمكن ولد تاني يشبهك يبتسم ويقول
البنت دي مش فاهمة حاجة وبتتكلم عن حاجات متعرفهاش
.
.
.
....

6 التعليقات:

مياسي يقول...

محمد خايف
والخايف ما بيتحرك من مكانه

الخوف شعور فظيع.. وقاتل

أتمنى أنو محمد يطيب بسرعه

ونيالو في حد مهتم فيه:)

فارس القمر يقول...

السلام عليكم

محمد كان بيحب اوى ولما اتجرح اتجرح قوى
تحياتىوتمنياتى انوا يلاقى اللى تحافظ عليه وتصون حبو

Blank-Socrate يقول...

محمد
فى منه كتير
و انا منهم
كل ما بيكون الجرح عميق كل ما الانعزاليه بتزيد
يا ريت محمد يعرف ان الناس بتحبه
و انه مش كامل و محدش كامل فى نفس الوقت
ايه سكر مش هنقدر نعمل حاجه لمحمد
عرفى البنت اللى كانت بتسأل عليه على الحوار
و يا بخت من وفق .....
تحياتى
لو فى اى واحدة ممكن تتبنى حالتى انا موافق

هدى يقول...

هو انا بنت وبيتهيألي اني فاهة على قدي وبقولك اللي بتقوليه دا صح جدا ..مش بيحصل بس مع الولاد بيحصل مع البنات وبنعتبره انه حاجة طبيعية عشان البنت المفروض تفضل واقفة في مكانها واللي عايز يتفضل

كتير بفكر ان احنا مش مصدقين ان الناس موجودة حاولينا عشان نتواصل معاها .. عشان نتفاعل معاها

انا كتير بتفاجأ اني بقالي فترة مش بكلم حد .. واكتشفت مؤخرا ان بقالي زمان ما عملتش علاقات جديدة ..

يمكن السبب هي حالة الزهق اللي عند محمد .. وقوقفي في انتظار علاقات انسانية مثيرة للدهشة حد ابعاد الملل عني

..

حلو قوي البوست

وحلو كلامك عن العلاقات الانسانية .. لاننا هنا في الفضاء التخيلي .. بحس اننا بنخلق علاقات موازية لعلاقاتنا الحقيقية .. بتأثر عليها بقدر ما ..

..

صباحك دفا في الشتا دي

منونة يقول...

لمستنيني يا قمر
انا شفت كذا محمد من اللي بتتكلمي عنه
في بنات وولاد
وصعبوا عليا كتير
ومنهم اللي بجد ما صعبوش عليا
بعضهم كان فيهم غباء يسمح لهم انهم يكونوا فاهمين الكلام اللي بتقوليه ده كويس ويحبسوا نفسهم فيه برضه
هييييييه
مساجين عقلهم مساكين
وكلنا مساجين عقلنا في حاجة
كلنا مساكين
ابتديت اعتنق المبدأ ده مؤخرا
وابتديت اتعامل مع الكون كله في حدود السجن ده
واستمتع بالمتاح فيه استمتاع المسجون اللي عارف ان المدة لازم هتتقضى فيقضيها مبسوط احسن ما يقضيها بعياط
.........
ما تقفلش شباكك وتستنى الدفا
ما تقفلش بابك وتسد ودانك وييجي الفرح يدق بابك ما تسمعهوش
............
مرة اتمنيت الدنيا تسيبن في حالي
ابطل احلم
مش عايزة افرح انا بس تسيبني من غير زعل
ما عرفتش على فكرة
على رأي عمنا جاهين قلبي رميته وجبت غيره حجر
داب الحجر ورجعت قلبي رقيق
:)
تسلمي يا سكر

ست الحسن يقول...

مياسي

فعلاً محمد مرعوب وقريب ان شاء الله هيبقى كويس
بس قعدت فكرت في موضوع هنيَّاله ده
والله انت عندك حق مفيش حد بيهتم بحد في الزمن ده... بجد وقفت عند الجملة دي جامد

نورتي يا قمراية

.......

فارس القمر

دي أول زيارة لحضرتك وأهلاً وسهلاً بيك
مهما كان الجرح عميق فكل حاجة ليها دوا بس المهم نحاول بصدق اننا نطيب ونفرح
وان شاء الله ربنا هيسعده ويلاقي اللي تصونه وتحافظ عليه

يارب تكرر الزيارة

........

مينا

انت يا مينا متأكد ان الناس بتحبك
ومحمد كمان مصدق أوي انه يتحب
بس الموضوع يخص العزلة فعلاً
أنا صعب أدَّخل لأني على مساافة بعيدة منه ... والموضوع بس محتاج شوية شجاعة منه ومنك
علينا كلنا اننا نواجه الألم ونُصرعلى الفرح

ويا افندم انت بس تأشر
ياسلام يعني هم يطولوا

......

هدى الجميلة

محمد فيه صفات كتيرة مننا كلنا
ويمكن أكون عارفة الخوف اللي جواه ده كويس
بس مختلفة معاكي ف حكاية ان البنت بتفضل واقفة في مكانها لحد الولد ماييجي
وافرضي مجاش يا هدى
هتفضل واقفة كتيييير
كلنا بنحتاج بعض بنفس الطريقة وبنفس الدرجة وكلنا لازم ناخد خطوات حقيقية باتجاه مشاعرنا سواء كنا ولاد أو بنات
طالما حسينا وبقى عندنا مشاعر حلوة تجاه بعض يبقى لازم نعبر عنها

صباحك أحمر في أبيض يا افندم

.......

منونة

بقالك كتيييييير منورتيش المكان
بس مش زعلانة منك لأني عذراكي

موضوع اننا سجناء عقلنا ده حقيقي جداً كلنا سجناء الطريقة اللي بنستقبل بيها الحاجات وبنشوفها

لحد ما يبقى فيه نور مفاجيء ينقلنا لزاوية مختلفة نشوف منها الدنيا

نورتي خالص

......