الخميس، 8 يوليو 2010

بوسطة ... بوسطة ... بوسطة




.
تعالوا نلعب لعبة، هنفترض ان المدونة دي سحرية
وانها تقدر توصل الجوابات للناس عبر الزمن
بس شرط وصول الرسايل لأصاحبها
انهم يتعرفوا عليها ويكتشفوا انها تخصهم
...........


1
عارفة انك محتاج وقت وحاسة بيك
بس ساعات مببقاش مصدقة انك تقصدني فعلاً

2
مقصدش أأذيك أبداً ... أنا وجعتك من غير قصد
أنا آسفة

3
حياتي من غيرك أحسن كتيييير ، بس ده ميمنعش إنِّك بتوحشيني ساعات

4
مش عايزة أبقى بنتك .... عايزة أبقى صاحبتك

5
الصفحة بتاعتك اتقفلت ببساطة شديدة لدرجة اني شكِّيت انها اتفتحت أصلاً

6
مش قادرة أفتكر صوتك وانت بتنطق اسمي ... والحكاية دي صعبة أوي

7
هو مينفعش نقعد سوا في البلكونة نشرب القهوة ونتكلم سوا من غير خوف

8
مبقتش قادرة استحمل، ممكن تقولي اني بقيت غريبة
وممكن تفتكري اني بتخلى عنك

بس انا مش قادرة ... وبس

9
ممكن تيجي أسوان معايا

10
آه عارفة اني كبرت أوي
بس لسة مش مصدقة

11
طبعاً بحبك
بس فيه حاجات لازم أعملها لوحدي

12
أنا عارفة وحاسة بس مش شايفة
لو سمحت ممكن متتأخرش

13
صح أنا خوَّافة وبجري بسرعة بس برجع تاني
برجع ومبلاقيش حد مستنيني

14
مش مهم ان كنت بعيدة أو قريبة للصورة اللي انت راسمهالي
المهم اني موجودة

15
صعب أتكلم معاكي أوي برغم اني بحبك خالص
بس انا دلوقتي محتاجة حد فاهم أد ايه أنا مليانة عيوب

16
أكيد ربنا بيحبني علشان كدة عرفتك

17
ليه مينفعش نخبز سوا عيش سُخن

18
كفاية كلام بأة
ممكن تحضنني

19
إيه يعني أنا وانتي بنحب نفس الراجل
ماهو نفس الراجل مبيحبناش احنا الاتنين

20
والله كان نفسي أحبك واتجوزك ،
بس انت مدتنيش فرصة أعرفك ومدتش لنفسك فرصة تعرفني

كل ده عشان خايف تترفض
ينعل أبو كدة يا شيخ

21
الحكاية تتلخص في انك عايزة تاخدي ومتديش
محتاجاني معاكي ومعندكيش أي استعداد تبقى معايا
آسفة مش هينفع

22
أيوة أنا خيالية أوي
بس مينفعش ترفضني زي ما بترفض مشاعرك اللي بتوجعك

23
حكايتكم متعقدة خالص، بس صادقة
معرفش حلها إيه بس عارفة انكم كويسين وبحبكم

24
آسفة اني جرحتك أوي
كنت عيلة وغضبانة ومش عارفة بقول إيه
أنا لسة بلوم نفسي لحد دلوقتي
ياريت تسامحيني

25
مش متخيلة اني اقوم م النوم الساعة خمسة الصبح عيانة
وبرجع اللي في معدتي

وانت تقوم تجيبلي الدكتور وتاخد بالك مني
كل اللي متصوراه انك هتزعقلي علشان أطفي النور واخرج برة

26
إلعب غيرها يا حنين
معدش يجي منه خلاص

27
مش خايفة من غيابكم
انتم جوايا




.........

19 التعليقات:

nudy يقول...

مقدرش ارد غير بجواب انا كمان
عمري ما كان عندي صديقه جميله زيك
اسفه لاني كتييييييييييير باضغط عليك وبلخبطك آآآخر حاجه
اوعي في يوم تسافري وتسيبيني من غير ما تقولي لي

فكره البوست رائعه وجميل قوي اننا نقول اللي جوانا لكل اللي حوالينا يمكن ده يفسر للناس شويه حاجات كانت مش مفهومه

من اجل عينيك يقول...

