بوسطة ... بوسطة ... بوسطة

.
تعالوا نلعب لعبة، هنفترض ان المدونة دي سحرية
وانها تقدر توصل الجوابات للناس عبر الزمن
بس شرط وصول الرسايل لأصاحبها
انهم يتعرفوا عليها ويكتشفوا انها تخصهم
...........


1
عارفة انك محتاج وقت وحاسة بيك
بس ساعات مببقاش مصدقة انك تقصدني فعلاً

2
مقصدش أأذيك أبداً ... أنا وجعتك من غير قصد
أنا آسفة

3
حياتي من غيرك أحسن كتيييير ، بس ده ميمنعش إنِّك بتوحشيني ساعات

4
مش عايزة أبقى بنتك .... عايزة أبقى صاحبتك

5
الصفحة بتاعتك اتقفلت ببساطة شديدة لدرجة اني شكِّيت انها اتفتحت أصلاً

6
مش قادرة أفتكر صوتك وانت بتنطق اسمي ... والحكاية دي صعبة أوي

7
هو مينفعش نقعد سوا في البلكونة نشرب القهوة ونتكلم سوا من غير خوف

8
مبقتش قادرة استحمل، ممكن تقولي اني بقيت غريبة
وممكن تفتكري اني بتخلى عنك
بس انا مش قادرة ... وبس

9
ممكن تيجي أسوان معايا

10
آه عارفة اني كبرت أوي
بس لسة مش مصدقة

11
طبعاً بحبك
بس فيه حاجات لازم أعملها لوحدي

12
أنا عارفة وحاسة بس مش شايفة
لو سمحت ممكن متتأخرش

13
صح أنا خوَّافة وبجري بسرعة بس برجع تاني
برجع ومبلاقيش حد مستنيني

14
مش مهم ان كنت بعيدة أو قريبة للصورة اللي انت راسمهالي
المهم اني موجودة

15
صعب أتكلم معاكي أوي برغم اني بحبك خالص
بس انا دلوقتي محتاجة حد فاهم أد ايه أنا مليانة عيوب

16
أكيد ربنا بيحبني علشان كدة عرفتك

17
ليه مينفعش نخبز سوا عيش سُخن

18
كفاية كلام بأة
ممكن تحضنني

19
إيه يعني أنا وانتي بنحب نفس الراجل
ماهو نفس الراجل مبيحبناش احنا الاتنين

20
والله كان نفسي أحبك واتجوزك ،
بس انت مدتنيش فرصة أعرفك ومدتش لنفسك فرصة تعرفني
كل ده عشان خايف تترفض
ينعل أبو كدة يا شيخ

21
الحكاية تتلخص في انك عايزة تاخدي ومتديش
محتاجاني معاكي ومعندكيش أي استعداد تبقى معايا
آسفة مش هينفع

22
أيوة أنا خيالية أوي
بس مينفعش ترفضني زي ما بترفض مشاعرك اللي بتوجعك

23
حكايتكم متعقدة خالص، بس صادقة
معرفش حلها إيه بس عارفة انكم كويسين وبحبكم

24
آسفة اني جرحتك أوي
كنت عيلة وغضبانة ومش عارفة بقول إيه
أنا لسة بلوم نفسي لحد دلوقتي
ياريت تسامحيني

25
مش متخيلة اني اقوم م النوم الساعة خمسة الصبح عيانة
وبرجع اللي في معدتي
وانت تقوم تجيبلي الدكتور وتاخد بالك مني
كل اللي متصوراه انك هتزعقلي علشان أطفي النور واخرج برة

26
إلعب غيرها يا حنين
معدش يجي منه خلاص

27
مش خايفة من غيابكم
انتم جوايا




.........