الجمعة، 7 نوفمبر، 2008

الساعة 3 صباحاً


في الأول
التدوينة دي مكتوبة من فترة ،
مش عايزة حد يقلق عليَّ ( بحب افترض ان فيه ناس ممكن تقلق علي )





عايزة أكلم حد في التليفون دلوقتي
عايزة أقوله خدني ف حضنك جاااامد وخليني
....
عايزة أكلم حد مش عارفة اسمه ولا فاكراه
يمكن يكون واحد بحبه ... أو واحد صاحبي ... أو أي حاجة تانية
...
عايزة حد يكلمني
يقولي متخافيش ويدلعني...
ميخبيش الحنان اللي ف صوته ويسيب مشاعره تلمسني من غير افتعال

عايزة اكلم حد يبقى صاحي دلوقتي
أو يكون نايم وبيحلم بية وصحي على تليفوني
هيقعد يحكيلي ازاي أنا واحشاه
وازاي كل يوم الصبح لما النيا تبقى دافية والشمس تلمس خده
بيسأل نفسه ياترى ممكن أقابلها دلوقتي صدفة

عايزة حد يكلمني
يحاول يسحب الكلام من شفايفي
وميزهأش لما انفجر في العياط وهو مش عارف ليه
وبعدها يحاول يهديني..
في الأول هيقول نكتة ولما مااضحكش هايغنيلي ...
ولما يغني صوته هيبقى حنين
فمش هستحمل وانفجر ف العياط تاني

عايزة حد يكلمني
يكون بيعرفني كويس ويقدر يخمن ايه اللي انا فيه دلوقتي...
ويكون مهتم بجد
هيسألني أسئلة كتيرة كلها مش هاجوبها
وساعتها هيعرف اني مش بتكلم علشان خايفة صوتي يفضحني
والدموع اللي بتنزل بهدوء تسيب أثر مشروخ ف صوتي

وبعدين هيبتدي يحكيلي حدوتة طويلة عن القمر والأرنب
وحتة السكر اللي مابتدوبش
وبعدين هيحكي عن الأميرة الجميلة والغابة والأقزام

ولما أتوووه مني
هيسألني بحب شديد مالك يا غادة ؟




.........

4 التعليقات:

nudy يقول...

حبيبتي دود طبعا فيه حد بيقلق عليك جدا وكلامك بيخضه عليك قوي بس انا كمان تايهه ومش لاقيه بر ولا سكه علشان كده مش عارفه اقولك ايه واضح ان الجو ده بتاع اليومين دول بيفتح كل المشاعر المدفونة وبيسمح لها تنفجر فينا
لكن ارجع القولك
وايوب اذ نادي ربه اني مسني لضر وانت ارحم الراحمين فاستجبنا له وكشفنا ما به من ضر.

هدى يقول...

مش عارفة ليه وانا بقرا كلامك افتكرت كلام دار بيني وبين وحدة كانت بتكلمني عن احاسيسها .. بعفوية الراغب في اني اوصلها مقدار مشاركتي ليها قلتلها .. اني مريت بكل دا عندي خبره حقيقية في كل اللي بتقوليه

فردت ما بحبش اسمع منك انك عارفة دا وحاساه

يمكن تكون حابة انها تعيش حالة تفرد ما حدش غيرها عاشها سيبك منها

..
بالصدفة وبتحريض من العدوي بسمع اغنية جايبلي سلام

بكير طل الحب على حين لنا

اقولك

http://song.6arab.com/fayrooz_jayebli-salam.rm

اسمعي

هويدا صالح / عشق البنات يقول...

تصدقي منغاظة منك يا بنت يا غادة
زعلتي مني صديقي العزيز أحمد يوسف
مش فاهمة ليه خايفة من التصوير في التلفزيون ؟
كنا هننبسط على فكرة
كلميني لما توصلي لاقرب تليفون ..
:)

ست الحسن يقول...

نودي

مش عارفة أقولك ايه
بس ادعيلي


........
هدى

أنا حبيت الأغنية أوي
حسيت انك بتطبطبي علىَ جامد

بفرح لما الاقي حد حاسس بيَّه
وبحس بالمشاركة والونس

نورتي يا افندم

....
هويدا

بعتلك ع الميل
وخيرها ف غيرها

....