غادة
تصدقي انا قبل يومين بس كنت باقول له
تعالى معايا اسوان
ياربي

ده غير ان فيه رسايل كتير قلنا لبعض قبل كده لقيتك كتبتيها
يخرب بيت كده

البوست يجنن ياغادة وانت كلك تجنني

مروة يقول...

نفس عميق قوي طالع من أبعد نقطة جوايا
وإبتسامة ع الشفايف ممزوجة بألم ممتع
..
ده اللي حصل لي بعد ما خلصت قراءة النص بتاعك
كلامك بيلمسني في أوقات كتييييييييير، والمرة دي وجعني قوي، بس اتمنيت إن رسايلك دي توصل لأصحابها
ربنا يخليكي بتضوي مشاعر حقيقية ونقية يا ست كريستاله

مها عبد الحميد خليل يقول...

عندي سؤال
هم الناس اللي باعتالهم الرسايل بعاد أوي كده ؟ .. عشان تبعتي لهم رسايل ؟؟

...

بافكر انك في مرحلة تحولات

Unknown يقول...

غادة ..
رسايلك عجبتني جدا ..
يا ريت يكون حد من اللي متوجهة لهم قراها او عرف انها بتاعته :)
:)
حلوة يا غادة .

رانيا منصور يقول...

عملت حاجة زي كده زمان :)
وعموما مش مهم توصل
أد ما مهم اوي ان الواحد يحس انه بعت حاجة لحد
خرّجها بمعنى أصح !

:))

البِـئرُ والظمّأْ يقول...

الله
حلوه قوي بجد
الدنيا هنا حلوه قوي
:)
هجيلك تاني
.
.
زينب

Mai Nagib يقول...

بجد .. حلوو وبيشق طريقه للقلب .. إستمري

موناليزا يقول...

عجبتنى اوى رقم19:)

رضوى داود يقول...

و انا كمان
كل شوية افتكرها
"إيه يعني أنا وانتي بنحب نفس الراجل
ماهو نفس الراجل مبيحبناش احنا الاتنين"

sab7al5air يقول...

الفكره مجنونه بس تساعد ع البوح اسمحي لي استعيرها هناك الكثير يمكن ان اقوله عبر الزمن.
ليست اول زياره لمدونتك ياست الحسن ياريت تشرفيني بزياره.
بعض السطور هنا مستني واجترت ذكريات

مها عبد الحميد يقول...

على فكرة

أنا أختار الرسالة رقم 15

:)

إبـراهيم ... يقول...

والله بتهرجي يا غادة، قااااال عبر الزمن قاااال!!!

أنا حاسس إن فيه ما لا يقل عن 3 جوابات هنا ليَّا ؟!!

اتفضلي بقى، تخيلي كام واحد هيلاقي كام جواب؟، وبعدين 27 دي للناس كلللها، مش الناس طبعًا لكن الأصدقاء ودي حتمًا للي مش غايبين على الأقل دلوقتي
ثم إن فيه سؤال تاريخي، إشمعنى 27 جواب يعني ؟؟؟

بحلم يقول...

آه يا حبيبتي موافقة طبعا آجي معاكي أسوان
بس خلليها ف الشتا:)
بجد نفسي أكون معاكي ف مكان ونقعد نرغي نرغي نرغي..احم
راحة أسوان امتي بقي!!!

ست الحسن يقول...

هتد

تسلمي
وربنا يخليكي لية

.......

فاطمة

تسلمي
وفرحانة انك بتلاقي نفسك هنا

...

مروة الجميلة

بشكر النص اللي أقتعك تنوري المدونة
وسلامة قلبك م الوجع

وبتلمس قلبي ست كريستالة دي

تسلمي

........

مها

البعد والقرب خادعيين جداً
وانا في مرحلة تحولات فعلاً

.......

شيماء

الناس عارفين من غير ما اكتب
انا اللي محتاجة أكتب
أكتر ما هم محتاجين يعرفوا

تسلمي

.......

رانيا

حطيلي اللينك بتاعها أخوة يعني
المهم
اني كتبت

......

زينب

انتي أحلى
تسلمي

وهستناكي

........

مي

تسلمي
مبسوطة انه عجبك

.......

موناليزا

وطلعت عيني رقم 19
عادي بقى

تسلمي

......

رضوى

هي كمان بتشكر فيكي
تسلمي

......

صباح الخير

صباح الورد
باريت تيجي تاني

هستناكي

....

مها

ما بلاش يا جميييل
خليكي في 17
بنت حلال زيك

.......

ابراهيم

طبعاً ليك رسالة هنا
وانا انساك بردو

هم كانوا حاجة وتلاتين بس انا قصقصتهم
فيه رسايل لسة مجاش وقتها

المهم انهم عبر الزمن بجد
فيه ناس متوجهلهم رسايل هنا ماتوا من أكتر من عشر سنين
عادي يعني

المهم
بحب مرورك هنا
أوي

متبقاش تغيب

......

هناء

أسوان صعب
بس ممكن نقعد نرغي في أي وقت

بتنوري دايماً

...

Mahmoud Hermes يقول...

نفسي اقولكم اني بحبكم قوي وبجد متاثر بعدم وجودكم جمبي واسف قوي اني وانا صغير مكنتش يقغعد معاكم بس انتم عارفين انا بحبكم ازي خالدة انتي بزات عارفه انا تعبان قوي في حياتي من غيرك كانت نفسي تكوني معايه زمحتاجلك فوي محتاج اترمي في حضنك واعيط ايوة اعيط واني كبير متاكد انك زعلانه عشان بقالي كتير مقراتش قران ليكي يا حبيبتي حاضر وعارفه انك زعلانه عشان مش بصلي بحيبك فوي يا خالتي خالدة وخالو احمد متقلقيش لسي فاكر لحظه فرقك علي ايدي في اوضه نوامي علي سرير اخويه لسي فاكر وانت اخر حد شوفته انا فاكر انك قوالتلي نفسي اعمل برج خمام فاكر اني نمتي في حضني 5 ساعات ممن اطول ساعات حياتي لحد مواصلتك فبرك عايز قولك اني لحد النهاردة مش عارف انسي وانت بتفارق الحياه انا كانت عارف ومتاكد انك ليك ميعاد بس انا كنت نقسي تصبر ثواني انت تعبت قوي في حياتك سفرت واتغربت ويوم مقرارت ترتاح تمموت بعد شهر معرفش هل معني كدة انك خلقت لكي تكون دائما في تعب الله ياعلم بحبكم قويييي

Old Blogger يقول...

رائع
رائع
رائع


انا كمان زى زينب
إن شاء الله هاجى تانى

سارة يقول...

هو ممكن تعليقى ده يوصل
مش عارفة
يمكن
يارب يوصل
انا اول مرةادخل هنا وبصراحةالمكان واللى فيه رائع جدا
انا هقتبس كلمات من الجميلة غادة
احنا يمكن مش فى فيلم دالوقت عشان اقول
كده بس انا حاسة ان وجودنا هنامش بس اختصار لحياة كاملة لا تقريبا جزء كبيييير اوى منها عموما نفسى اوصل رسالة
(ليه وانا تعبانة فى حبك مستمتعة يمكن لانى متاكدة انى بحبك وانك انت كمان بتحبنى غريبة
غريبة اوى
وانا مش معاك دموعى كات هى المنقذ ليا
وكانى كنت بقول دى عشانك
عشانك انت وبس
*لطالما كنت تذكرنى دائما*
دموعك غالية ياسارة
و لا عندى اغلى منك عشان امنحهالك
لا
مش دموعى
عيونى
ايوه عيونى
معلش
يمكن انا خيالية فى حبى شوية زيك يا غادة
لا
بس ده مش ممكن ده اكيد)

فى عينيك عنوانى يقول...

احبك
اريدك
نعم اريدك انت
انت ولا احد سواك
اريد ان انام فى حضن حضنك
اريد ان اشعر بذراعيك تلتف حولى وتضمنى
و بكل قوة تقول لى_احبك_
اذكر جيدا كل لحظة ابتعدت انت عنى فيها
ولكن طالما علمتنى الحياة
ان احياها لحظة بلحظة
لااريد شيئا سوى ان اكون
سجينة حضنك